Македонската Влада очекува ЕК да поднесе предлог за измена на визната регулатива до Советот на ЕУ, до крајот на јуни или почетокот на јули

Македонската Влада очекува ЕК да поднесе предлог за измена на визната регулатива до Советот на ЕУ, до крајот на чешкото или почетокот на шведското претседавање со ЕУ, односно крајот на јуни или почетокот на јули.

“Ова ќе значи иницирање на правна процедура за трансфер од црна на бела листа на државите кои ги исполниле условите за визна либерализација“, соопштија денеска извори во македонското Министерство за надворешни работи (МНР).

Според истите извори, ваквите очекувања се базираат врз извештајот на ЕК, од мај годинава, каде Македонија доби позитивни оценки за реформите во оваа област.

“Македонија има чисто досие, нема прашање што е проблематично“, посочуваат од МНР, и додаваат дека е важен “индивидуалниот, а не регионалниот пристап“.

Правно, предлогот од Советот на ЕУ треба да се испрати во Европскиот парламент (ЕП), а процедурата паралелно се одвива и во двете институции.

Парламентот доставува “мислење“, преку необврзувачка резолуција, по што предлогот се дава на усвојување на Советот на ЕУ за правда и внатрешни работи.

“Последниот состанок на Советот годинава е на 30 ноември и 1 декември, каде за измените на визното законодавство се одлучува со квалификувано мнозинство“, објаснуваат од МНР.

ЕК денеска, на иницијатива на Словенија, ќе ги информира земјите членки на ЕУ за подготвеноста на државите од Западен Балкан за укинување на визниот режим.

Според најавите, и шефовите на дипломатии на ЕУ, кон средината на јуни, ќе ја повикаат Комисијата што поскоро да подготви соодветна правна основа за промена на уредбата за визите, за да може ЕУ од први јануари 2010 да ги укине визите за оние земји од Западен Балкан, кои ги исполнуваат условите за тоа./крај/ис