Регион
Во Пиреа пристигнаа 465 мигранти, по договорот на ЕУ со Турција
Во грчкото пристаниште Пиреа во саботата се примени 465 мигранти, соопшти крајбрежната стража, во очекување на почетокот на применувањето на договорот постигнат меѓу Европската унија и Турција, за враќање на барателите на азил кои во Грција пристигнуваат со чамци од турските брегови.
Мигрантите пристигнале на грчките острови по вообичаениот пат преку Егејското Море. Се очекува уште други 30 мигранти со траект да пристигнат од островите на грчкото копно подоцна во саботата попладне.
Агенцијата DPA истакнува дека истекува времето за ткн илегални имигранти во Турција, кои имаат намера да стигнат во ЕУ преку главната поморска рута. Во петокот ЕУ постигна договор со Турција со кој оваа земја треба да ги прими назад сите илегални имигранти, вклучително и Сиријци, а Унијата за возврат легално директно од Турција ќе пресели во своите земји соодветен број сириски бегалци.
Турција, исто така, ќе добие вкупно 6 милијарди евра помош до 2018 година, побрзо укинување на визите и забрзување на нејзините пристапни преговори со Брисел.
Договорот ќе почне да се применува од неделата, 20-ти март, и ќе важи за сите мигранти кои ќе пристигнат во Грција од таа дата, а во Турција ќе бидат вратени откако ќе бидат регистрирани и ќе им бидат обработени барањата за азил.
Не е јасно што ќе се случи со десетиците илјади мигранти кои веќе се наоѓаат во Грција. Во меѓувреме околу 4.000 луѓе се сместени во гимнастички сали и кампови во Пиреа, каде расте напнатоста, во справувањето на приливот на мигранти. Медиумите јавуваат за физички судири меѓу мигрантите од различни етнички припадности.
Илјадниците луѓе кои се заглавени на пограничниот премин кон Македонија кај Гевгелија, се разочарани и гневни и не сакаат да ги прифатат договорот меѓу ЕУ и Турција. Грчките власти, така, сега се соочуваат со нов предизвик, а медиумите известуваат дека задачата за враќање на мигрантите има „големи размери“. /крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
(Видео) Избрана е новата Влада на Србија
Собранието на Србија со 152 гласа ја изгласа новата Влада на премиерот Милош Вучевиќ. Два дена траеше расправата за составот на Владата и нејзиниот план за работа, при што опозицијата го оспори кредибилитетот на Вучевиќ, посочувајќи дека, како и досега, за секоја одлука ќе биде прашан претседателот на државата Александар Вучиќ.
Новата Влада на Србија брои 31 член, од кои една третина се нови имиња во споредба со претходната Влада на чело со Ана Брнабиќ.
Премиерот Вучевиќ претходно изјави дека длабоко верува во историскиот договор меѓу Србите и Бошњаците и рече дека сака добри односи и со Хрватите. Истовремено, тој рече дека нема да ги гради овие односи на штета на сопствените интереси и дека Србија нема да се откаже од традиционалните пријатели.
Посебно внимание предизвикаа двајцата министри кои се под санкции на САД: Александар Вулин ќе биде вицепремиер, а Ненад Поповиќ ќе биде министер без ресор.
Регион
Договорен текстoт на резолуцијата за Сребреница
Предлогот за резолуција за комеморација на геноцид врз Бошњаците од Сребреница, извршен во јули 1995 година, е договорен, а за него треба да се расправа на седницата на Генералното собрание на Обединетите нации, потврди амбасадорот на БиХ во ОН, Златко Лагумџија.
Лагумџија на социјалната мрежа „Икс“ објави дека процесот на усогласување на резолуцијата, чии формални предлагачи се Германија и Руанда, е завршен и испратен до претседателот на Генералното собрание на ОН, Денис Френсис, па нејзиниот текст ќе биде претставен до земјите членки. на светската организација, од која се очекува поддршка.
Резолуцијата повикува да се воспостави 11 јули како меѓународен ден на сеќавање на жртвите на геноцидот во Сребреница, уште еднаш се осудуваат сите дејствија со кои се величат сторителите на воени злосторства, злосторства против човештвото и геноцид утврдени со пресудите на меѓународните судови. Ја нагласува важноста од завршување на потрагата по останките на преостанатите жртви кои досега не се пронајдени и повикува на продолжување на гонењето на сторителите на геноцидот кои се уште се на слобода.
Резолуцијата има намера да ги повика сите држави целосно да ги почитуваат своите обврски од Конвенцијата за спречување и казнување на злосторството геноцид, да го почитуваат меѓународното обичајно право за спречување и казнување на геноцид и да ги почитуваат релевантните одлуки на Меѓународниот суд на Правдата (МСП).
Од генералниот секретар на ОН се бара да воспостави информативна програма наречена „Геноцид во Сребреница и Обединетите нации“, која треба да се спроведе пред следната година, кога се одбележува 30-годишнината од тоа злосторство.
Сите земји-членки на ОН, како и невладините организации и граѓанското општество, предлагачи на резолуцијата истовремено повикуваат на соодветни активности за комеморација и чест на жртвите на геноцидот во Сребреница во 1995 година.
Македонија е коспонзор на оваа резолуција.
Српскиот претседател Александар Вучиќ и лидерот на босанските Срби Милорад Додик инсистираат дека оваа резолуција е обид да се наметне колективна вина врз српскиот народ.
Регион
Tлото на Балканот се тресе: По Хрватска, земјотреси и во Албанија и Грција
Два земјотреси, во растојание од една минута – во 19.19 и 19.20 часот – вечерва се регистрирани на територијата на Албанија.
Земјотресите се со интензитет од 2,1 степен според Рихеровата скала.
Епицентарот на првиот земјотрес бил на седум километри од Елбасан, додека вториот на 62 километри од Тирана.
Според информациите на ЕМСЦ, неколку минути претходно, земјотрес од 2,5 степени имало и во јужниот дел од Грција, а уште два од 2 и 2,3 степени се регистрирани предмалку на Крит.
Претходно денес, Хрватска ја погоди силен земјотрес од 4,7 степени, а беше почувствуван и во Босна и Херцеговина. По овој потрес, следеа неколку помали.