Свет
Според Бучковски, заклучоците на ревизорот се избрзани
Премиерот го отфрла ревизорскиот извештај за незаконско работење во Министерството за одбрана
Премиерот го отфрла ревизорскиот извештај за незаконско работење во Министерството за одбрана
Премиерот вели дека извештајот не бил лажен, туку тенденциозни биле заклучоците на медиумите
БОРИС ГЕОРГИЕВСКИ
Актуелниот премиер и ексминистер за одбрана, Владо Бучковски, го отфрли извештајот на државниот ревизор во кој беа наведени податоци за серија неправилности во Министерството за одбрана во последната година од неговиот мандат, а заклучоците во него ги оценува за избрзани.
"Државниот ревизор не упатува дека некој проневерил пари. Обвинувањата се претешки. Некој да обвините дека проневерил пари, тоа треба да го докажете. Од друга страна, може да се расправа дали процедурите се почитувани, а во краен случај, јас тврдам дека ниту еден денар не е ненаменски потрошен. Ние следиме како се одвиваат извештаите на државниот ревизор до оној момент кога ќе се во парламентарна процедура. Овој за 2004 година, не само за Министерството за одбрана, Министерството за надворешни работи, туку и за другите министерства ќе се најде пред пратениците. Потоа, согласно почитувањето на поделбата на власта, другите институции што сметаат дека има какво било основано сомневање дека некој ненаменски потрошил пари, тоа треба да се докаже. Во овој момент, според нашите укажувања и според она што го гледаме, нема такви злоупотреби", рече Бучковски.
Бучковски единствено се согласува со извештајот на ревизорот во делот во кој се спомнуваат огромните трошоци за патувања исплатени на туристичката агенција "Орфеј". Тие 300 илјади евра исплатени на "Орфеј" во 2004 година, според премиерот, не ги потрошиле тој и неговите соработници, туку новинарите, па затоа тој најавува дека би можеле да се прифатат дел од препораките што се однесуваат за начинот на кој се покриваат трошоците на дел од новинарите за време на службените патувања. "Мора да се регулира тој однос и ние се обидуваме да го регулираме тоа", изјави Бучковски.
Преостанатиот дел од извештајот премиерот де факто го отфрла, оценувајќи дека "било работено врз основа на начелото за одговорност, дека процедурите се докрај почитувани и оти нема ненаменско трошење на парите". Бучковски вели дека и бојадисувањето на касарните би можело да се подведе под државна тајна, како што било правено во периодот на неговото министерување. "Оцените дека под превезот на државна тајна се правени реконструкции на некои апартмани, се паушални. Нема такви апартмани. Во конкретниот случај станува збор за една хотелска соба каде што живееше тогашниот началник на Генералштабот, генералот Бојаџиев. Дури ако вулгаризираме, бојадисување на некоја касарна не дава можност кој било да учествува во такво нешто. И ако се следат сите други стапки, да не говорам поединечно, ќе се види дека нема ненаменско трошење на парите", објаснува премиерот.
Тој смета дека дел од заклучоците во извештајот на Државниот ревизор, кои, како што рече, и овој пат предизвикаа бурни реакции во јавноста, се избрзани, затоа што, според него, улогата на државниот ревизор не е да пресудува, туку да укажува и да дава препораки. "По дадените препораки за конкретната работа за Министерството за одбрана не се опфатени само 2004 и 2003 година, туку дел од препораките се однесуваат и на финансиското работење дури од 1992 година", вели Бучковски.
Според него, никој не може да тврди дека податоците се лажни, бидејќи, во краен случај, како што рече, ќе има расправа и во парламентот, кој го усвојува извештајот. "Можеме да спориме и затоа врз основа на препораките што ги дава државниот ревизор се преземени определени активности. Во Министерството за одбрана е останата само една нереализирана препорака, тоа е како ќе бидат регулирани односите помеѓу она што имавме како специјален статус на ‘Јасен’ и Министерството за одбрана. Сите други препораки се прифатени. Извештајот не е лажен, но тенденциозни се заклучоците што дел од медиумите ги изнесуваат. Во краен случај, јас прифаќам дека би требало да изградиме еден поинаков вид на култура и почитување на правото. Секој оној што се сомнева во спротивното, треба да го докаже и институциите кои се надлежни за тоа да ги расчистат сите овие случаи", рече Бучковски.
Државниот ревизор во извештајот за работата на Министерството за одбрана во 2004 година констатираше серија неправилности и незаконитости. Министерството ја избегнувало можноста да распишува јавни тендери, а со склучување договори во четири очи, на овој начин, на човек-фирми или на новоформирани фирми без бонитет им биле исплатени повеќе од 900 илјади евра. Исто така, исплатени се преку 50 милиони денари за договори за дело, издавани се објекти на МО за многу ниски цени, исплатени се речиси 35 милиони денари отштета за физичко лице, по основ на штета настаната од гранатирање на бачило во 2001 година, итн.
Ревизорот, сомневајќи се дека во случајот би можело да има елементи на кривична одговорност, извештајот го испрати и до Јавното обвинителство и до Антикорупциската комисија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Uncategorized
Иран воведе санкции кон САД и Велика Британија поради поддршката кон Израел
Иранските власти денеска објавија дека воведуваат санкции против неколку американски и британски поединци и субјекти поради нивната поддршка на Израел во војната против палестинското движење Хамас во Појасот Газа.
Иранската дипломатија соопшти дека санкциите се однесуваат на седум Американци, меѓу кои и генералот Брајан Фентон, шеф на командата за специјални операции и вицеадмиралот Бред Купер, поранешен шеф на американските поморски сили на Блискиот Исток.
Од британските функционери и субјекти цел на санкциите се министерот за одбрана Грант Шапс и британската кралска морнарица во Црвеното Море.
Санкции беа најавени и против американските компании „Локид Мартин“ и „Шеврон“ и британските компании „Елбит системс“, „Паркер Мегит“ и „Рафаел УК“.
Иранското Министерство за надворешни работи додаде дека санкциите вклучуваат „блокирање на сметки и трансакции во иранскиот финансиски и банкарски систем, блокирање на средства под јурисдикција на Иран, како и забрана за издавање визи и влез на иранска територија“.
Влијанието на овие мерки врз поединци или субјекти, како и врз можните средства или трансакции со Иран, сепак, останува неизвесно.
Од почетокот на војната во Појасот Газа, предизвикана на 7 октомври со нападот на палестинското исламистичко движење Хамас на израелска територија, нагло се зголемија тензиите меѓу Израел од една страна и Иран и неговите сојузници, особено либанскиот Хезболах, од друга.
Ситуацијата се вжешти на 13 април, кога Иран изврши напад врз Израел, со 350 беспилотни летала и проектили, од кои повеќето беа пресретнати со помош на САД и други земји.
Иранските власти тогаш објавија дека дејствувале во „самоодбрана“ по смртоносниот напад што му се припишува на Израел врз иранскиот конзулат во Дамаск на 1 април.
Свет
Нетанјаху: Ако Евреите не се заштитат самите, никој нема да ги заштити
Евреите мора да бидат способни да се „одбранат“ бидејќи никој нема да ги заштити, изјави денеска израелскиот премиер Бенјамин Нетанјаху, додека се повеќе се креваат гласови против војната што Израел ја води во Појасот Газа.
„Ако треба да се браниме, ќе се браниме. Ако е можно да се мобилизираат „оние што не се Евреи“, тоа е добро. Но, ако не се заштитиме, никој нема да го направи тоа“, рече Нетанјаху.
Премиерот ова го изјави на приемот на преживеаните од нацистичкиот геноцид кои во недела ќе учествуваат на церемонијата на Денот на сеќавањето на Холокаустот во меморијалниот центар Јад Вашем.
Разорната војна што Израел ја започна во Појасот Газа како одмазда за нападот на палестинското движење Хамас на 7 октомври во Израел предизвикува зголемени критики ширум светот.
Осврнувајќи се на студентското движење во знак на солидарност со Палестинците во градовите на американските колеџи, Нетанјаху рече дека ги осудува „страшните демонстрации на антисемитските орди кои повикуваат на уништување на Израел и ги напаѓаат еврејските студенти и професори“.
Нетанјаху, исто така, се соочува со отворено меѓународно противење на неговата намера да започне голема офанзива врз градот Рафах, во јужниот дел на Појасот Газа.
Тоа е засолниште за еден и пол милион Палестинци, од кои огромното мнозинство се раселени поради војната, додека израелските власти сметаат дека градот е последното упориште на борците на Хамас.
Свет
Трамп: Погледнете ги Лондон и Париз, тие се непрепознатливи
Поранешниот американски претседател Доналд Трамп изјави за време на предизборниот митинг во Висконсин дека Лондон и Париз се „непрепознатливи“, пренесува „Politico“.
„Видовме што се случи кога Европа ги отвори вратите за џихад. Погледнете го Париз, погледнете го Лондон. Тие се непрепознатливи“, рече Трамп, кој ќе се кандидира за нов мандат во Белата куќа на претседателските избори во ноември годинава.
„Ќе влезам во многу проблеми со луѓето во Париз и луѓето во Лондон, но знаете што, тоа е факт. Тие се непрепознатливи и не можеме да дозволиме тоа да и се случи на нашата земја. Имаме неверојатна култура, традиција. Не можеме да дозволиме тоа да се случи овде и никогаш нема да дозволам да им се случи на Соединетите Американски Држави“, рече тој.
Трамп често ги критикуваше европските земји. Во декември 2015 година, набргу откако Париз беше погоден од смртоносен исламистички терористички напад, тој рече дека населбите во Париз и Лондон се толку опасни што полицијата одбила да оди таму. Во тоа време, Трамп го бранеше својот план „целосно да им забрани на муслиманите да влезат во САД“.
И покрај тоа што беше критикуван за тие забелешки, Трамп продолжи да ја брани својата позиција. „Вистинскиот Париз е различен од Градот на светлината за кој читате. Има области во Париз каде луѓето се толку радикализирани и толку злобни, што полицијата одбива да оди таму. Тие нема да одат таму. Тоа ќе се случи на нашата земја“, предупреди тој.
Во јануари 2016 година тој изјави дека животот во Брисел е како да живееш во „пекол“ поради недостаток на „асимилација“ на муслиманското население.