Регион
Турски војници уапсени во случајот ‘паралелна држава’

Турските власти уапсија во неделата еден офицер на вооружените сили и 33 војници во рамките на истрагата во ткн случај „Паралелна држава“.
Под процесот „Паралелна држава“ во Турција се подразбира и се води против припадници на разни државни институции кои се припадници на движењето „Хизмет“, на чие чело е влијателниот исламски проповедник Фејтула Ѓулен, кој живее во самопрогонство во САД. Турскиот претседател Реџеп Тајип Ероган, кој порано беше сојузник со Ѓулен, сега го обвинува дека сака да ја собори од власт неговата Партија на правдата и развојот (AKP).
Ердоган го обвинува својот поранешен сојузник дека воспоставил „валкани односи“ со меѓународната заедница, со единствена цел да го клевети управувањето на Турција.
Притворените во неделата, исто така, се обвинети за припадност на радикалната шиитска група „Селам Тавкид“, пренесува агенцијата Anadolu. Обвинителството на Истанбул издало налог за нивно притворање под обвинение за нелегално прислушување, шпионажа, нарушување на приватноста на приватниот живот, нарушување на законот за заштита на приватните податоци, фалсификување службени документи, членство во терористичка организација, и обид за соборување на владата.
Станува збор за права група припадници на вооружените сили кои се уапсени под обвинение за „паралелната држава“. Претходно беа притворени десетици полициски офицери и припадници на разузнавачките и безбедносните агенции, а од нив 28 уште се во притвор. Според турските медиуми, турското обвинителство ќе бара доживотен затвор под обвинение за нелегално прислушување на турскиот државен врв, вклучително и претседателот на земјата.
Ердоган тврди дека Ѓулен преку своите приврзаници распоредени во полицијата и во правосудните органи кон крајот на 2013 година започнал кампања за дестабилизација на неговата влада конструирајќи корупциски афери.
Оваа кампања која започна со приведувања на синови на министри предизвика потреси во владата на владејачката Партија на развојот и правдата, проследени со оставки и смени на илјадници полициски функционери, судии и вработени во јавното обвинителство.
Во декември турскиот суд распиша налог за апсење за Ѓулен кој се товари дека води криминална организација. Минатата седмица нему му беше одземен турскиот пасош, а тој преку медиумите ги отфрли сите обвинувања./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ и Путин ќе се сретнат во Кина

За време на посетата на Кина, претседателот на Руската Федерација, Владимир Путин, ќе се сретне со претседателот на Србија, Александар Вучиќ, изјави за медиумите помошникот на рускиот претседател, Јуриј Ушаков.
Путин ќе биде во Кина од 31 август до 3 септември, а ќе присуствува и на церемониите по повод 80-годишнината од крајот на Втората светска војна, како и на неколку билатерални средби.
Регион
Уапсена е мајката која го оставила бебето во Белград: било заврзано во кеса

По наредба на Вишото јавно обвинителство во Белград, полицијата ја уапси А.С. (2006), мајка за која постои сомнение дека го оставила своето седумдневно бебе покрај контејнер во Земун, пренесува „Блиц“.
Жената според медиумот е обвинета за обид за тешко убиство.
Бебето го пронашол случаен минувач околу 8:20 часот утрово. Било завиткано во крпи и врзано во кеса.
Според Маја Миладиновиќ, жената што го пронашла бебето, новороденчето тивко плачело, дека нејзиниот крик звучел како „мјаукање“.
– Го шетав кучето како секое утро по улицата Дунавска во Земун кога забележав дека нешто се движи зад контејнерот. Мислев дека лази, но кога се приближив видов дека е бебе. Бебето едвај дишеше и беше сино – вели таа.
Според неа, бебето било завиткано во пешкир.
Како што објави „Блиц“, детето било оставено зад контејнерот, меѓу грмушки и на куп ѓубре.
Екипата за итни случаи го транспортирала бебето во породилиштето во Земун, пишува Танјуг.
Фото: принтскрин
Регион
Министерството за внатрешни работи на Србија: Дачиќ примил плик со три куршуми во него

Српското Министерство за внатрешни работи соопшти дека вчера во зградата на владата на Република Србија е пронајден плик адресиран до вицепремиерот и министер за внатрешни работи, Ивица Дачиќ, во кој имало три куршуми.
Сомнителната пратка е откриена вчера за време на безбедносна проверка на рендгенски уред при сортирање пошта. Истрагата утврдила дека пликот бил предаден два дена претходно во филијалата на поштата на Србија во Пожаревац.
Полицијата го идентификувала и го пронашла лицето што го доставило пакетот, а истрагата за сите околности на настанот е во тек.
Министерството соопшти дека ги презема сите законски пропишани мерки и дејства со цел да се заштити безбедноста на граѓаните и на институциите.
Фото: принтскрин