Премиерот на Србија, Александар Вучиќ има дозвола од владата на Приштина да го посети Косово, изјави заменик премиерот и министер за надворешни работи на Косово, Хашим Тачи.

„Посетата на српскиот премиер се остварува со дозвола на косовски власти. Не е прва, ниту последна посета. Оваа посета доаѓа по посетата на косовски министри во Белград. Значи, речиси се нормални посетите меѓу двете земји. Се работи за посета од хуманитарен и верски карактер и ние се трудиме да ги зголемиме и интензивираме меѓусебните посети и не треба да се плашиме од комуникација“, изјави косовскиот вицепремиер Хашим Тачи.Тачи во понеделник во Тирана се сретна со шефот на албанската дипломатија, Дитмир Бушати. Тој изјави дека српскиот премиер има своја, а косовските власти нивна агенда, истакнувајќи дека не ја знае точно програмата на посетата на Вучиќ на Косово.„Сигурно има изјави кои нам не ни се допаѓаат, меѓутоа ние живееме во овој регион и треба да работиме да го надминеме минатото и да гледаме кон иднината“, рече Тачи.Вучиќ во вторник треба да отпатува на Косово, а ќе престојува во Грачаница, Косовско поморавје, Штрбац и Брезовица. Тачи во Тирана ќе разговара и со премиерот и претседател на Албанија, Еди Рама и Бујар Нишани и ќе биде прогласен за почесен доктор на науките на тамошниот Државен универзитет./крај/мф