Свет
Десетина директори од НБМ сменети од функциите
Стартуваа најавените директорски смени во Народна банка на Македонија. Како што дознаваме неофицијално, гувернерот Петар Гошев веќе одлучил кои ќе бидат идни први луѓе на клучните дирекции во централната банка, откако ги разгледал нивните програми за овие престижни функции.
Почнаа најавените директорски проветрувања во централната банка
Стартуваа најавените директорски смени во Народна банка на Македонија. Како што дознаваме неофицијално, гувернерот Петар Гошев веќе одлучил кои ќе бидат идни први луѓе на клучните дирекции во централната банка, откако ги разгледал нивните програми за овие престижни функции. Дел од старите директори ќе мора да ги напуштат директорските фотелји, а дел ќе ги задржат досегашните позиции. Сепак, ниту оние што останаа на директорските места, ниту новите директори, нема да имаат гаранција оти функциите им се зацементирани, бидејќи по две години ќе има нов реизбор, што значи повторно распишување конкурс на кој ќе можат да се пријават сите што ги исполнуваат потребните услови и што имаат идеја како уште подобро да ја водат соодветната дирекција.
Она што е сигурно дека без раководни функции остануваат десет директори во НБМ, бидејќи пет дирекции се укинуваат, така што од 17, остануваат 12 дирекции. Од оние 12 дирекции што остануваат, пак, петмина се сменети и на нивно место се назначуваат нови имиња, а седум ги задржуваат позициите.
Игор Давков, кого јавноста го памети како привремен управник од НБМ во Експорт-импорт банка, е новиот директор на Дирекцијата за супервизија во централната банка, на местото на досегашниот Илија Граорковски. Весна Контратенко ќе биде фронтмен на Дирекцијата за централно-банкарски и девизни операции, која е направена преку спојување на дирекциите на Зора Буклевска и Владо Ристиќ, кои исто така ги губат функциите. Како директор за правни работи ќе биде задолжен Јанче Лековски, на местото на досегашната директорка Снежана Бундалевска. Драган Смиљановски, пак, ќе ја преземе раководната палка во трезорот, од досегашниот прв човек Добри Мицковски, кој ќе биде сменет од таа функција. Ново кадровско решение ќе има и во Дирекцијата за ревизија, каде што сега се наоѓа Нада Андреева. Таму конкурс распишал Советот на НБМ кој е во тек, но сигурно е дека ќе биде избран нов човек. Од функцијата си заминува и Царка Накова, бидејќи се укинува нејзината Дирекција за девизна документација, како и Благоја Томовски, кој беше директор на Дирекцијата за обезбедување и одржување, што сега е присоединет кон друга дирекција.
Се укинува и Дирекцијата за издавачка дејност, чиј директор беше Вилма Трајковска, сопруга на починатиот претседател Борис Трајковски. Наши извори велат дека меѓу неа и гувернерот е договорено оти веќе нема потреба од таа дирекција. Трајковска ќе биде советник во НБМ за прашања кои се поврзани со нејзиниот делокруг на работа, и според упатени во НБМ, нема да биде оштетена на ниту еден начин.
Милица Арнаудова останува да ја раководи Дирекцијата за банкарска регулатива, а функцијата директор на Дирекција за истражување ја задржува и Анета Крстевска. Лихнида Сајкова-Џуклевска останува директор на Дирекција за информатичка технологија, а местото го задржува и досегашната директорка за технички работи, Славјанка Стојановска. Весна Филиповска останува прв човек на Дирекцијата за сметководство, исто како и Дане Крстевски кој продолжува да биде директор на Дирекцијата за платни системи. Местото го задржува и Ѓорги Гоцков, како директор на Дирекцијата за статистика.
Оние што ги напуштаат директорските фотелји, велат во НБМ, ќе добијат нови работни задачи соодветно на нивните стручност и искуство. Никој не најавил дека си заминува од НБМ.
(ННФ.)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Руте: Новата арктичка мисија на НАТО е многу значајна
Отфрлајќи ги критиките дека новата арктичка мисија на НАТО е само ребрендирање на постојните активности, генералниот секретар на НАТО, Марк Руте, рече дека тоа е „многу значајна“ иницијатива.
НАТО предложи нова операција „Арктички стражар“ завчера, која би ги консолидирала заедничките вежби во областа под команда на алијансата.
Сепак, дипломатите и експертите веруваат дека ова е главно комуникациски потег насочен кон смирување на Доналд Трамп, како и одговор на заканата што ја оценуваат како во голема мера претерана.
Руте објасни дека мисијата ќе има „чекор-по-чекор пристап“ и ќе започне со обединување на „постојните вежби и активности“ на алијансата во регионот под една команда за да се утврди „што друго ни треба“.
Врховниот командант на сојузничките сили за трансформација, адмирал Пјер Вандиер, исто така ќе биде замолен да испита како „најновите иновативни технологии“ можат да се користат на Арктикот.
фото/Depositphotos
Свет
Макрон: Русија е значително ослабена од конфликтот
Францускиот претседател, Емануел Макрон, тврди дека Русија всушност е значително ослабена од конфликтот.
Според него, Русија влегла во рецесија, станала целосно зависна од Кина, има демографски проблем и се соочува со воен неуспех.
Макрон нагласи дека Европејците сега станаа „единствениот извор на воено финансирање“ за Киев, алудирајќи на Соединетите Американски Држави, кои побараа од Европа да ги засили своите напори.
Тој верува дека не може да се постигне мировен договор меѓу Украина и Русија без учество на Европејците.
„Ние ќе бидеме дел од решението и треба да бидеме дел од решението“, рече Макрон. Тој додаде дека токму тоа е причината зошто неговата канцеларија неодамна воспостави контакт со Москва.
foto/Depositphotos
Свет
Тројца скијачи загинаа во лавина на француските Алпи
Тројца скијачи загинаа откако беа однесени од лавина во луксузниот француски алпски скијачки центар Вал д’Изер, изјави за новинарите Седрик Боневие, задолжен за патеките на одморалиштето.
Боневие рече дека една жртва е француски државјанин, додека другите се странци.
Тој додаде дека инцидентот се истражува.
Медиумските извештаи велат дека инцидентот се случил надвор од пистата.
Се чини дека една од жртвите била зафатена од лавина високо на планинската падина, додека другите двајца биле во група од пет скијачи, вклучувајќи и професионален водич, пониско од планината каде што не можеле да ја видат катастрофата што се приближува.
Не е познато што ја предизвикало лавината, рече Боневие.
Метео Франс, националната метеоролошка служба, во четвртокот го стави подрачјето под црвена тревога поради ризик од лавини.
фото/Depositphotos

