Ескалира кризата предизвикана со сметот во либанската престолнина Бејрут, во чиј кварт Ријад Солха пред владината палата Сераи вечерта во неделата се собрала околу 10.000 луѓе, откако претходно во текот на судирите меѓу полицијата која употреби водени топови и солзавец и демонстрантите беа повредени најмалку 30 лица.

Ден по судирите во кои беа повредени најмалку 16 лица според податоците на либанскиот Црвен крст, и 35 полицајци, новите судири избувнаа во неделата вечерта во текот на собирот во кој се изразува незадоволство од либанската влада и нејзината неспособност да изнајде излез од кризата со домашниот смет кој со седмици наназад ги затрпува улиците на главниот град Бејрут.

Според Црвениот крст, триесетина демонстранти се ранети и хоспитализирани во судирите кои траат во неделата навечер. Собирот повторно е во организација на граѓанското движење „Смрдите“, коешто во меѓувреме се огради од насилствата и инсистира на мирно изразување на незадоволството.

Судирите ги предизвикале околу 200 млади лица, кои фрлале камења и шишиња со песок врз полицајците. Демонстрантите се обиделе да ги отстранат бодликавите жици зад кои се групираат полицајците. Запален бил еден мотоцикл и полицијата одговорила со водени топови и солзавец. Агенциите јавуваат дека низ улиците на Бејрут одекнуваат истрели.

Како што објасни генералниот секретар на Либанската демократска партија,Валид Баракат, „капката што ја прелеа чашата, која ги изведе луѓето на улиците, е неспособноста на властите да организираат собирање и депонирање на сметот“. При температури повисоки од 40 Целзиусови степени либанската престолнина е на работ на еколошка катастрофа.

Премиерот Таман Салам претходно во неделата повика на мир. „Подготвен сум да ве послушам и да разговара“, порача од прес-конференцијата. Оцени и дека е употребена прекумерна сила во растерувањето на судирот во саботата.

Салам најави дека доколку до 26-ти август не биде решена кризата, повеќе нема да закажува седници на владата. Не ја исклучи можноста и до своја оставка.

Салам призна дека проблемот со собирањето на сметот ја прелеало чашата и предизвикало гнев. „Но проблемот е многу поважен од таа капка. Станува збор за политичкото ѓубре во земјата“, изјави премиерот. Свика итна седница на владата за да се постигне решение на кризата и предупреди на политичките поделби кои ги парализираат институциите.

Премиерот Салам ја формираше коалиционата влада во март 2014 година, добивајќи огромна поддршка од патениците. Тогаш тој во говорот пред парламентот предупреди на „вакуумот во власта во повеќеконфесионалниот Либан“. Таквата ситуација ескалираше со неодамнешниот конфликт меѓу прозападните и просириските министри што ја парализира извршната власт, но досега ниеден од нив не поднесе оставка.

Првпат од завршувањето на либанската граѓанска војна, која траеше од 1975 до 1990 година, Либан веќе подолго од една година е без претседател, додека парламентот е парализиран од поделбите.

Земјата е поделена меѓу коалициите коишто ги предводат моќниот шиитски Хезболах, кој е сојузник на Сирија и на Иран, и онаа што ја води поранешниот сунитски премиер Саад Харири кој ја има поддршката на САД и Саудиска Арабија.

На протестите во Бејрут можат да се слушнат повиците „Народот бара пад на режимот“ што беше мотото на улиците на Каиро и другите престолнини во текот на ткн „Арапска пролет“ во 2011 година кога беа соборени децениските авторитарни челници во регионот на Блискиот исток и во северна Африка, по што во целото подрачје настапи подем на радикалните исламистички движења и појава на екстремните групации како Исламската држава и Џебхат ан-Нусра.

Според челникот на либанската комунистичка партија Калед Хадад, протестите во центарот на Бејрут покажуваат дека „младите поколенија бараа коренити промени во Либан“. Според него, „надживеаниот конфесионален корумпиран систем треба да биде сменет со демократска граѓанска власт“./крај/мф/сн

Извор: Reuters/AFP