Против лустрацијата се групираат одредени луѓе кои знаат дека со отворањето на процесот на лустрација ќе се чепне во нивните интереси, вели првиот лустратор Томе Аџиев во неделното интервју на Радио Слободна Европа.

„И покрај тоа што двајца членови на комисијата се повлекоа, во најава беше и трет, меѓутоа ете гледам се пишмани, Комисијата сепак го има законски предвидениот кворум да работи и ќе работи согласно законот. Во законот е предвидено дека Комисијата може да одлучува доколку на седница присуствуваат најмалку седум члена, а со повлекувањето на двајца остануваат деветмина, доволно комисијата да работи. А и секако во минатиот период тие неколку пати заминуваа па се враќаа, додека не го добија главниот сигнал да заминат“ , истакнува Аџиев во врска со повлекувањето на членовите од Комисијата, предложени од СДСМ.

Во врска со кривичната пријава против него, поднесена од СДСМ, Аџиев вели дека тоа за него е смешно.

„Мене ми е прво жал. Јас сепак досега сметав дека сите политички партии, вклучувајќи ја и таа партија, имаат добри експерти од политика, од економија и особено од право. За да подготвиш кривична пријава против некого, сепак треба да имаш познавање од законот, од кривичниот законик, да видиш кои законски одредби се предвидени за кривичното дело злоупотреба на службената положба, кој услов јас би требало да го исполнам, да направам злоупотреба, да се стекнам со противправна имотна корист или да направам некоја имотна корист или штета. Значи тие работи треба да ги знаат, а вака се истрчува некој, а особено професор по право на Правниот факултет. Тоа е повеќе од смешно. Очигледно е дека веројатно имаат и недостиг на кадри. Инаку јас повеќе години работев како адвокат и знам што значи злоупотреба на службена положба и како некој треба да темпира кривична пријава за тоа дело. Тоа е едно од најтешките дела, а особено за претседател кој е само еднаков како и сите други членови што не презема ништо на своја рака. Сè што се носи во Комисијата, го носи комисијата“, изјави претседателот на Комисијата за лустрација Томе Аџиев во интервјуто за Радио Слободна Европа. /крај/мф/рсе