САД поседуваат „оперативна информација коишто ги наведуваат американските челници да заклучат дека руските воен авион погодил болница“ во воздушен напад во Сирија, соопшти во четвртокот Стејт департментот, откако претходно руската дипломатија од американската амбасада во Москва побара објаснување за материјалите коишто ги достави до руските и странските медиуми за наводни руски напади врз цивилни цели.

Речиси две седмици откако Русија на 30-ти септември ја започна воздушната кампања против Исламската држава во Сирија, а сириската армија започна да напредува ослободувајќи области кои беа под контрола на џихадистите, во западните медиуми започнаа извештаи од неформални цивилни организации за наводни руски напади врз цивилни цели кои досега не беа потврден со материјали или со сведоштва кои може да се проверат од независни извори.Организацијата Лекари без граници, чиишто лекари и пациенти беа убиени претходно во американско бомбардирање на нејзина болница во авганистанскиот град Кундуз, а минатата седмица од страна на Саудиска Арабија беше гаѓана и нејзина болница во Јемен, во четвртокот за Reuters соопштила дека во воздушните напади во северна Сирија биле погодени 12 болници, но не навела во кој период се случиле тие бомбардирања, ниту чии авиони го сториле тоа. Одговарајќи на новинарско прашање на прес-конференција во Стејт департментот, дали САД имаат докази дека сириски болници настрадале во руско бомбардирање, портпаролот на американската дипломатија Џон Кирби изјавил „Да, видовме некои информации кои нé наведоа на заклучокот дека руски воен авион погодил една болница“.„Видовме некои медиумски извештаи во таа смисла, тоа го потврдиле и некои сириски цивилни здруженија“, додал Кирби.Станува збор за опозициската ткн Сириска опсерваторија за човекови права (SOHR) чие седиште е во Лондон и се повикува на наводна мрежа активисти на теренот, претставена како невладина организација од почетокот на сирискиот конфликт во март 2011 година, којашто ја води Рами Абдулрахман, за кој руското министерство за надворешни работи уште од почетокот на сириската криза тврди дека е сопственик на сириски ресторан во британската престолнина со недооформено основно образование за да има компетенција да води ваква организација..„Ќе ви кажам дека поседуваме и друга оперативна информација која нé наведува на мислење дека руските напади не се насочени само против Исламската држава, туку предизвикале колатерална штета и некои цивилни жртви, а во нив се погодени и некои цивилни објекти“, додал Кирби без да прецизира.„Немам намера да ја објавам оваа оперативна информација… Имаме причина да веруваме дека тоа се случило“, одговорил портпаролот на американскиот Стејт департмент на инсистирање на новинарите присутни на брифинготПретходно во четвртокот портпаролката на руското министерство за надворешни работи Марија Захарова, на новинарите им соопшти дека Русија сака да добие појаснување од амбасадата на САД во Москва во врска со извештаите што американската дипломатска мисија ги лиферувала за наводни смртни случаи меѓу цивилното население како последица од руските воздушни удари во Сирија, истакнувајќи дека таквата активност на Вашингтон се случуваат токму пред одржувањето во петок во Виена на меѓународната средба за решавање на конфликтот во Сирија./крај/мф/сн

Извор: Макфакс