Во текот на минатата недела, царинските службеници спречија повеќе обиди за нелегално пренесување на девизи , цигари и друга стока. 

На граничниот премин Табановце, при личен претрес на грчки државјанин, кој управувајќи патничко возило со грчки регистарски таблички, пријавено за излез од државата, биле откриени 30 илјади евра.

На прашање на царинските службеници, возачот одговорил дека нема што да пријави за царинска контрола, но при извршениот личен претрес, во џебовите од неговите панталони пронајдени се 40 илјади евра, за што не поседувал потврда за внесени ефективни странски пари издадена од царински орган на Република Македонија. Согласно законските прописи, на патникот му се вратени 10.000 евра, износ што нерезидент може слободно да го изнесе од државата.

При личен претрес на грчки државјанин, кој управувајќи патничко моторно возило со бугарски регистарски таблички се пријавил за влез во државата на граничниот премин Богородица, биле откриени 9.300 евра. Во внатрешните џебови на јакната и во предните џебови на панталоните на возачот пронајдени се непријавени 19.300 евра. Согласно законските прописи, на патникот му се вратени 10.000 евра, износ што може слободно да се внесе во државата.

Покрај ова, минатата недела беа откриени и три обиди за шверц на наркотични средства. 

Во првиот случај на 19 јануари 2015 година, на граничниот премин Ќафасан, за влез во државата се пријави патнички автомобил со полски регистарски таблички, со четворица полски државјани кои биле селектирани за преглед.

Во текот на прегледот на возилото, двајца од патниците побарале да одат во тоалет, но наместо во тоалетот се упатиле кон контејнерите за ѓубре, каде биле забележани од полициските и царинските службеници дека извадиле нешто од облеката и го оставиле до контејнерите.

При проверка на просторот околу контејнерите пронајдени се две кеси обвиткани со кафеава леплива лента, исполнети со растителна зеленкаста материја. Во истиот момент еден од патниците избегал во блиската шума,  додека другиот патник бил задржан. По направено вештачење на растителната материја утврдено е дека се работи за марихуана со вкупна маса од 914 грама.

Во вториот случај, на граничниот премин Блаце, спречен е обид за криумчарење на околу 5 грама кокаин. На 19 јануари 2015 година, за влез во државата се пријавило патничко моторно возило со црногорски регистарски таблици, управувано од црногорски државјанин.

Поради сомнително однесување на возачот, царинските службеници извршиле личен претрес и контрола на возилото, при што во џеб од јакната на возачот, сместена на совозачкото седиште, пронајдено е најлонско пакетче, обвиткано со алуминиумска фолија, со бела прашкаста материја, за која по извршеното тестирање утврдено е дека се работи за кокаин.

Во третиот случај, мобилните царински тимови спречија обид за криумчарење на 173 семки од марихуана. На 21 јануари 2015 година, на граничниот премин Богородица, за излез од државата се пријави автобус со турски регистарски таблички, што сообраќал на релација Скопје – Истанбул. При контрола на багажот на патниците, во ранец сопственост на американски државјанин, патник во автобусот, во внатрешноста на два чорапи, пронајдени се 2 зипер кесички, со вкупно 173 семки од марихуана./крај/мф/бс