Милијардерот Доналд Трамп стана фактички кандидат на Републиканската партија за американските претседателски избори во ноември, откако единствениот негов сериозен ривал за партиската номинација сенаторот на сојузната држава Тексас, Тед Круз, по поразот во Индијана се повлече од трката. Кај Демократската партија, сенаторот на Вермонт, Берни Сандерс неочекувано на партиските предизбори во Индијана ја победи поранешната државна секретарка Хилари Клинтон, но сепак силно заостанува зад неа.

Номинацијата на Трамп е случај без преседан во современата историја на САД. Претприемачот познат по своите контроверзни изјави и однесување, на политичката сцена се појави пред само десет месеци. Меѓутоа, успеа да го мобилизира електоратот на Републиканската партија, ветувајќи дека ќе ги врати загубените работни места, угледот и влијанието на земјата и оти „повторно Америка ќе ја направиме голема“.

Трамп сосема неочекувано победи десетина противкандидати, меѓу кои и највлијателните политичари од Републиканската партија. Покрај тоа, магнатот на патот до номинацијата успеа да се справи и со жестокиот отпор од партиската елита и водството, и е многу блиску до рекорд во освојувањето на гласовите од избирачите на предизборите на партијата.

Доналд Трамп во Индијана освои повеќе од половината, околу 53 отсто, од гласовите на републиканските гласачи, Тед Круз освои 37 отсто, а третиот кандидат, гувернерот на сојузната држава Охајо, Џон Кејсик заостана далеку зад двајцата. Со оваа победа Трамп практично си ја обезбеди номинацијата на Републиканската партија, чија национална конвенција ќе се одржи на крајот од јуни во Кливленд, во трката за претседател на САД.

Откако пристигнаа резултатите од изборите и се покажа дека загубил во Индијана, конзервативниот сенатор Тед Круз објави дека ја прекинува својата кампања. „Од почетокот велев дека ќе продолжам со борбата сé додека постои можноста за победа. Вечерва, за жал, се покажа дека таа можност е затворена. Дадовме сé од себе во Индијана, но избирачите избраа поинаков пат“, изјави Круз пред разочараните приврзаници.

Со тоа на Трамп ширум му се отворени портите да го обезбеди потребното мнозинство од 1.237 делегати. Единствениот противни му е Кејсик, кој нема да се повлече од трката иако далеку заостанува зад Трамп. Но, неговата единствена надеж е некако да го спречи Трамп, кој во моментов има обезбедено гласови на 1.041 делегат, во освојувањето на потребните 1.237, па во ткн „отворена конвенција“ да се обиде да го победи на гласањето на париската конвенција.

Во таквиот расплет, меѓутоа, не веруваат во таборот на Трамп, од каде што најавија дека ќе продолжат со силната кампања за да ги обезбедат победите и на следните предизбори во државите Небраска и Западна Вирџинија.

Самиот Трамп по победата им се обрати на приврзаниците во Њујорк, велејќи дека тоа биле „неверојатни ден, вечер и година“ и порача дека заедно „повторно ќе ја направат Америка голема“. Го пофали, исто така, Круз како „тежок противник“ и му предвиде блескава иднина, иако самиот до пред неколку часови го наречуваше „лажливиот Тед“ и го обвинуваше неговиот татко дека бил поврзан со атентаторот на убиениот американски претседател Џон Кенеди. На крајот порача дека сега сака да ги обедини републиканците за да го победат претседателскиот кандидат на демократите.

Во Демократската партија во трката за претседателската номинација, во Индијана тесно победи Берни Сандерс. Според CNN, по пребројувањето на 74 отсто од гласовите, Сандерс освоил 53 отсто од делегатите во оваа држава, додека Хилари Клинтон – 47 отсто.

Но без разлика на тоа, Клинтон и натаму има голема предност, со освоени 1.699 делегати, додека Сандерс има 1.409 делегати, но поранешната државна секретарка и прва дама на САД има уште над 500 гласови од ткн „суперделгати“, партиската елита на демократите, па е блиску до освојувањето на неопходните 2.383 делегати.

Имајќи предвид дека во сите држави гласовите на демократите се распределуваат пропорционално, на Сандерс му се потребни победи во сите преостанати држава со големо мнозинство, за да може да ѝ претставува предизвик на Клинтон.

Сенаторот веќе претходно изјави дека нема да се откаже и ќе оди до крајот. „Штабот на Клинтон смета дека кампањата заврши. Тие грешат, изјави Сандерс за Associated Press по победата во Индијана. /крај/мф/сн

Извор: Макфакс