Напаѓачот од Сан Бернардино, во американската сојузна држава Калифорнија, имал контакти со лица од најмалку две милитантни исламистички организации, вклучувајќи ја и Џебхат ан-Нусра, сириското крило на Ал Кaеда, објави The Los Angeles Times во петокот, повикувајќи се на федерални извори во истрагата.

Како што претходно пишуваа американските медиуми, се чини дека 28-годишниот Саид Фарук и 27-годишната Ташфин Малик, двојката која уби 14 и рани 21 лице, тоа го сториле со добро осмислен план, бидејќи во нивниот дом бил пронајден огромен арсенал муниција и дури 12 импровизирани експлозивни направи. Саудиската амбасада во Вашингтон објави дека Фарук во летото 2014 година девет дена престојувал во Саудиска Арабија.

Функционер во американските правосудни органи за LA Times рекол дека постојат сознанија дека имало некакви контакти меѓу Фарук и лице од Џебхат ан-Нусра во Сирија и радикалната исламистичка група Ал-Шабааб во Сомалија. Меѓутоа, сé уште е нејасно од кој вид биле тие контакти и точно со кои лица контактирал, се наведува во написот.

Истрагата за пукањето во центарот за помош на лица со ментална попреченост во Сан Бернардино во петокот беше преквалификувана како истрага за „терористички акт“, објави американското Федерално биро за истраги (FBI). „Отсега овој ужасен настан го истражуваме под претпоставка дека станува збор за терористички чин. Имаме докази дека нападот е строен по внимателна подготовка“, изјави Дејвид Боувдич, од одделот на FBI во Лос Анџелес.

Масакрот на божикен прием ви Калифорнија го сторил муслиманска брачна двојка којашто се радикализирала, а жената Ташфин Малик ѝ изразила лојалност на џихадистичката организација Исламска држава, пишуваа американските медиуми одбележувајќи го пресвртот во истрагата.

По 48-часовното талкање меѓу претпоставките дека исламистичкиот тероризам стои зад нападот во Сан Бернардино или дека станува збор за неконтролиран гнев на напаѓачите, полициската истрага на FBI смета дека знае зошто Фарук и Малик, кои имале шестмесечно дете, во средата го извршиле злосторство.

Малик претходно на Facebook објавила текст во кој му изразува верност на „калифот“ на Исламската држава, Абу Бакр ал-Багдади, пренесе телевизиската мрежа CNN која добила потврда за оваа информација од FBI.

„Знам за оваа објава …. во тек се настојувањата да го разјасниме тоа. Марк Цукерберг (сопственикот на Facebook – з.р.) ја потврди таа порака, која се појавила токму во моментите кога започнувал нападот… Навистина станува збор за изјавување верност““, изјавил федералецот Боувдич.

До саботата не се појавија докази дека Исламската држава знаела за двајцата напаѓачи во Калифорнија. Во нивниот дом не се најдени докази коишто би упатувале на вистинска врска со странска терористичка организација, па полицијата смета дека двојката всушност самата се радикализирала, и биле одушевени од Исламската држава, а не дејствувале по нејзин налог.

Брачната двојка кој зад себе го остави шестмесечното бебе беше убиена во престрелка со полицијата додека со автомобил се обидуваа да избегаат од местото на нападот. Неколку часа претходно со автоматски пушки упаднаа во центарот за лица со ментални тешкотии во кој инаку работел Фарук и во кој се одржувал божикен прием, и започнале да пукаат по колегите на Саид./крај/мф/сн

Извор: Макфакс