Државата со сите свои капацитети да се справи со последните инциденти и да работи на смирување на состојбата, беше побарано да денешната седница на Комитетот за односи меѓу заедниците.

Државата со сите свои капацитети да се справи со последните инциденти и да работи на смирување на состојбата, беше побарано да денешната седница на Комитетот за односи меѓу заедниците.

Апелираа граѓаните да се воздржат од провокации и да работат на зачувување на, како што рекоа, традиционално добрите меѓурелигиски односи во Македонија.

„Сите ние треба да одиме кон смирување на ситуацијата и отстранување на инцидентите, колку и да се мали тие, но кои влијаат на меѓуетничките односи во Република Македонија. Мислам дека нашата порака е и понатаму во Струга да се сочува соживотот, како етничкиот, така и религискиот, да се почитуваат заедниците и во иднина да немаме инциденти од оваа природа“, рече градоначалникот на Струга Рамиз Мерко.

„За мене е апсолутно неприфатливо и изразувам остро противење на сите вандалски постапки, односно сквернавење на цркви во Октиси, Оровец и Лабуништа. Во оваа смисла, ставајќи се во целосно располагање на правната држава, повикуваме да се вложат натамошни напори за расветлување на овие настани како значаен предуслов за негување и развој на меѓуетничкиот и меѓуверскиот дијалог“, рече градоначалникот на Вевчани, Перо Илиевски.

„Имаме само едно место за живеење, едно заедничко место на живеење, а тоа е нашата вистинска цел, богоугодна цел – Република Македонија“, порача Валентина Божиновска, директор за Комисијата за односи меѓу верските заедници.

„Апелирам до сите да се воздржат од дејства или постапки коишто поттикнуваат омраза, бидејќи во спротивно ќе се зголеми продлабочувањето на поделбите и создавањето на тензии коишто никој од нас не ги посакува“, побара Народниот правобранител Иџет Мемети.

Од Македонската Православна Црква прашаа зошто нивни храмови се мета на вандали, во ситуација кога Вевчанскиот карневал, кој се наведува како причина за незадоволство, е пагански обичај. Од Исламската Верска Заедница, пак, се пожалија на маргинализација од страна на општеството.

„Православната вера не познава свештен обред и карневализација, па затоа и Вевчанскиот карневал нема ништо заедничко ниту со православието, ниту со празникот на Свети Василиј Велики, ниту со Јулијанската нова година. Карневалот е одлика и остаток од политеистичките религии и оттаму зачудува и поврзувањето со православната вера, особено со православната вера и посегнувањето по православните храмови“, рече  отец Благоја Ацески од МПЦ.

„Ова е само дел од проблемите и прашањата со коишто се соочува исламската верска заедница и нивното нерешавање ги спречува севкупните односи во земјата. Карневалот во Вевчани преставува само еден мал сегмент на сето ова што го зборувам, но таму се понижуваше најсветото нешто во исламот – Куранот“, рече Дритон Дикена од ИВЗ.

Пораки за смирување на ситуацијата стигнаа и од политичките преставници.„Ова се нови моменти, коишто се вештачки, коишто ги произведува кујната, а се знае тоа се државните институции, тоа е владата, влада којашто има перформанс на исклучително анти-албанска влада. Минатото покажува дека тука немаме меѓуконфесионални проблеми, туку албанскиот народ има проблеми со владите од минатото и актуелната влада. Значи немаме поделба со македонскиот народ. Ова треба да се потцртта со дебели линии“, рече Орхан Ибрахими од ДПА.

“Државата, како носител на инструментите на власта не треба да дозволи, било кој да е тој, да го подметнува пожарот на меѓунационална омраза, меѓурелигиска, меѓукултурна и било којо друг контекст и треба јако да напаѓа“, рече Џеват Адеми од ДУИ.

„Очекуваме и градоначалникот на Струга јавно и недвосмислено да се огради од настаните кои очигледно се негативна последица од протестот зад којшто отворено и тој застана. Меѓутоа, инцидентите и провокациите не смеат и не можат да се оправдаат со карневалските маски во Вевчани и со вербалните испади на спортските натпревари. Мислам дека сето тоа, ако го сфатиме, ако полесно го разбереме, тогаш овде ќе разговараме за некои порелаксирани теми“, рече Оливер Спасовски од СДСМ.

„Мислам дека изгубена битка е битката на сите оние којшто мислат дека меѓуетничките односи можат да направат во Република Македонија да се случуваат нешта којшто никој не ги посакуваме, уште помалку некој којшто мислат дека заради политички поени можат да направат провокации, тензии, вклучувајќи различни навреди на меѓуверска или меѓуетничка основа и тоа да им биде основ тие да се истакнат како бранители на сопствениот народ, сопствениот етникум или верска припадност“, порача Силвана Бонева од ВМРО-ДПМНЕ. /крај/ач