Македонија
Груевски со владин тим во политичко-економска посета на САД и Канада
Владина делегација, предводена од премиерот Никола Груевски, од вторник ќе престојува во политичко-економска посета на Соединетите Американски Држави и Канада.
Во состав на владината делегација ќе бидат заменикот на претседател на Владата и министер за финансии, Зоран Ставревски, министерот за привлекување странски инвестиции, Бил Павлески и директорот на Дирекцијата за технолошко индустриски развојни зони, Виктор Мизо.
Во рамки на посетата, премиерот Груевски, ќе присуствува на Конвенцијата на Републиканската партија во пресрет на претседателските избори во САД, која ќе се одржи во градот Тампа.
Исто така, премиерот ќе присуствува и на Конвенцијата на Демократската партија за претстојните претседателски избори во САД која ќе се одржи во градот Шарлот.
Како што е најавено, Груевски ќе оствари и средби со претставници од двете политички партии.
Посебен аспект на посетата преставува економскиот дел, во рамки на кој владината делегација, предводена од премиерот Груевски, ќе присуствува и ќе се обрати на повеќе бизнис форуми на кои ќе бидат презентирани предностите кои Република Македонија ги нуди за странските инвеститори и поволностите кои се овозможуваат за отворање и водење бизнис.
Владината делегација ќе оствари и посета на неколку организации, и црковно-народни општини на македонската дијаспора во САД и Канада, каде ќе има и средби со раководствата на истите, како и организирани манифестации со македонските иселеници и лицата кои живеат во овие држави а се со потекло од Република Македонија.
Во Канада, владината делегација ќе присуствува на бизнис форум во градот Монтреал, кој е организиран во соработка со Советот за меѓународни односи на Монтреал и локалната бизнис комора. Премиерот Груевски ќе оствари посети и на неколку високообразовни институции, како и здравствени установи во Монтреал и ќе оствари средби со нивните раководства. Целта на овие посети е да се воспостават контакти за воспоставување на соработка во овие области.
Во Торонто, Канада, премиерот Груевски и владината делегација ќе ги претстават можностите за инвестиции во нашата земја на бизнис форум, кој е организиран во соработка со Центарот за инвестирање и трговија на Онтарио и Торонто. Претседателот на Владата ќе има средби и со значајниот Атлантскиот совет на Канада и раководството на истиот, а ќе оствари и посебна средба со Стив Роџерс, претседател на Асоцијација на производители на автомобилски делови на Торонто. Премиерот ќе присуствува и ќе се обрати на црковно-народниот собор на македонската дијаспора во црквата Свети Климент Охридски и ќе оствари средби со иселениците кои живеат во тој регион.
Во Виндзор, Канада, премиерот Груевски и владината делегација ќе остварат средби со македонските иселенички организации и ќе присуствуваат на организирана манифестација со македонската дијаспора.
Во Тампа, САД владината делегација ќе изврши презентација на инвестициските можности кои ги нуди Република Македонија, на организиран бизнис форум, во соработка со локалната трговска комора на градот. Премиерот Груевски ќе оствари средби и со повеќе менаџери на компании од областа на производствената индустрија. Владината делегација ќе присуствува и на Конвенцијата на Републиканската партија.
Во Мајами, САД, премиерот Никола Груевски ќе оствари посета на Големата трговска комора на Мајами и ќе има средба со раководниот менаџмент на Комората. Владината делегација потоа ќе се обрати на бизнис форум организиран од Комората. Претседателот на македонската влада ќе оствари средба и со градоначалникот на Мајами, Томас Регаладо. Владината делегација ќе оствари и средби со повеќе менаџерски тимови од компании од Мајами кои се заинтересирани за инвестиции во Европа.
Во Детроит, САД, премиерот Груевски и владината делегација ќе присуствуваат и ќе се обратат на Конвенцијата на Македонската православна црква во Детроит, и ќе остварат средби со македонските иселенички организации. Владината делегација ќе оствари средби и со претставници на повеќе компании, од областа на автомобилската индустрија, и производството.
Во Аталанта, САД, владината делегација и премиерот Груевски ќе ги претстават поволностите за инвестирање во Македонија на организиран бизнис форум, во соработка со трговската заедница на градот. Владината делегација ќе има и повеќе средби со претставници на компании потенцијални инвеститори во нашата земја. Премиерот и министрите ќе остварат и посети на повеќе индустриски капацитети во градот и ќе има средби со раководствата на компаниите.
Во Шарлот, САД, покрај присуството на Конвенцијата на Демократската партија, владината делегација ќе оствари средба и со раководството на Националниот демократски институт, и ќе има средби со претставници на повеќе компании од градот.
Во рамки на економскиот дел на посетата владината делегација ќе извршат презентации пред претставници на повеќе од 300 американски и канадски компании, и ќе има директни средби со менаџерските тимови на над 50 потенцијални инвеститори, со што ќе се оствари можност за дополнително лобирање на компаниите од северна Америка за реализирање на инвестиции во Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„14 пратеници“, обзнанија Таравари и Хасани: Коалицијата „Вреди“ добила пратеник повеќе во однос на Европскиот фронт по прегласувањето
По прегласувањето на избирачко место во Општина Желино, кое е во рамки на изборната единица 6, според претставникот на „Вреди“, Башким Хасани, коалицијата „Вреди“ добила близу 500 гласа, а за „Европскиот фронт“ гласале 48 избирачи.
Коалицијата „Вреди“ доби еден пратеник повеќе за сметка на пратеник на „Европскиот фронт“ со прегласувањето во шестата изборна единица, изјави Хасани.
„Кога се гласа без притисоци, без кражби и без многу манипулации резултатот е тој, или во случајов, коалицијата ‘Вреди’ го добива 14 пратеник“, рече претставникот на коалицијата „Вреди“.
Според податоците на Државната изборна комисија (ДИК) за излезеноста на седумте избирачки места на кои денеска имаше прегласување за парламентарните избори, на избирачкото место во Општина Желино, едиствено на кое се прегласува во шестата изборна единица, до 18:30 часот гласале вкупно 546 избирачи.
Претставниците на Коалицијата „Вреди“ Арбен Таравари и Башким Хасани на социјалните мрежи го напишаа бројот 14 со што алудираат на уште еден пратеник во коалицијата.
Коалицијата „Вреди“ на парламентарните избори на 8 мај, имаше 13 пратеника, а коалицијата „Европски фронт“ предводена од ДУИ доби 19 пратенички мандати.
Македонија
55,10 проценти била излезноста, на половина час пред затворањето на гласачките места соопшти ДИК
Од вкупно запишани 4.514 гласачи на седумте избирачките места на кои се прегласува за Парламентарните избори, до 18.30 чaсот гласале 2.487, односно 55,10 отсто, соопшти Државната изборна комисија
Во ИМ 2101 во Желино гласале 546 гласачи односно 54,98%.
Во ИМ 1194 во Крушево, гласале 325 гласачи односно 69,30%.
Во ИМ 1202 во Крушево, гласале 99 гласачи односно 33,22%.
Во ИМ 1272 во Охрид, гласале 356 гласачи односно 50,07%.
Во ИМ 1470 во Долнени, гласале 365гласачи односно 55,47%.
Во ИМ 1470/1 во Долнени, гласале 324 гласачи односно 51,27%.
Во ИМ 1844 во Струга, гласале 472 гласачи односно 62,68%.
Во споредба со гласањето на 8 мај 2024, до 18:30 часот, на ова прегласување била забележана зголемена излезеност за 1,08% на овие избирачки места.
Македонија
Левица: Осквернавено срцето со македонското знаме во Гостивар
Пред неколку дена, по повод Денот на македонското знаме, 15 мај, како и по повод 24 Мај – празникот на сесловенските просветители, браќата Кирил и Методиј, срцето од натписот со името на градот Гостивар беше симболично променето во македонското знаме со букви на глаголично и кирилично писмо, се истакнува во реакцијата на Левица.
„Но, за жал, можеби, и очекувано во ситуација на континуирана необалистичка реторика од страна на политичките партии од страна на т.н „албанскиот блок“, срцето на кое во понеделникот беа насликани македонското знаме и букви од кирилицата и глаголицата е осквернавено со илустрации и графити кои се со екстремно навредлива содржина.
Сквернавење кое, дури и да не е извршено од нив, претставува директна последица на големоалбанската и антимакедонската пракса, на целосно непочитување на државните македонски инсигнии (Знаме, Грб и Химна), како и глорификација на инсигниите на фашистичката творба – Голема Албанија која е практикувана од страна на т.н. „албанската“ политичка елита“, велат од оваа партија.
Ја потсетуваат јавноста дека политичката партија Левица во својата програма се залага за: воведување на Државен инспекторат за инсигнии кој ќе биде надлежен за контрола и надзор над правилната употреба на државните симболи (грбот, знамето и химната) од страна на државните органи, општините и приватните субјекти.