Бакојани го обвини Груевски дека наместо конструктивност во разговорите за името, го разгорува фанатизмот кај сопствениот народ и го оддалечува од влез во ЕУ и НАТО. Во Македонија тоа се коментира како дел од грчката предизборна кампања во која ќе следат уште напади на темата – „спорот за името“

„Со своите големи свечени отворања и обидите за крадење туѓа историја, Владата на Груевски мисли дека може одново да ја напише историјата. Со ова, тие го туркаат народот на нашата соседна држава кон фанатизам и нетрпеливост, оддалечувајќи го на тој начин од неговата евроатлантска перспектива“, изјавила шефицата на грчката дипломатија Дора Бакојани.Според Бакојани, Грција им приоѓа на преговорите во еден „конструктивен дух“ со цел да се постигне заеднички прифатливо решение без победници и губитници.„Што се однесува до прашањето за Фиром, преговорите под покровителство на ОН влегуваат во нова фаза. Мора да направиме се што е во наша моќ за да постигнеме најдобар можен резултат“, изјави Бакојани.Таа порачала дека Грција ја има повлечено црвената линија, под која нема намера да попушти.„Нашата влада – владата на Костас Караманлис – успеа да издејствува Скопје да ја прими истава порака и од ЕУ и НАТО. Црвените линии коишто ние ги поставивме се неменливи, решение кое ќе се состои од сложено име со географска одредница и за универзална употреба, решение кое гарантира иднина исполнета со соработка меѓу народите и безбедност во нашиот регион“, изјавила Бакојани.