Во Македонија нема опасност од заразни болести по поплавите што ги зафатија Србија, Босна и Херцеговина и Хрватска, како и по вчерашните поплави во Скопје, изјави министерот за здравство, Никола Тодоров, во понеделник по состанокот на Комисијата за заразни болести на кој што биле разгледани можните појави на заразни заболувања како резултат на поплавите кои се случија во нашето соседство и по вчерашното невреме во Скопје.

На состанокот на Комисијата биле усвоени повеќе мерки и биле издадени препораки во насока на превенција од појава и ширење на заразни болести од поплавените подрачја.

„Дадени се повеќе препораки од страна на Комисијата. Најпрво е преземена мерката за доделување на дезинфекциони средства во количина од 3.5 тони во сите јавни здравствени установи во државата, но и на установите кои како резултат на вчерашното невреме беа поплавени, а тоа се три градинки и Детската клиника во Скопје. Исто така, дадени се и други препораки како што се препораки за подобра хигиенска контрола на граничните премини и на сите бензински станици долж коридорите”, изјави Тодоров.

Исто така, додаде, се врши и прочистување на вакциналните картони на вработените во комуналните претпријатија за да се види дали се вакцинирани или не особено за тифус.

Д-р Јованка Костовска, раководител на секторот за превентивна здравствена заштита во Министерството за здравство, рече дека нема зголемени пријави за заразни болести и дека се донесени и препораки за патниците од Македонија во поплавените подрачја во регионот.

„Донесовме и препорака за патници кои што патуваат во поплавените подрачја од Македонија, дали приватно или спасувачи. Препорака за сите е да внимаваат на личната хигиена, често миење на раце, да консумираат безбедна вода и храна, термички обработена храна, добро миење со чиста вода на овошјето и зеленчукот, избегнување на контакти со укинати животни, а при појава на симптоми на болест посебно повраќање, пролив, болки во стомакот, температура и други симптоми веднаш да се јават на лекар”, порача Косовска и додаде дека овие општи препораки за хигиена важат за целото население на Македонија.

Поради можната појава на вектор преносливи болести како западно нилска треска и други болести кои се пренесуваат преку комарци или крлежи, додаде, Комисијата побара зголемен надзор и поголема активност на единиците на локална самоуправа за преземање мерки за дезинсекција, дезинфекција и дератизација, а инспекција ќе врши контроли дали се спроведуваат мерките.крај/мф/сд