Високи функционери од 195 земји и региони во светот го прифатија во саботата на конференцијата на Обединетите нации за климата, нацртот од глобалниот договор за справување со климатските промени како основен документ за министрите за заштита на природната средина, кои следната седмица ќе се обидат да ги разрешат стотиците спорни точки.

„Овој текст ја одразува волјата на сите за постигнување на договорот. Не сме на крајот од патот, главните политички прашања допрва треба да се разрешат и за тоа ќе ни биде потребна сета наша енергија, разумот, способноста да погледнеме далеку напред и волја за компромиси“, изјави француската претставничка за прашањата на климата Лоренс Тубиана, пренесе AFP.

Документот кој е прифатен по една седмица дискусии меѓу преговарачите има 48 страници и обилува со повеќекратни опции , со коишто ќе се занимаваат министрите до следниот петок за да го договорат конечниот глобално обврзувачки договор, оценува Reuters.

Во усвоениот нацрт договор се изнесени многу опции, од долгорочните цело за воспоставување на климатските промени предизвикани од гасовите кои го создаваат ефектот на стаклената градина до поголема финансиска потпора за земјите во развој. Многу земји сметаат дека тој текст, резултат на четиригодишните напор откако овој процес започна во 2011 година во Дурбан, има премногу неразјаснети прашања.

„Меѓутоа, како што рече Нелсон Мандела, сé изгледа невозможно додека не се оствари“, коментираше Нозифо Мексакат-Дисеко, јужноафриканскиот претставник кој претседава со групата земји во развој Г77+Кина.

Светските челници на собирот во Париз се обидуваат да ги договорат намалувањата на емисиите на штетните гасови, кои се главни виновници за ефектот на стаклената градина и последично на тоа затоплувањето на планетата со катастрофални последици како што се топењето на ледници, зголемување на нивото на морињата, поплави, суши, загрозување на безбедноста на храната и достапноста до вода за пиење.

Генералниот секретар на ОН, Бан Ки-мун пред самитот ги повика светските челници што поскоро да ја донесат и да почнат да ја спроведуваат акцијата за сопирањето на глобалното загревање на ниво помало до 2 Целзиусови степени во однос на температурата во прединдустрискиот период, што е лимит за кој експертите велата дека поможе да ги спречи најголемите последици. „Париз мора да биде решавачката пресвртница“, порача челникот на светската организација.

Научниците повторно предупредија дека веќе со зголемувањето на глобалната температура за 1 Целзиусов степен, последиците од затоплувањето на планетата и тоа како се чувствуваат: сушите, поплавите, разорните циклони и торнадата, како и исчезнувањето на коралните гребени. Меѓутоа, плус 2 Целзиусови степени особено ќе се одразат на нивото на океаните и нивата зголемена киселост, тврдат научниците и предупредуваат дека тоа за многу островски држави претставува прашање на опстанокот.

Последниот обид да се постигне глобален договор, во данската престолнина во 2009 година, заврши го распад и хаос, кога активистите разочарани тврдеа дека е пропуштена голема можност Копенхаген да остане во сеќавањето како „Надежхаген“./крај/мф/сн

Извор: Reuters/AFP