САД во саботата со борбени авиони и беспилотни летала убиле повеќе од 150 борци на радикалното исламистички движење ал-Шабаб кои подготвувале голем напад во камп за обука околу 200 километри северно од сомалиската престолнина Могадишу, објави Пентагон во понеделникот.

„Борците на ал-Шабаб се увежбуваат за голем напад. Се подготвуваат да го напуштат логорот и претставуваат непосредна закана за САД и силите на Африканската унија“, изјави портпаролот на американското министерство за одбрана, Џеф Дејвис. „Според прелиминарните процени, повеќе од 150 терористи се елиминирани“, прецизираше Дејвис.

Ал-Шабаб изведе повеќе големи напади од почетокот на годинава во Сомалија. Според податоците на САД, борците кои ги нападнеле американските сили ја завршувале обуката за изведување офанзивни операции, додаде портпаролот на Пентагон без да прецизира какви напади подготвувале исламистите.

„Нивното елиминирање ќе ги намали можностите на ал-Шабаб да ги изврши своите задачи во Сомалија, а тоа се регрутирање, утврдување на нови бази и планирање напади врз американските и силите на Мисијата на Африканската унија во Сомалија (AMISOM)“, оцени Дејвис. Според него, конкретниот камп за обука бил следен извесно време и оти било оценето дека наближувало покренувањето на оперативната фаза.

Во јануари исламистите го нападнаа логорот на кенискиот контингент од AMISOM на југот од земјата кога убија повеќе од 100 кениски војници. Минатата седмица убија повеќе од 14 лица во експлозии на две автомобил бомби пред еден хотел и парк во Могадишу, Два дена подоцна во експлозија на автомобил пред ресторан во местото Бајдо беа убиени повеќе од 30 луѓе.

Силите на Африканската унија во Сомалија (AMISOM) се распоредени во 2007 година, а ал-Шабаб во август 2011 година е протерана од Могадишу. Тогаш ги загубија повеќето од своите упоришта во близина на сомалиската престолнина. Најчесто избегнуваат конвенционални борби и изведуваат герилски операции и самоубиствени напади.

Радикалната исламистичка група ал-Шабаб (Движење на младите муџахедини) одржува тесни врски со глобалната терористичка мрежа Ал Каеда, поради што нејзините челници последните месеци беа цел на операции на американските командоси, но минатата година некои нејзини челници изјавија лојалност на џихадистичката групација Исламска држава. Ал-Шабаб се смета за хетерогена организација којашто обединува голем број фракции, поделени по идеолошка и клановска основа. И покрај тоа, според експертите, таа останува силна групација и претставува сериозна безбедносна закана. Изминатите шест години ал-Шабаб се бори против централните сомалиски власти и ги попречува хуманитарните активности на ОН во земјата.

Нестабилноста во земајта започна откако Сомалиската Република престана да постои како унитарна држава во 1991 година со падот на диктаторскиот режим на Саид Баре. Како единствен легитимен орган во земјата меѓународната заедница ја признава федералната влада којашто ја контролира престолнината Могадишу и одредени поблиски области. Другите делови на Сомалија се под контрола на непризнаени државни ентитети или самоуправувачки региони.

Во јужните и североисточните делови од Сомалија владеат локалните кланови и радикални исламски движења, вклучувајќи ги и оние поврзани со глобалната терористичка мрежа Ал-Каеда, од кои најорганизирана е групата ал-Шабаб, којашто дејствува и во соседната Кенија којашто по повик на меѓународната заедница заедно со уште некои други африкански земји испрати свои војници за справување со бунтовничките групи./крај/мф/сн

Извор: AFP