Најмалку 22 луѓе се убиени во нападот на вооружени бунтовници врз хотелот „Radisson Bleu“ во малиската престолнина Бамако, соопштија во петокот вечерта извори од безбедносните структури на оваа африканска земја.

Претходно малиски функционери изјавија дека во хотелот се убиени и заложници и напаѓачи, и оти биле пронајдени 18 тела, но мировниците на ОН пренесуваат дека виделе 27 тела на два ката од луксузниот хотел „Radisson Blue“ во центарот на Бамако.Напаѓачите, чиј број засега не е точно утврден, упаднале во хотелот вооружени со автоматски пушки, а акцијата ја извеле со повиците на арапски јазик „Алаху Акбар“ (Господ е голем). Исламистите биле забарикадирани на седмиот кат од хотелот кој вкупно има 190 соби, рекле очевидци и безбедносни извори.Освен вработените и некои гости Малијци, во моментот на нападот биле гости од осум држави, Аалжир, Германија, Белгија, Кина, Франција, Индија, Турција и САД.Во петокот претпладнето, во центарот на главниот град Мали, поранешна француска колонија, точно една седмица по масакрот во Париз, вооружени напаѓачи го заземаа хотелот земајќи во заложништво 140 гости и 30 вработени во хотелот кој е многу популарен меѓу странците кои престојуваат во Бамако. Одговорноста за нападот ја презема екстремната исламистичка група Ал Мурабитун, којашто е основана од бараниот алжирски терорист Моктар Белмоктар и е составена од Туарези и Арапи. Според некои извори, оваа група ѝ изразила лојалност на екстремната сунитска група Исламска држава, а според други, пак, дејствува како една од африканските ќелии на Ал Каеда.Групата Ал Мурабитун беше вклучена во нападот од јануари 2013 година врз нафтениот комплекс Ин-Аменас во Алжир, кога беа убиени околу 40 цивили. Во март годинава ја презема одговорноста и за нападот врз ресторанот „La Terass“ во Бамако, кога беа убиени пет луѓе.Малискиот функционер Амаду Сањо потврди доцна попладнето дека вооружените припадници на исламистичката група повеќе не држат заложници во хотелот. „Тие луѓе го преземаа цивилните власти“, изјави Сањо по акцијата на малиските командоси во хотелот преземена за ослободување на преостанатите заложници.Во хотелот кој е во американска сопственост повеќето од гостите биле странци, а во текот на првата акција, кога беа ослободени 80 заложници, тројца беа убиени. Меѓу нив и Жефри Дједуне, член на парламентот на белгискиот регион Валона.Помош во акцијата за ослободување дале и американските специјални сили, а на место од кризата беа упатени и француските командоси кои се присутни во земјата. „Осумнаесет тела се пронајдени“, изјави за AFP странски безбедносен извор, додека малиски воен извор рекол дека се „убиени двајца терористи“.Припадниците на мировните сили на ОН виделе околу 27 тела на два ката од хотелот, изјавил за Reuters функционер на светската организација. Дванаесет тела имало во подрумот а петнаесет на вториот кат, рекол овој неименуван функционер.Во 2012 година во Мали избувна вооружен конфликт меѓу владините сили и исламистичките милитанти во северот на земјата во голема мера предизвикани од влошување на ситуацијата во соседна Либија.Брзото напредување на екстремистите коишто го заземаа речиси целиот север на земјата и се закануваа со заземање на престолнината Бамако, беше спречено со интервенција на Франција која испрати свои сили и со распоредувањето на мултинационалните африкански сили во Африка, по што следеше и распоредување на мисија за стабилизација на Мали на ОН – МИНУСМА.Од крајот на минатата година екстремистичките формации во северно Мали, вклучително и Движењето за единство и џихад во Западна Африка, повторно започнаа со засилени активности и повремено ги напаѓаат, како владините сили така и мировниците на ОН.Кон крајот на октомври, владините сили на Мали започнаа со голеам операција против исламистите, која треба според најавите да трае следните три месеца./крај/мф/сн

Извор: Макфакс