Свет
Власта молчи за шверцот во солунското пристаниште
Македонските власти повеќе од два месеци молчат за разбивање шверцерски синџир во Солун, кога грчката полиција заплени огромно количество цигари и уапси тројца македонски граѓани.
Емил Зафировски
Македонските власти повеќе од два месеци молчат за разбивање шверцерски синџир во Солун, кога грчката полиција заплени огромно количество цигари и уапси тројца македонски граѓани.
Станува збор за скопјанецот Сашко Трпевски, познат како Трпе, и уште две лица со иницијали П. В и А. Р., кои откако ја примиле пратката од брод што допатувал од Египет ја сместиле во два камиони – контејнери за превоз на текстил.
Сопственоста на камионите се држи во тајност, како и сите други детали за случајот. Во МВР велат дека немаат информации затоа што имале слаба соработка со грчката полиција и дека за случајот било надлежно Министерството за надворешни работи. Во МНР потврдуваат дека станува збор за запленето големо количество шверцувани цигари, но велат дека немаат детални информации.
– Она што го знаеме во овој момент е дека лицата се уште се во притвор и дека против нив е поведена постапка од солунското јавно обвинителство. Очекуваме деновиве да воспоставиме врска со грчките власти и да добиеме попрецизни информации – изјави вчера Душко Узуновски, портпарол на МНР.
Тој вели дека надлежноста за случајот не е само во рацете на МНР.
– Ние сме надлежни за нашите уапсени државјани. Но, што се однесува до истрагата и деталите за шверцот надлежни се министерствата за внатрешни работи и за економија. МВР во делот на обврските за борба против организираниот криминал, а Министерството за економија за регистрација на фирмите – изјави Узуновски.
Од високи политички извори неофицијално дознаваме дека информациите за случајот се кријат затоа што во шверцот биле замешани „македонски бизнисмени со дебели врски во владејачките структури“. Според доброупатени извори, уапсените Македонци пред грчките власти ги навеле имињата на лицата што наводно го организирале шверцот на цигарите.
Во политичките и деловните кругови на големо се шпекулира со името на еден познат скопски бизнисмен, кој има силни семејни врски во владејачкиот СДСМ и во кабинетот на претседателот Бранко Црвеновски.
За овој бизнисмен се зборува дека најголем дел од капиталот му е изграден од шверц на цигари и тоа помогнат од владејачките гарнитури и на СДСМ и на ВМРО-ДПМНЕ. Во 1998 година, по поразот на парламентарните избори, тогашниот премиер Бранко Црвенковски, по покана на истиот бизнисмен, се одмораше на неговиот имот на хрватското приморје.
Името на овој бизнисмен се врзува и со аферата на шверц на познатите цигари од марката „монте карло“ чии застапници во земјава беа тој и уште еден роднина на најпознатиот тутунски бос Данчо Шутурков.
Истиот човек е поврзан и со аферата „вила на Водно“ од пред три години, чија изградба тогаш беше прекината откако се утврди дека сопственик е тогашниот премиер Љубчо Георгиевски.
Ова не е првпат грчките власти да запленуваат шверцувани цигари наменети за Македонија. Во март минатата година тие тврдеа дека заплениле 240.450 пакети цигари натоварени на брод и наменети за Македонија. Вредноста на шверцуваните цигари беше околу 5 милиони евра. Пратката била шверцувана од Египет, а во транспортните документи пишувало дека бродот пренесува мебел и текстилни покривки.
Во октомври таа година на царинскиот терминал во Солун беа откриени и запленети 8 милиони цигари, наменети за македонскиот црн пазар, вредни околу 850 илјади евра. Биле пронајдени во камион што според документацијата требало да тргне кон Македонија, соопштија тогаш грчките цариници.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Германија го суспендираше новиот извоз на воено оружје во Израел
Германија го суспендираше новиот извоз на оружје за Израел додека се справува со правните предизвици, според анализата на податоците на Ројтерс и извор близок до Министерството за економија.
Извор близок до министерството цитираше висок владин функционер дека работата за одобрување дозволи за извоз на оружје во Израел е стопирана поради правниот и политичкиот притисок од правните случаи кои тврдат дека таквиот извоз од Германија го прекршува хуманитарното право.
Министерството за економија соопшти дека нема и нема да има забрана за извоз на оружје во Израел, а одлуките се носат од случај до случај по внимателно разгледување, додавајќи дека меѓународното право, надворешната и безбедносната политика се клучни фактори во нивните оценки.
– Нема бојкот на германскиот извоз на оружје против Израел – изјави владиниот портпарол во средата, коментирајќи го извештајот.
Минатата година Германија одобри извоз на оружје за Израел во вредност од 326,5 милиони евра, вклучувајќи воена опрема и воено оружје, што е десеткратно зголемување во споредба со 2022 година, покажуваат податоците на Министерството за економија, кое одобрува извозни дозволи.
Но, годинава одобренијата паднаа, а од јануари до 21 август се дадени само 14,5 милиони евра, покажуваат податоците на Министерството за економија како одговор на пратеничко прашање.
Регион
Вархеји: Добра средба со Вучиќ за спроведување на следните чекори, планот за раст во полн ек
Европскиот комесар за соседска политика и проширување Оливер Вархеји денеска изјави дека имал добра средба со српскиот претседател Александар Вучиќ во Брисел за да ги подготви следните чекори во време кога се започнуваат „амбициозните реформи засновани на реформската агенда на Србија“.
Вархеји на социјалната мрежа Х оцени дека новиот План за раст на Западен Балкан вреден шест милијарди евра е во полн ек.
„На маргините на состанокот на лидерите од Западен Балкан, имав добар состанок со претседателот Александар Вучиќ за да ги подготвам следните чекори додека започнуваме амбициозни реформи врз основа на реформската агенда на Србија. Новиот план за раст од 6 милијарди евра е веќе во полн ек. Повеќе реформи, повеќе поддршка!“, рече Вархеји.
Свет
Фолксваген сака да укине до 30.000 работни места во Германија и да ги намали инвестициите
Производителот на автомобили Фолксваген сака да укине до 30.000 работни места во Германија и да ги намали инвестициите, објави германскиот деловен портал Менаџер.
Како што се наведува, поддржувачите на радикалните мерки во менаџментот на Фолксваген очекуваат бројот на работници да се намали од сегашните 130.000 за речиси една четвртина.
Се најавува дека и Фолксваген поради заштеди ќе ги намали инвестициите за речиси 20 милијарди евра, а можни се отпуштања и во одделот за истражување и развој, пренесува Bild.