„Макпетрол“ не е овластен да гради гасоводни системи, па според тоа Владата нема намера да се откаже од изградбата на гасоводниот прстен околу Скопје, договорена со руската фирма „Росњефтегазстрој“, изјави висок владин функционер, кој сакаше да остане анонимен.

„Макпетрол“ не е овластен да гради гасоводни системи, па според тоа Владата нема намера да се откаже од изградбата на гасоводниот прстен околу Скопје, договорена со руската фирма „Росњефтегазстрој“, изјави висок владин функционер, кој сакаше да остане анонимен.

„Макпетрол“ претходно ја обвини Владата дека работи недомаќински затоа што прифатила компензација на рускиот долг од 15 милиони евра со изградба на гасоводна обиколница, која не чини повеќе од 4 милиони евра. Фирмата уште тврдеше дека има готов проект за гасоводниот прстен, за кој веќе неколку месеци бара дозвола од Министерството за транспорт, но оттаму не добива никаков одговор.

– Намерите на Владата да компензира дел од рускиот долг немаат врска со проектот на „Макпетрол“. Владата преговара со руската страна за повеќе проекти за изградба на гасоводниот систем што вкупно ќе чинат 15 милиони долари, колкав што е и долгот – велат од кабинетот на премиерот.

Од „Макпетрол“ вчера не ја коментираа оваа изјава со образложение дека компанијата останува на ставот дека може да го изгради прстенот за помалку пари, а дека за тоа не може да добие дозвола од Владата.

Од кабинетот на премиерот се децидни дека „Макпетрол“ не може да ја добие дозвола за изградба на гасоводни проекти. Оттаму велат дека оваа компанија не е овластена да гради објекти за енергетски дејности.

– Според Законот за енергетика, „Макпетрол“ не само што не смее да гради гасовод, туку не смее да работи енергетски дејности што се поврзани со пренос и дистрибуција и трговија со природен гас. За таа цел Владата основа јавно претпријатие, па според тоа барањето на „Макпетрол“ е беспредметно.

Поради ваквиот став на Владата правниците на „Макпетрол“ најавуваат дека компанијата за дистрибуција на нафта планира да ја тужи државата.

Од кабинетот на премиерот велат дека се спремни да продолжат да преговараат со „Макпетрол“ за да се реши спорот за изградбата на гасоводниот систем. Тој систем веќе осум години практично е во владение на „Макпетрол“, кој го одржува и го користи. Владата и компанијата не можат да се договорат за заедничко владение, бидејќи и двете се сметаат за доминантни сопственици. Владиниот став е дека раководството на „Макпетрол“ не покажува спремност да најде компромисна позиција, што би било добро за успешни преговори. А. К. М.