NULL

Потребно е почитување на законите, свест, но и капацитет на институциите, со цел регуларно финансирање на политичките партии и изборните кампањи.На денешната дебата „Финансирање на политичките партии“ во организација на Државната комисијата за спречување на корупција, беше констатирано дека е потребна практична, а не само декларативна заложба со цел оневозможување на корупцијата преку финансирањето на партиите од сомнителни извори.Првиот анти-корупционер, Илми Селами ги повика партиите, покрај за теснопартискиот, да покажат интерес и за општиот интерес.„Ајде, пред избори да седнеме, да ги разгледаме сите работи, да смогнеме сили да работиме на затворање барем на некој вентил од каде што се појавува корупцијата, во однос на нерегуларностите на финансирањето на политичките партии и на изборните кампањи. Со тоа ќе покажат пред граѓаните дека, освен теснопартискиот интерес, политичките партии се заинтересирани и за општиот интерес“, изјави Селами.„Ние се чуствуваме одговорни, но истовремено свесни, дека не сме ставени во ситуација да го одработиме нашиот дел, затоа што законите, така како што се поставени, не се добро конектирани. Обидете се да ги спроведете и ќе видите дека многу сме декларативни, одлични сме за декларација, но за практика не, меѓу другото и затоа што во законите постојат празни одови, гапови, коишто не овозможуваат во практика да ги покажеме резултатите“, изјави Мирјана Димовска, поранешен претседател на ДКСК.Дел од познавачите коментираат дека капацитетот на институциите е реален проблем во Македонија.„Реален проблем во Македонија е капацитетот на институциите и тоа практично се гледа од едната препорака на ГРЕКО. Според нив, треба нешто да се смени и во надлежностите на институциите, но треба да се смени и во капацитетот на институциите. Факт е дека во Македонија немаме независно судство. Јасно е дека треба да се смени она што значи свест, но прво треба да ја смениме праксата. Се додека функционира т.н. телефонско право, односно да можете да се јавите на некој судија и да му кажете судска одлука, џабе ви е да менувате свест, ако праксата ви остане таква“, рече универзитетскиот професор Рената Десковска.Како преодно решение за спречување на финансирање на политичките партии од сомнителни извори, беше предложено зголемување на финансирањето од државниот буџет.„Бидејќи потребите на финансирање, посебно на кампањите се големи, а ако се ограничени можностите за финансирање од граѓаните, мислам дека на преоден рок, за наредните десетина години, можеби треба да се размисли за зголемување на финансирањето од буџетот на Република Македонија. Со зголемувањето на финансирањето од буџетот, ќе се намали можноста за влијание на нелегитимни и неидентификувани извори. По овој рок, со подобрување на социо-економската положба во земјата, може повторно да се стави акцент на финансирање од граѓаните“, рече Сашо Клековски од Македонскиот Центар за меѓународна соработка. /крај/ач