„Сметам дека е многу некоректно да давате класификации и дефиниции за тоа од каде е добиен тој процент на доверба и тоа го темелите врз основа на решените или нерешените предмети во извештајот“, се осврна Марија Митева, пратеничка од ВМРО-ДПМНЕ на денешната расправа во собраниската комисија на тема Извештај на ЕК за Македонија за 2023 година.

Митева појаснува дека не е важно било која страна да биде задоволна, туку е важно правдата да биде онаа која е задоволена.

Според неа „На 2% доверба во судството да се отвара прашањето лично и да се зборува дека не се знае како е дојдено до тоа и дополнително дека јавноста треба да биде посуштински навлезена во работењето на судовите е навреда, пред се кон граѓаните кои многу директно ги чувствуваат криминалот и корупцијата кои владеат во судството“.

Митева обраќајки се до Дамева од Судскиот совет укажа дека таа добро маневрира со говорот и зборовите со цел да не се фрли дамка врз судиите и тоа од причина што се смета дека така ќе се избегне реалната слика.

Како пример Митева го посочува случајот со одлуката на судијата Пајазит Пајазити кој определи куќен притвор кај роднина, нешто невидено до сега, а дискусија по однос на ова воопшто немаше и некако случајот се заобиколи.

,,Она што јавноста очекуваше од вас како Судски совет и требаше да се направи, не видовме таква дискусија која навлегуваше во суштината на оваа катастрофа”, и се обрати Митева на Дамева и додаде уште една небулоза, ,,Замислете Судскиот совет во сопствениот извештај за сопственото работење наведува препораки.”

Имено рече Митева, ,,изминатата година сте детектирале слабости самите на себе, сте си донеле извештај со кој си препорачувате што да направите и за истото тоа самите на себе сте донеле заклучок”, посочи Митева.

Годишниот Извештај за работата на судскиот совет на Република Македонија за 2023 година е разочарувачки, истакна пратеничката од ВМРО-ДПМНЕ Иванка Василевска на денешната собраниска Комисија за политички систем и односи меѓу заедниците.

Таа продолжи и додаде:

„Немаме доверба во судството, бидејќи тоа е партизирано, кронизирано. Политички спреги влијаат на развојот на каририте во судско обвинителскиот систем. Има луѓе кои се неправедно гонети, инструменти на прунуда кои наликуваат од тоталитарните системи наместно на она што би требало да биде и е дел од оценската мисија“, истакна Василевска.

Укажа дека треба да се почне со морална и етичка одговорност најнапред.

„Она што ние како нова власт во нашите зложби и оние професионалци кои беа консултирани не се само од Македонија туку и пошироко во регионот е укажувањето дека навистина спрегите кои се длабоко вкоренети во судско обвинителскиот систем и дефинитивно не можат да се ресетираат со еден удар бидејќи тоа е тоталитарен пристап но исто така може да почне со морална и етичка одговорност“, вели Василевска.

Денеска министерот за надворешни работи и надворешна трговија, Тимчо Муцунски, учествува на есенската сесија на Парламентарното собрание на Советот на Европа, која се одржува од 30 септември до 4 октомври 2024 година во Стразбур.

Во годината кога Советот на Европа одбележува 75 години од своето основање, Муцунски, на покана на претседателот на Парламентарното собрание, Теодорос Русопулос, се обрати пред парламентарните делегации на земјите членки на Организацијата. Обраќањето беше проследено со размена на прашања и одговори со пратениците. Во своето излагање, Муцунски се осврна на актуелните кризи и предизвици со кои се соочува европскиот континент, како што се руската воена агресија врз Украина, последиците од пандемијата, економската криза, демократското назадување, растот на екстремизмот и дезинформациите, трговијата со мигранти, како и влијанието на климатските промени и новите технологии. Притоа, тој ја истакна важноста на оваа организација и нејзините правни инструменти и мониторинг механизми за надминување на овие предизвици, со посебен акцент на нивното влијание врз човековите права, демократијата и владеењето на правото. Во овој контекст, ја нагласи улогата на Европскиот суд за човекови права во Стразбур и важноста на зајакнување на системот на Европската конвенција за човекови права, особено имплементацијата на неговите пресуди од страна на земјите членки.

„Следната година ќе одбележиме 30 години членство во Советот на Европа и 20 години откако Европскиот совет донесе одлука за доделување кандидатски статус на нашата земја за членство во ЕУ. Овој период беше време на несомнена трансформација, во кој соработката со Советот на Европа одигра значајна улога во спроведувањето на реформските процеси и исполнувањето на европските стандарди во клучните области. И покрај сите предизвици на патот кон членството во ЕУ, комплетирањето на проектот за европско интегрирање за нас е неминовно, а брзината на овој процес во голема мера зависи од предвидливоста и кредибилноста на ЕУ пристапниот процес“, нагласи министерот Муцунски во своето обраќање.

Говорејќи за процесот на евроинтеграција на земјата, Муцунски посочи дека тој сè уште е попречен од пречки кои изгледаат сè повеќе неправедни, додавајќи дека овој процес не само што ја тестира „отпорноста на институциите“, туку и „трпеливоста на народот“.

„Замислете го разочарувањето на една нација која направила сè што е побарано од неа, само за да ѝ се каже дека целта е сè уште недостижна. Како да се задржи надежта кога чувствувате дека самите принципи на Европската Унија – солидарност, правда и единство – се применуваат нерамноправно?“, истакна министерот во своето обраќање.

Тој додаде дека, и покрај долгиот процес на интеграција, владата останува посветена на темелните реформи и принципите врз кои се заснова членството во Унијата.

„Нема да дозволиме овие неправди да поттикнат евроскептицизам или да создадат наративи за жртвување. Наместо тоа, ќе продолжиме да се бориме за нашето заслужено место во Европа, водени од вербата дека правдата на крајот ќе победи. Патот можеби е долг, но ние остануваме посветени на вредностите што ги претставува Европа и ќе продолжиме да се залагаме за процес кој е праведен, транспарентен и заснован на меѓусебна почит“, заклучи министерот Муцунски.