Русија е подготвена да придонесе не само во борбата со тероризмот во Сирија, туку и во политичкото решавање на тамошната ситуација преку контактите со другите држава и со учество на сите политички соли, етнички и религиозни групи во земјата, изјави руските претседател Владимир Путин на средбата со сирискиот колега Башар ал-Асад, истакнувајќи дека „крајниот збор треба да го има сирискиот народ“.

Патувањето во Москва е првата посета на сирискиот претседател Башар ал-Асад на странска држава од почетокот на граѓанската војна во март 2011 година, започната како политички преврат на сунитската опозиција поддржана од регионалните сунитски сили и Западот а подоцна се претвори во конфесионален судир во кој најмоќни станаа џихадистичките групации како Исламската држава и Џебхат ан-Нусра. Во судирите досега загинаа повеќе од 250.000 луѓе, а околу седум милиони се внатрешно раселени или заминаа во странство предизвикувајќи го најголемиот миграциски бран во Европа по Втората светска војна.

„Кога станува збор за решавањето на ситуацијата во самата Сирија, ние поаѓаме од тоа дека врз основа на позитивната динамика во борбените дејствија, долгорочно решение може да биде постигнато со учество на сите политички сили, етнички и религиозни групи“, рече Путин, според соопштението што го објави Кремљ на својата официјална интернет страница. Притоа рускиот претседател истакнал дека „решавачкиот збор, безусловно, траба да го има исклучиво сирискиот народ“.

Путин, во духот на децениската стратешка соработка меѓу Москва и Дамаск, уште еднаш истакнал дека Сирија е пријателска земја за Русија и оти неговата земја е подготвена да придонесе „не само во борбата против тероризмот, туку и во рамките на политичкиот процес“ во оваа блискоисточна земја. „Се разбира, во тесна соработка со другите светски земји и со државите од регионот, кои се заинтересирани за мирното решавање на конфликтот“, порачал рускиот претседател.

Ги истакнал и успесите на владата во Дамаск во борбата со екстремната исламистичка организација Исламска држава, којашто сé уште контролира значителен дел од територијата на Сирија. „Сирискиот народ е единствен и речиси самостојно се му спротиставува на меѓународниот тероризам изминативе неколку години, поднесе сериозни загуби но во последно време и бележи значителни позитивни резултати во таа борба“, истакнал рускиот челник.

Истовремено, Путин изразил загриженост поради заминувањето на руски и државјани од земјите ЗНД (Заедница на независни држави – поранешни советски републики) во борбите против владините сили во Сирија, а на страна на џихадистичките групации. „Тоа не загрижува, Русија има предвид дека, за жал, на територијата на Сирија против владините сили се борат и лица кои потекнуваат од републиките на поранешниот Советски сојуз, чиј број се проценува на најмалку четири илјади“, додал.

„Обидите на меѓународниот тероризам под своја контрола да стави значителни територии на Блискиот исток, да ја дестабилизира ситуацијата во регионот, предизвикуваат оправдани стравувања кај многу земји во светот“, забележал Путин и истакнал дека Москва „не може да дозволи државјаните од ЗНД да се здобиваат со борбено искуство и да бидат подложени на идеолошка индоктринација, и да се вратат на територијата на Русија“.

Сирискиот челник од своја страна се заблагодарил на „Русија и на рускиот народ“ за помошта на неговата земја изминатите години и особено затоа што се „залагаат за единството на Сирија и за нејзината независност“, според соопштението на Кремљ. „Најглавното е што сето тоа се прави во рамките на меѓународното право“, истакнал Асад.

Според него, политичките чекори коишто ги преземала Москва од самиот почеток на сириската криза не дозволиле настаните да се одвиваа според трагично сценарио.

„Политичките чекори што ги презема Русија од почетокот на кризата, не дозволија настаните во Сирија да добијат трагичен тек. Тероризмот кој сега е раширен во регионот, доколку не беа руските дејствувања и решенија, ќе заземеше многу поголема и ќе се распространеше на уште поголема територија“, истакнал Асад обраќајќи му се на Путин.

„Тие чекори се потврдија со тоа што преземавте чекор во борбените операции во обединетиот фронт во борбата со тероризмот“, заклучил Асад./крај/мф/сн

Извор: Макфакс