Првиот од петте ангиографски апарати кои ги набави Министерството за здравство, како дел од  проектот за набавка на нова медицинска опрема. денеска беше пуштен во функција на Клиниката за кардиологија.

„Пуштен е во употреба би рекол најклучниот апарат на клиниката за кардиологија“, рече денеска премиерот Никола Груевски и додаде дека еден од овие апарати ќе оди во охридската клиника, еден во Тетово а останатите два на скопската Клиника за кардиологија.

Премиерот Груевски информираше дека  во клиниките досега се распределени над 20 рентген апарати, 29 лабораториски анализатори и 27 ехо апарати кои веќе се пуштени во употреба.

Груевски додаде дека набавката која владата ја прави изнесува околу 68 милиони евра,  а со преостанатите отворени јавни набавки кои се во тек , инвестицијата во медицинска опрема ќе достигне цифра помеѓу 90 и 100 милиони евра.

Министерот за здравство Бујар Османи рече дека вредноста на овој ангиографски систем е околу милион евра, што како што рече тој, е можеби месечен буџет на една универзитетска клиника.

„Ова само ја потврдува нашата решеност да ги подобриме состојбите после  дводецениско запоставување на системот. Апаратот не само што ќе овозможи поголем број на услуги туку и зголемен квалитет на услуги. Ваков апарат нема ни во приватниот сектор.“, рече Османи.

Според него набавувањето на овој апарат ќе значи и стимулација на лекарите да останат во јавното здравство бидејќи имаат механизми да се надградуваат.

„Со ова ги демантираме сите апокалиптички сценарија кои најавуваат некаков колапс на здравството ,и всушност со ова, здравството добива нова свежина.

Како што кажа министерот Османи , до 20 декември се очекува да пристигнат  преостанатите апарати./крај/ми