Свет
Кинескиот потпретседател за задушувањето на сепаратизмот на Тибет
Кинескиот потпретседател Си Џинпинг во вторникот вети дека ќе го задуши сепаратизмот предводен од Далај лама, навестувајќи дека доколку стане претседател како што се очекува, ќе ја заостри политиката кон Тибет
Си Џинпинг кој најверојатно во 2013 година ќе стане претседател на Кина, својот став за Тибет го изнесе неколку дена по состанокот на американскиот претседател Барак Обама со тибетскиот духовен водач Далај лама, кој беше одржан и покрај жестокото спротиставување на Пекинг.„Мораме да се бориме против сите сепаратистички активности на група предводена од Далај лама, така што ќе се потпреме на сите етнички групи и целосно ќе го разбиеме секој заговор кој тежи кон дестабилизација на Тибет и го загрозува националното единство“, изјави кинескиот потпретседател. Си Џинпинг во вторникот зборуваше во Ласа, главниот град на автономната покраина Тибет, пред влезот во славната палата Потала, некогашното седиште на Далај лама.„Извонредниот развој на Тибет во последните 60 години ја покажува вистината којашто е невозможно да се побие: без кинеската Комунистичка партија не би имало ниту нова Кина ниту нов Рибет“, изјави Џинпинг по повод 60-годишнината од кинеското анектирање на Тибет, што во Пекинг се нарекува „мирно освојување“.Кина Далај лама го карактеризира како водач на насилниот сепаратизам. Далај лама кој од освојувањето на Тибет живее во егзил во Индија, добитник е на Нобеловата награда за мир поради заложбите за автономија на Тибет по мирен пат. Кина со строги мерки управува со Тибет од 1950 година, кога кинеската армија го освои овој регион на Хималаите. Последните седмици Пекинг ги заостри безбедносните мерки и им забрани влез на странските туристи на Тибет, превенирајќи можна дестабилизација по повод 90-годишнината од формирањето на Комунистичката партија на Кина.Последен пат масовни протести на Тибет избија во 2008 година кога официјално загинаа најмалку 19 лица, претежно припадници на народот Хан, мнозинската етничка група во цела Кина. Протибетските групации во странство тврдат, пак, дека во насилното задушување на протестите биле убиени најмалку 200 лица. Организациите за заштита на човековите права деновиве со големо внимание ја следат посетата на Џинпинг на Тибет, обидувајќи се да претпостават каква ќе биде политиката на Пекинг во иднина кој овој регион, Што е особено интересно, таткото на Џинпинг, Си Жонгсун поранешен заменик на кинескиот премиер лично го познава Далај лама. Тибетските претставници кои со него се состануваа во 1980-те забележаа дека Си Жонгсун го сочувал златниот часовник подарок од Далај лама. „Големо прашање е дали Си Џинпинг ќе покаже дека е татков син? Ќе покаже ли воопшто емпатија кон тибетскиот народ “, изјави Алисон Рејнолдс од Меѓународната мрежа за Тибет (International Tibet Network).
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Во стан на Американка пронајдени смрзнати тела на четири бебиња, нема да и се суди
Мајката на четири бебиња пронајдени во замрзнувач во стан во Бостон пред повеќе од една година нема да одговара. Последниот извештај покажува дека се уште има „многу неодговорени прашања“ за тоа што се случило со бебињата, пренесува Си-би-ес.
Окружниот обвинител на округот Сафолк рече дека не верува дека случајот против Алексис Алдамир може да оди на судење. Братот на Алдамир и неговата сопруга повикале полиција откако ги пронашле „замрзнатите“ бебиња на 17 ноември 2022 година, додека го чистеле станот во кој Алдамир живеела од 1982 година.
Истрагата покажала дека Алдамир е мајка на бебињата, две момчиња и две девојчиња, пронајдени во замрзнувачот. Алдамир сега живее во здравствена установа. Инспекторите тврдат дека за време на сослушувањето таа „изгледала збунето и не разбирала каде е и со кого разговара“.
Лекарот не можеше да утврди дали бебињата се родени живи или колку долго биле замрзнати, се вели во извештајот. Причината за смртта беше наведена како „неодредена“. Во извештајот се вели дека нема знаци на траума или очигледни повреди, а нема знаци на храна или млеко во стомакот на бебињата.
На сите четири бебиња сè уште им била прикачена папочната врвца. Бебињата биле пронајдени во кутии за чевли и биле завиткани во фолија. ДНК тестот го идентификуваше таткото на четирите деца, но тој починал во 2011 година. Инспекторите рекоа дека тој и Алдамир имале уште едно дете заедно, кое го дале на посвојување.
Алдамир работела за сметководствена фирма во Бостон од 1980 до октомври 2021 година, се вели во извештајот. Нејзините колеги ја опишаа пред инспекторите како „вредна работничка која ретко одела на одмор“.
„Тие рекоа и дека е покрупна жена која има склоност да носи широка облека без оглед на сезоната. Во ниту еден момент ниту еден од соработниците на Алдамир не знаел дека е бремена“, се вели во извештајот.
Окружниот обвинител на округот Сафолк, Кевин Хејден, ја нарече истрагата „една од најкомплексните, невообичаените и најзбунувачките што ги сретнал неговата канцеларија“. Објаснувајќи ја одлуката да не се обвини Алдамир, во извештајот се вели дека обвинителите не можеле да докажат дека бебињата биле живи и не верувале дека Алдамир е способна да издржи судење.
„Никогаш нема да знаеме точно каде и кога се родени четирите бебиња пронајдени во станот на Алексис Алдамир. Никогаш нема да знаеме дали четирите бебиња се родени живи, и никогаш нема да знаеме точно што се случило со нив. Никогаш нема да знаеме како Алексис Алдамир ја криела бременоста или зошто одбра да го направи тоа“, заклучи Хејден.
Свет
Израелските медиуми ги објавија трите барања на шефот на Хамас за ослободување на заложниците
Лидерот на палестинската исламистичка организација Хамас во Појасот Газа, Јехја ал Синвар, и понатаму има три барања во преговарачката понуда за договорот за заложниците, објавија медиумите.
Синвар сè уште бара загарантиран крај на војната, изјави синоќа за израелската телевизија Канал 12 извор близок до лидерот на Хамас. Израел тоа барање досега го отфрлуваше.
Синвар, наводно, сака писмена обврска за „безусловно прекинување на непријателствата“.
Според израелската телевизија, ал-Синвар побарал и Израел да не го спречува враќањето на Западниот Брег на палестинските затвореници кои треба да бидат ослободени во замена за заложниците земени од Израел.
Според последниот нацрт на договорот, Израел сака да ги испрати оние кои отслужуваат доживотна казна затвор во Појасот Газа или во странство.
Понатаму, лидерот на Хамас сака детали за материјалите што Израел нема да дозволи да бидат испорачани во Газа за реконструкција.
Според извештајот, во Израел се претпоставува дека Хамас нема да даде јасен негативен одговор на предлогот поради меѓународниот притисок. Египетските посредници, со поддршка на САД, во моментов се обидуваат да постигнат договор.
Милитантната исламистичка организација Хамас претходно објави дека повторно ќе испрати делегација во Египет за да ги заврши индиректните преговори со Израел за ослободување на заложниците и договор за прекин на огнот.
Египетската државна телевизија Ал-Кахира њуз објави дека делегација на Хамас треба да пристигне во Каиро во следните два дена за продолжување на преговорите.
Израелската влада најави дека во брзо време ќе започне офанзива во Рафах на југот на Појасот Газа, на границата со Египет, доколку не се постигне договор.
Европа
(Видео) Украинците објавија снимка: Го уништивме рускиот систем Бук, не можеа да го изгаснат пожарот
Украинските сили за специјални операции тврдат дека го уништиле лансерот на рускиот противвоздушен ракетен систем Бук на линијата на фронтот во регионот Суми.
Според извештаите, операторите во украинската единица забележале руски противвоздушен ракетен систем Бук-М1 додека изведувале борбени операции на фронтот.
Операторите потоа користеле нападни беспилотни летала за да ја нападнат целта. Русите неуспешно се обиделе да го изгаснат пожарот и да ја спасат својата опрема, тврдат Украинците. Тие споделија и видео на кое се гледа експлозијата и последователниот пожар.
Украинците наведуваат дека лансерот со шест проектили бил уништен со прецизен удар. Инаку, Украинците во вторникот пријавија и уништување на два Бука на истиот дел од бојното поле.