Македонија
Кумановските стечајците ја турнаа оградата и ја гаѓаа владата со јајца
Метеж и турканица изби денеска пред владата меѓу полицијата и околу двеста кумановски стечајци, кои се обидоа насила да влезат во зградата на владата.
Метеж и турканица изби денеска пред владата меѓу полицијата и околу двеста кумановски стечајци, кои се обидоа насила да влезат во зградата на владата.
Ваква реакција уследи, откако стечајците не успеаја и овој пат да остварат средба со премиерот Никола Груевски за решавање на нивниот статус.
Револтирани од игнорантскиот однос, тие ја гаѓаа владата со јајца и целосно го блокираа сообраќајот кај крстосницата кај мостот „Гоце Делчев“
Со солзи во очите пеејќи ја македонската химна ги раскажуваа своите маки со неплатените комунални сметки, страдањата да се дојде до парче леб и лекови за болните во семејството.
„Од домаќини не направија недомаќини, боси гладни овде сме искочиле да го искажеме нашиот револт. Мојот сопруг после многу години работен стаж, сега веќе никој не сака да го вработи, останавме целосно на улица. Децата и внуците ни бараната парче леб а ние немаме брашно да им замесиме. Ние не бараме нешто посебно само она што сме го заработиле самите“, изјави Сафета Ибраимова учесник во протест.
Претседателката на стечајното здружение УНИТ од Куманово Лилјана Георгиевска, со стечајна книшка ги демантираше шпекулациите дека се партиски организирани.
„Нашето здружение брои над 2.000 членови и сите се под капата на УНИТ од Куманово. Ова не се партиски, туку стечајни книшки, а тие што ги праќаа по паркови тие се партиски послушници. Сами досега се финансираме. Тогаш кога не ќе можеме да организираме превоз, ќе се собираме секој во својот град. Оваа голгота мора да престане се додека не оствариме средба со премиерот нема да се откажеме“ изјави Георгиевска.
Тие од пред владата му порачаа на Груевски дека ќе го казнат на престојните парламентарни избори доколку продолжи со ваквиот пасивен однос кон стечајците.
„Ако СДСМ во изминативе години не доведе до ова, ние тогаш го казнивме, сега истото барање го имаме и за актуелниот премиер Груевски- да ни го реши статусот, во спротивно и тој ќе ги изгуби изборите“, изјави еден стечаец.
Радикализација на протестите, непослушен бунт со копачи и лопати и блокада на граничниот премин Табановце, ќе биде следниот чекор на стечајците, доколку во најкус временски рок не остварат социјален дијалог со владата.
Стечајците од Куманово, кои еден месец, секој вторник протестираат пред владата, бараат исплата на 100 евра месечно, се додека не ги исполнат условите за пензија. /крај/рќ
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Православните верници го слават Велигден
Православните верници денеска го слават најголемиот христијански празник Велигден – Христовото воскресение, ден кога Исус Христос ја докажал својата божествена моќ и воскреснал од мртвите. Воскресението Христово на полноќ беше објавено во сите храмови на Македонската православна црква, а денеска се одржуваат воскресенски литургии.
Поглаварот на МПЦ-ОА г.г. Стефан богослужеше во Соборниот храм „Свети Климент Охридски“ во Скопје од каде го објави Христовото Воскресение и упати Велигденски пораки.
Македонија
Посебен сообраќаен режим утре и задутре во Тетово поради предизборни митинзи
СВР Тетово информира дека поради одржување на митинзи на политичките партии во рамки на предизборната кампања во следните два дена (недела и понеделник) ќе има посебен сообраќаен режим во центарот на градот.
– Ќе се воведе посебен режим на сообраќајот и тоа по булевар „Илирија“од влезот на Тетово сè до плоштадот, односно кружниот тек со булевар „Илинденска”, при што нема да се дозволува паркирање на возилата низ булеварот. Исто така, за време на митинзите сообраќајот ќе биде пренасочен по другите улици, и тоа по улиците „ЈНА“, „Тодор Ципоски-Мерџан”, „Јане Сандански“ и улица „Никола Тесла“, се вели во соопштението на СВР Тетово.
Отттаму со апел возачите да бидат трпеливи и да ги почитуваат наредбите што ќе ги издаваат полициските службеници.
Македонија
Ковачевски: Имаме задача да не се откажеме од европскиот сон за подобра и просперитетна држава за идните генерации
„Нашата генерација има задача да не се откаже од европскиот сон на земјата и да направи сè за Македонија да стане рамноправна членка на Европската Унија“, порача претседателот на СДСМ, Димитар Ковачевски, на митингот на Коалицијата за европска иднина во Кичево.
Ковачевски истакна дека денеска кога чествуваме 121 година од смртта на македонскиот револуционер, идеолог и учител, Гоце Делчев, важно е да се потсетиме дека низ историјата нашиот народ не се откажувал дури ни пред најтешките предизвици. Порача дека 8 мај е нов историски крстопат, денот кога сите прогресивни и демократски сили во државата треба да одлучат државата одлучно да продолжи на патот кон Европската Унија.
„Само така ќе изградиме подобра и просперитетна држава за идните генерации. Држава со европски животен стандард, европски вредности, европски правила на игра“, рече Ковачевски.
Ако ВМРО ДПМНЕ и Силјановска се дограбат до власта, ќе стават рампа на патот на Македонија кон Брисел и ќе можеме да се збогуваме од ЕУ, истакна Ковачевски.
„Не смееме да ја повториме грешката од минатото и да дадеме преголема моќ во рацете на десничарска партија како ВМРО ДПМНЕ. Уште се свежи раните што ѝ ги нанесоа на државата за време на нивното 11-годишно владеење на Македонија. Сетете се на заробените медиуми, замолчените вработени во јавниот сектор, натепаните студенти во библиотеките и плоштадите. Сетете се на милионите потрошени за жални врби, лажен барок, евтин стиропор само за да се богатат поединци од ВМРО – ДПМНЕ“, истакна Ковачевски.
Лидерот на СДСМ пред граѓаните на Кичево најави повисоки плати и пензии, пакети за поддршка на учениците и студентите, одговорна социјална политика и одлучна борба против криминалот и корупцијата.