Два и пол тони пластичен експлозив, десет тони барут, околу 10.000 куршуми, близу 740.000 парчиња каписли и уште многу други производи, му биле продадени на Василиос Пападопулос, купувачот на фабриката за оружје од Самоков за 10.000 евра, пишува во документите што ги доби „Време“.

ШОКАНТНО ОТКРИТИЕ ОД ПРОДАЖБАТА НА „СУВЕНИР“

Два и пол тони пластичен експлозив, десет тони барут, околу 10.000 куршуми, близу 740.000 парчиња каписли и уште многу други производи, му биле продадени на Василиос Пападопулос, купувачот на фабриката за оружје од Самоков за 10.000 евра, пишува во документите што ги доби „Време“.

Според документацијата, огромното количество оружје на 14 јуни лани, со одлука на одборот на доверителите ја продал Тодор Пашоски, стечајниот управник на „Сувенир“, на „фирмата на „Сувенир Олимпик“ сопственост на Пападопулос. Оваа фирма, според Централниот регистар, не постои.

Управникот Пашоски претходно за „Време“ потврди дека овие готови производи не биле предмет на приватизацијата на „Сувенир“, туку биле накнадно продадени. Министерството за одбрана, како најголем доверител, а и како единствена институција што смее да користи вакво формациско вооружување, било сопственик на овие производи.

Експертите за оружје на кои им ја покажавме документацијата беа фрапирани.

– Па, тоа е грабеж. Само еден килограм пластичен експлозив по најниска цена без ДДВ и транспортни трошоци чини 22 евра, односно 2,5 тони чинат 54.000 евра. Килограм барут НЦД-02/М5 за куршум калибар 7,62Х51 милиметри чини 20 евра,т.е. 3.048 килограми, како што стои на листата, чинат 61.000 евра. Еден куршум, калибар 7,62Х39 милиметри М67 за калашников чини 0,030 евра. Пишува дека се продадени 7.560 куршуми, значи вредноста на количеството е 226 евра – велат експертите.

Според нив, најскап дел од продадените производи се детонаторите Ц11 за рачна бомба М93, „кашикара“, од бугарско производство. Биле продадени 35.680 парчиња од овие детонатори, од кои еден чинел 4 евра, односно вкупното количество е проценето на 142.000 евра.

Експертите се ништо помалку вџашени од втората листа на стоки под број 01-02/2006, наменети за уништување. На неа се наведени стотици парчиња бомби, гранати, автомати, куршуми. Овие производи му биле дадени на Пападопулос за уништување.

– Оружје се уништува ако е постаро од 20 години, бидејќи најчесто по тој период се смета за несигурно за употреба. Бомбите што се наведени на листата не е можно да се толку стари, бидејќи „Сувенир“ ги произведуваше од 1993 година, па наваму – велат експертите.

Пашовски вчера не беше достапен на неговиот мобилен телефон да коментира кој ја определил цената на муницијата и експозивите, дали бил распишан тендер и како и со која намера грчкиот сопственик ги купил. Секретарката ни рече дека бил на службен пат.