Македонија
Затворени гласачките места, изборите мирни

Мирен изборен процес и гласање во демократска атмосфера, со мали нерегуларности, е првата оценка за претседателските и локалните избори одржани денес
Мирен изборен процес и гласање во демократска атмосфера, со мали нерегуларности, е првата оценка за претседателските и локалните избори одржани денеска во Македонија.
Најголем број од гласачките места се затворени во 19,00 часот, а излезноста е над 50 отсто од регистрираните вкупно 1.792.082 избирачи.
Според последните податоци што ги објави Државната изборна комисија (ДИК), одзивот до 17,00 часот изнесувал 48,7 проценти, и на претседателските и на локалните избори.
Во 2.557 избирачки места или 85,92 проценти од вкупниот број, гласале 788 илјади 147 гласачи на претседателските, и 780 илјади и 187 избирачи на локалните избори, соопшти ДИК на прес конференција, два часа пред затворањето на гласачките места.
Претседателот на ДИК Александар Новаковски оцени дека претседателските и локалните избори, освен мали исклучоци, се одвиваат во добра атмосфера и изрази надеж дека ќе заврши со истите оценки.
Вкупниот број на избирачки места што денеска не се отворија поради временските неприлики изнесува 134, или не гласале вкупно 12 илјади и 556 гласачи во Македонија.
Со одлука на Државната изборна комисијана овие 103 места гласањето ќе се одржи дополнително.
Набљудувачите на МОСТ, во текот на изборниот ден, регистрираа неколку нерегуларности и нарушување на изборниот процес, како агитирања пред избирачките места, делење на инструкции и притисоци врз граѓаните како да гласаат.
Претставникот на Европската унија (ЕУ) во Македонија Ерван Фуере даде позитивна оценка во текот на изборниот процес.
„Од она што до сега го видовме, изборите поминуваат во добра атмосфера и покрај лошите временски услови“, изјави денеска евроамбасадорот во Македонија, Ерван Фуере, кој ги посети кичевските и гостиварски села.
Претседателските кандидати, по гласањето, дадоа изјави во врска со нивните очекувања од претседателските избори.
“Денешните избори се многу важни за Македонија, очекувам да бидат слободни и мирни“, изјави претседателскиот кандидат Љубомир Фрчковски по гласањето во изборната единица во скопската населба Кисела Вода
“Очекувам фер и демократски избори затоа што од нив зависи европската иднина на Македонија“, посочи претседателскиот кандидат Ѓорѓе Иванов.
Според кандидатот за претседател Агрон Буџаку, очекува изборите да поминат во коректна атмосфера.
„Денеска е многу важен ден за Македонија, испит за македонската демократија. Убеден сум дека ќе го положиме овој испит“, рече претседателскиот кандидат Љубе Бошковски.
„Очекувам да се кандидирам во вториот круг од претседателските избори и да победам“, се очекувањата на претседателскиот кандидат Нано Ружин.
“Во Македонија ќе победи демократијата“, изјави претседателскиот кандидат на партијата Нова демократија, Имер Селмани.
Според кандидатката за претседател Мируше Хоџа, “изборите треба да поминат во фер и мирна атмосфера“./крај/ег/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
Арсовска го прозва Стојкоски: Аценце, ти направив 27 улици, ни фала не кажа и уште бегаш од дуел за хемиските фабрики

Градоначалничката на Скопје, Данела Арсовска, преку објава на својот профил на Фејсбук му се обрати на градоначалникот на општина Ѓорче Петров, Александар Стојкоски, со серија критики за неговото однесување и, како што тврди, неспособност да го признае придонесот на Град Скопје во реализацијата на инфраструктурни проекти.
„Ова е објава за читање за сите интелигентни и слободоумни граѓани, другите не читајте!“ – започнува Арсовска во својот пост, порачувајќи му директно на Стојкоски:
„Аценце, ти се обраќам да се потсетиш, како неспособната што спиела 3 години ти направи 27 улици во 5 населени места во Ѓорче Петров“.
Таа додава дека улиците биле изградени преку Јавното претпријатие „Улици и патишта Скопје“, без учество на општински средства, а Стојкоски само се појавил за да се слика, без притоа, како што вели, ни да се заблагодари.
„Ти ги направивме со скопското јавно претпријатие ‘Улици и патишта Скопје’, ти освен што се сликаше, не потроши ни денар, а не се ни заблагодари“, напиша Арсовска.
Во објавата, Арсовска повторно го повикува Стојкоски на ТВ дуел во врска со деталниот урбанистички план кој, според неа, овозможува изградба на хемиски фабрики и 31 висококатница во централното градско подрачје на Ѓорче Петров.
„Уште чекам да прифатиш ТВ дуел за ДУП-от кој го донесе за да се изградат хемиските фабрики и 31 висококатници сред Ѓорче Петров. Тоа што плаќате медиуми и партиски ботови да ве фалат, а другите да ги понижуваат, не значи дека сте во право!“, заврши градоначалничката.
Македонија
Има предлог за средба со Бугарија, треба Софија да се изјасни, рече Мицкоски

Премиерот Христијан Мицкоски денеска информираше дека е во тек комуникација со Канцеларијата на Европската комисија во земјава околу иницијативата за средба со бугарската страна, и дека веќе постои предлог-термин, за кој сè уште се чека потврда од официјална Софија.
„Имаме комуникација со канцеларијата на Европската комисија и вчера и денес, се уште немам повратен одговор. Има предлог термин, да почекаме да се изјаснат од бугарската страна“, рече Мицкоски на новинарско прашање дали стапил во контакт со претседателот на Советот на ЕУ Антонио Кошта и дали Бугарија ќе прифати ваква средба.
Паралелно со ова, претседателката Гордана Сиљановска Давкова вчера изјави дека иако вообичаено се одржуваат средби со хомолозите, таа нема проблем да разговара и со бугарскиот премиер Росен Жељазков на претстојниот Самит на НАТО во Хаг. Таа појасни дека нејзиниот бугарски колега, претседателот Румен Радев, нема да присуствува на Самитот, што отвора можност за разговор со Жељазков во насока на деблокирање на евроинтеграциите на Македонија.
„Јас за евентуална средба разговарав со господинот Антонио Кошта, негов беше предлогот. Во меѓувреме, јас не знам, ќе бидам таму ако ми е мене редот. Инаку, се знае, ред е да се разговара со хомологот, но еве нема проблем, меѓутоа не зависи од мене туку зависи од нашите соседи“, рече Сиљановска Давкова.
Македонија
ВМРО-ДПМНЕ: СДСМ грубо ја злоупотребува трагедијата во Кочани за политички поени

ВМРО-ДПМНЕ денеска реагираше на обвинувањата од страна на СДСМ во врска со истрагата за трагичниот пожар во Кочани, при што загинаа деца, обвинувајќи ја партијата дека прави „груба злоупотреба“ на трагедијата со цел собирање политички поени.
„СДС прави груба злоупотреба на трагедијата во Кочани со цел да добие политички поен плус. Обвинувањата на СДС дека институциите постапуваат под притисок на опозицијата се безочна лага,“ велат од ВМРО-ДПМНЕ во писмената реакција.
Од партијата нагласуваат дека институциите сега постапуваат професионално и неселективно, и дека во истрагата се опфатени над 60 лица, меѓу кои актуелни и поранешни функционери, градоначалници, бизнисмени, вработени во институции и членови на Министерството за внатрешни работи, а дел од нив се веќе во притвор.
„МВР и институциите на системот ги доставија сите потребни докази и информации до Јавното обвинителство уште пред еден месец. Обемната документација, со над 60 опфатени лица, е доказ за темелна и сеопфатна постапка“, стои во соопштението.
Од ВМРО-ДПМНЕ посочуваат дека постапувањето на институциите денес е спротивно на тоа што, според нив, се случувало во минатото за време на владеењето на СДСМ и Оливер Спасовски.
„Сега има одговорност за секој, без разлика кој е и од каде е. За разлика од МВР под Спасовски, каде што никој не одговараше за модуларната болница, Беса Транс или Ласкарци – случаи каде што имаше голем број жртви“, додаваат од ВМРО-ДПМНЕ.