Денес се одржа конститутивната седница на новиот состав на Советот на Општина Кисела Вода, на која беа верификувани мандатите на новоизбраните 27 советници. За претседателка на Советот е избрана Светлана Колариќ.

Во своето обраќање, Колариќ истакна дека изборот ја обврзува уште посилно да работи во интерес на граѓаните и да го унапреди демократскиот дијалог во рамки на Советот.

„За мене е чест повторно да свикувам и раководам со седниците, да се грижам за организацијата и работата на Советот и директно да учествувам во носењето на акти од чија имплементација зависи одвивањето на процесите во нашата заедница. Од овде испраќам јасна порака до вас и до граѓаните – Советот не е место за политички натпревари, туку за носење на цврсти и одговорни одлуки со кои го креираме нашето секојдневие и се грижиме за нашите сограѓани. Од нашите одлуки зависи дали ќе се изгради или реконструира градинка, училиште, спортски објект, културен или младински дом, дали ќе се прошируваат и подобруваат мрежите за водоснабдување и канализација, уличното осветлување, зеленилото и урбаниот соживот. Впрочем, тоа е суштината на локалната власт: да се реализираат конкретни проекти, да се донесат видливи резултати и домаќински да се користат буџетските средства. Секој од нас е гласот на својата заедница и токму во тоа е силата на децентрализацијата- одлуките да се носат во дослух со граѓаните и врз основа на нивните потреби“, изјави Колариќ.

На седницата се обрати и новата градоначалничка на Општина Кисела Вода, Бети Стаменкоска Трајкоска.

„Силно верувам дека од денес па во наредните четири години ќе бидеме обединети околу она што ни е заедничко, а тоа е интересот на граѓаните. Само така, со заедничка сила, со меѓусебна почит и конструктивна соработка, можеме да ја движиме нашата општина напред. Советот е срцето на локалната демократија, гласот на жителите од сите населби и населени места во Општина Кисела Вода. Вие сте нивниот глас, нивната енергија и нивната надеж дека решенијата се можни, ако сите се залагаме искрено и посветено. Како градоначалничка, мој приоритет ќе биде јасен, да ја реализирам програмата што ја ветивме, со целосен фокус на потребите на жителите. Верувам во партнерство, во дијалог и во заедништво. Нека оваа конститутивна седница биде симбол на нов почеток – почеток на соработка, разбирање и заемна поддршка. Да покажеме дека можеме да ги надминеме разликите и да се обединиме во целта – да ја направиме Кисела Вода место на кое секој ќе биде горд што живее. Ви посакувам успешна и плодна работа.Нека овој совет биде пример на зрелост, мудрост и визија. А јас, како ваша градоначалничка, ветувам дека ќе бидам отворена за секој предлог, подготвена за секоја соработка и посветена на секој граѓанин“, изјави Стаменкоска-Трајкоска.

Во новиот состав има 17 советници од коалицијата предводена од ВМРО-ДПМНЕ, 5 од Левица, 4 од СДСМ и 1 од партијата ЗНАМ. Советот брои 17 мажи и 10 жени, претставници на различни професии и генерации.

Градежните активности за изградба на болниците во Штип, Тетово и во Кичево ќе почнат до крајот на оваа или најдоцна на почетокот на следната година, најави денес министерот за здравство, Азир Алиу. Административните процедури, пак, кои претходат на градежните активности, ќе почнат веднаш по потпишување на договорот.

„205 милиони евра веќе ги најавивме, тие се за Штип, Тетово и за Кичево. Тие не се буџетски средства, туку ќе бидат средства од договорот влада со влада со Британците. Јас сè уште не сум потпишал договор. Чекавме да завршат изборите и потоа да се потпише договорот и да бидат дел од таа инфраструктура. Рековме дека ќе почнеме со инвестиции во инфраструктура и првиот чекор се овие три клиники. И Штип, и Тетово, и Кичево ќе бидат почнати. Административните процедури ќе почнат веднаш, а инфраструктурно, најверојатно, кон крајот на годината или на почетокот на следната година“, рече министерот Алиу.

Болницата во Кичево ќе се гради одново затоа што постојниот објект министерот Алиу вели дека не ги исполнува базичните инфраструктурни барања за да биде институција што ќе нуди здравствени услуги не само за Кичево туку за регионот.

На 26 јуни оваа година премиерот Христијан Мицкоски и министерот за здравство Азир Алиу најавија стратешки договор со Обединетото Кралство за обнова и изградба на болници во Штип, Тетово и во Кичево. Проектот предвидува довршување на клиничката болница во Штип, изградба на медицински факултет и студентски дом со 200 легла, изградба на целосно нова болница во Кичево и комплетна реконструкција и опремување на постојната болница во Тетово.

Министерот за здравство Азир Алиу денеска се обрати на четвртата годишна конференција за здравство во организација на Американската стопанска комора „Ам Чам“, која годинава е посветена на темата „Моќта на навремената акција за здравствен систем што испорачува“.

Во своето обраќање министерот Алиу се осврна на повеќе тековни проекти за зајакнување и унапредување на капацитетите во јавното здравство. Во рамките на панел-дискусијата со претставници од институциите, бизнис-секторот и пациентските организации се разговараше како од реактивен да се премине кон проактивен здравствен систем.

„Дијагнозата за нашиот систем е недостиг на основни податоци, нејасно дефинирани временски процеси и краткорочни приоритети. Затоа почнавме со изработка на десетгодишна национална стратегија за човечки капацитети, која ќе биде независна од дневната политика. Дополнително, во партнерство со Медицинскот факултет при УКИМ и факултетите за медицински науки во Тетово и Штип ги почнавме реформите на специјализациите и супспецијализациите со кои ќе се опфати редефинирање гранки, скратување дел од програмите и зајакнување на пошироките специјализации – интерна медицина и општа хирургија – за усогласување со реалните потреби на системот“, посочи министерот Алиу.

Тој го истакна и зајакнувањето на примарното здравство и превенцијата, со нови вработувања и постапка за набавка на 100 возила за итна медицинска помош, како и надградбата на дигиталната поддршка за пациентите преку „Мој термин“, „Мое здравје“ и подготовка на национални мрежи за радиологија и телемедицина. Посочи дека е во тек дигиталната трансформација и воведени се нови модули во „Мој термин“ за евиденција на прегледи од областа на медицинта на трудот и систем за евиденција и управување со барањата за листата на лекови, со која првпат се почнува со дигитализација на постапката за ставање нов лек на позитивна листа.

„Работиме на регионално планирање кадар и ресурси и на децентрализација на онколошката грижа во ГОБ ‘8 Септември’, Тетово и Битола, а во Гостивар веќе е ставена во функција нова хируршка сала за ортопедија и трауматологија. Од првиот ден воведов отворен кабинет и контакт-форма за директен дијалог со граѓаните, а во тек се консултации за пакет-измени и дополнувања на 12 закони за поквалитетни и подостапни услуги. Нашата цел е јасна и споделена – тоа е здравство што навреме испорачува квалитетни услуги, со пациентот во центарот“, заклучи министерот Алиу.