Спасувачките екипи во понеделникот започнаа со пробивањето низ тешко пристапното планинско подрачје на коешто, откако во неделата попладнето по локално време од радарите исчезна авионот од типот „ATR 42-300“ на индонезиската воздухопловна компанија „Trigana Air Service“ со 54 патници и членови на екипажот, беа забележани остатоци од авионот со кој индонезиската поштенска компанија превезувала 470 илјади американски долари.

Авионот го ја загубил врската со контролната кула во лоши временски услови десет минути пред слетувањето во Оксибил, на 300 километри јужно од градот од каде што полетал – Џајапура, административен центар на индонезиската источна покраина Папуа.

Во двомоторниот авион „ATR 42-300“ на турбопропелерски погон, имало 44 возрасни патници, пет малолетници и пет членови на екипажот. Со авионот биле пренесувани и 470.000 долари во готовина. Парите, во четири вреќи, потекнувале од јавните фондови, а поштенските службеници ги носеле за сиромашните семејства во покраината Папуа.

„Парите беа наменети за сиромашните семејства. Товарот го придружуваа четворица наши службеници“, изјавил за локалниот портал Tempo, Харионо директор на поштата во Џајапура, кој како и многумина Индонезијци има само презиме.

Авионот на летот IL267, според претпоставките коишто подоцна се остварија, се урнал во тешко пристапно планинско подрачје, односно удрил во планина на 25 километри од своето одредиште. На местото на несреќата во неделата беше испратен друг авион во извидување, кој набрзо се врати поради бурата. Во понеделникот повторно авион за пребарување на теренот го надлетува местото на падот, а спасувачките екипи пешки се пробиваат до местото каде што се забележани остатоци од воздухоплов.

Според специјализираните портали коишто ги следат воздухопловните несреќи, авионот бил во употреба околу 30 години. Компанијата „Trigana Air Service“ е формирана во 1991 година, а во моментов нејзиното седиште е во индонезиската престолнина Џакарта. Таа има забрана за летање во Европската унија, а од почетокот имала 14 несреќи. Флотата на компанијата се состои од 15 патнички авиони, од кои седум од типот „ATR 42-300“, три „ATR 72-200“ и четири „Boeing 737-400“, како и неколку товарни воздухоплови. Компанијата ги сервисира само домашните летови.

Инаку воздухопловните несреќи во Индонезија не се реткост, особено во покраината Папуа во источниот дел од земјата која се протега на најголемиот архипелаг на планетава, каде што има слабо развиена инфраструктура. Во средата едно лице загина и уште шест беа тешко повредени при пад на мал патнички авион „Cessna“ кој се урна при обид да полета од писта на голема надморска височина на аеродромот Ниниа, исто така, во покраината Папуа.

Во јануари годинава мал патнички авион од типот „DHC-6“, исто така, во сопственост на компанијата „Trigana Air Service“ доживеа несреќа при обид принудно да слета на аеродромот кај Енортали на Папуа. Во септември минатата година повеќе од десет луѓе беа повредени кога мал авион на компанијата „Enggang Air“ слета 400 метри подалеку од пистата на аеродромот Мулиа, исто така, на Папуа.

Најголемата авионска несреќа на овој остров се случи, пак, во соседната покраина Западна Папуа во мај 2011 година, кога патничкиот авион од кинеско производство „Xian MA60“ на индонезиската компанија „Merpati“ се уран во морето при обидот да слета во градот Соронг. Тогаш загинаа 21 патник и шест членови на екипажот.

На 30-ти јуни годинава, пак, се случи една од поголемите несреќи во историјата на индонезиското воздухопловство, кога воениот авион од типот „Hercules C-130“ неколку минути по полетувањето се урна врз населба на индонезискиот град Медан. Притоа загинаа 122 патници и 12 членови на екипажот, како и неколку луѓе на земјата. Причината за оваа несреќа сé уште не е официјално соопштена, но се смета дека е дефект на моторот./крај/мф/сн

Извор: Макфакс