„Дневник“

“Уставот пред ремонт“ е централна вест на насловната страница во која се наведува дека измените на уставот не може да се  прават само за парцијални одредби и без посериозна јавна расправа, како и без консултации со стручњаци од дадените области. Ова е мислењето што го пренесува весникот на повеќето консултирани експерти по предлогот од страна на Министерството за правда за измена на Уставот. Како што пишува „Дневник“, откако министерот за правда Михалјо Маневски побара од пратениците да почнат со измени на Уставот со што ќе се дополнат механизмите за справување со организираниот криминал, стручњаците се категорични дека ваквите измени мора да се проследени со сериозна стручна дебата. „Време“

Централно место во понеделничкото издание му отстапува на анализирањето на изјавите на лидерите на двата најголеми чинители во владејачката коалиција. Во текстот со наслов „Заедно во ЕУ или во амбис“ се цитира изјавата на Али Ахмети, дадена во Куманово на средба со граѓаните дека „или заедно ќе одиме во НАТО и ЕУ, или заедно ќе ја уништиме оваа земја“, при што се наведува дека лидерот на ДУИ не прецизирал дали „заедно“ се однесува на коалициониот партнер или воопшто на двете најголеми етнички заедници во земјата. Притоа авторот заклучува дека евро-интеграциите, а со тоа и иднината на земјата зависат од соработката меѓу Македонците и Албанците, и од тоа како ќе се одвиваат преговорите со Грција за уставното име на државата што е главен предуслов за отворање на вратите на НАТО и ЕУ.„Нова Македонија“

“Годината 2011-та по ништо нема да стане историска“ се наведува во насловниот текст. Членството во НАТО според весникот би бил единствениот настан што би добил некакво место во историјата, бидејќи од самото прогласување на независноста на државата нејзина стратешка цел се евроинтеграциите. Меѓутоа, како што се наведува во текстот, нема речиси никакви шанси годинава да биде забележана во историските учебници, иако политичките лидери од власта ја најавуваат како таква.  Иако се изразува мала веројатност 2011-та да биде историска, сепак се наведува дека таа ќе биде многу значајна заради одржувањето на пописот на населението, а и одржувањето на конгресот на владејачката ВМРО-ДПМНЕ, од која според авторот може да произлезат нови односи на политичката сцена и во владината гарнитура. „Утрински весник“

Во централниот текст под наслов “Власта пак му се нафрли на абортусот“, весникот ја проследува владината кампања за опасностите од абортусот. Тоа според авторот може да претставува и отворање сомнежи дека владата подготвува терен за негово забранување. Во текстот е поместена и изјава и на владиниот портпарол Мартин Мартиноски кој негира дека кампањата за абортусот треба да се гледа како евентуална подготовка за измени на Законот за абортус. Тој вели дека во прв ред оваа кампања под наслов „Избери живот“ е едукативна и  укажува на негативните последици од насилното прекинување на бременоста. Во написот и претставници на Министерството за здравство негираат дека во ресорот се подготвуваат измени на споменатиот закон.