Високиот претставник на Европската унија (ЕУ) Жозеп Борел ќе приреди работен ручек за шестмина лидери од Западен Балкан следниот четврток во Њујорк, на маргините на Генералното собрание на Обединетите нации, објавено е денеска на веб-страницата на ЕУ, пренесуваат медиумите во регионот.

Во соопштението се наведува дека висока делегација на Европската комисија ќе учествува на 79. сесија на Генералното собрание на ОН следната недела во Њујорк, а фокусот на ангажманот на ЕУ ќе биде ставен на решавање на низа невидени конфликти и кризи околу светот.

Делегацијата на ЕУ ќе ја сочинуваат претседателката на Европската комисија Урсула фон дер Лајен, извршната потпретседателка Маргарет Вестагер, високиот претставник Борел, потпретседателката Дубравка Шуица, како и комесарите Стела Киријакидес, Дидије Рејндерс, Илва Јохансон, Јанез Ленарчич, Јута Урпилаинен, Кадри Симсон и Вопке Хокестра.

Пред Вишиот суд во Белград денеска продолжи судењето за масакрот на Коста Кецмановиќ.

Денеска, сведочеа родителите на повреденото момче Ј. Д.

Солзи кај присутните по сведочењето на родителите на момчето, пренесуваат медиумите во соседството.

„Син ми ми се јави во 8.45 часот да ми каже дека е ранет. Бев од другата страна на градот и трчав кон училиштето“, рекол таткото. Потоа раскажувал за агонијата додека го барал синот од училиштето, каде што биле присутни полицијата и итната помош.

Во сведочењето тој кажал што му кажало детето за Коста Кецмановиќ.

„Ништо не ми кажа во болница бидејќи околу него имаше полиција и форензичари. Кога излезе по три дена, ми рече: „Тато, имаше црвени очи, очи на ѓавол“. Тој го погодил со еден куршум, а другиот поминал покрај него кон вратата додека тој трчал да излезе и да се спаси. Прескокнувал мртви и раскрвавени деца. Буквално ги повлекол тие двајца пријатели што трчале по него“, раскажал Небојша, таткото на ранетото момче.

Таткото на ранетото момче сведочеше дека нивниот живот се променил по масакрот, во кој неговиот син беше застрелан во бутот.

Момчето ретко зборува за масакрот, а според сведочењето на неговите родители, сè уште има изразени последици и дека постојано оди на психотерапија и зема лекови.

„Се грчи и скока на сè. На почетокот беше неподносливо и страшно. Секој ненадеен звук го прекинуваше, а во јавниот превоз се случува кога свети и се гаси светлото, тој се откачува и ме вика мене и мајка му за да праша што да прави. Го смируваме, но веќе не е тоа дете, детството му е уништено“, изјави Небојша.

Мајката зборувала многу тивко и била ужасно депресивна и тешко ги потиснувала своите емоции, според написите на тамошните медиуми.

„Тој ден бев на училиште, работам во тоа училиште и ја познавам генерацијата на мојот син затоа што бев учителка и на нивната генерација“, изјавила вознемирената мајка на момчето, Будимка Димитриевиќ. Таа раскажала како тој ден дознала за масакрот и дека нејзиното дете е рането.

„Дојде колега и ја отвори вратата од училницата и рече излези, излези, има пукање во училиштето. Бргу заминавме и по некое време, син ми дојде до мене и ми рече: „Мамо, ме погодија“. Децата го опколија. Ја видов раната и цело време доаѓаа информации за загинати и повредени. Учениците плачеа. Го барав мојот постар син, а Јован постојано повторуваше дека е ранет. Му реков: „Добро е, жив си, но Михајло, кој беше осмо одделение во истото училиште, го нема. За еден час се јави и тој. Не видов кога Јован го однесоа со брзата помош“, раскажала мајката.

Судскиот спор, според написите, ќе трае до средината на декември кога треба да биде завршено вештачењето на ранетото момче, како и на извршителот на стравотниот масакр.

Сопругата на Сергеј Трифуновиќ, Исидора проговори за неодамнешниот случај на српскиот актер. Таа во интервју за ТВ Блиц изјави дека актерот е осуден на една година затвор условно и дека мора да ја напушти Хрватска до 22 септември.

„Сергеј е казнет за меме фотографија, тој не е автор на таа фотографија, тој е дистрибутер. Фотографијата е спорна. Овој случај нема врска со оној од минатата година во Сплит. Сергеј тогаш беше осуден и плати. Имајќи предвид дека тој не беше на територијата на Република Хрватска кога ја сподели таа фотографија, не ни е јасно дали важат хрватските закони“, изјави Исидора.

„Нему му е забранет влез во Хрватска на три месеци. Тој мора да ја напушти Хрватска до 22 септември“, додаде таа, а потоа раскажа како таа и Сергеј го поминале времето во Хрватска откако тој бил ослободен.

„Одморивме, прошетавме, тој е разочаран поради начинот на кој го третираа. Не се чувствува добро за околностите. Моите родители живеат во Хрватска, никој не ни гарантира што ќе биде следниот пат ако решиме заедно да ги посетиме“, заклучи Исидора.

Сергеј Трифуновиќ беше уапсен во вторник околу полноќ на граничниот премин Бајаково додека преминувал од Србија кон Хрватска. Потоа бил спроведен во Општинскиот суд за прекршоци во Сплит. Трифуновиќ пред судот изјави дека не се чувствува виновен за она за што е обвинет.