Од час во час се зголемува црниот биланс од трагедијата што се случи во четвртокот утрото во исламското светилиште Мека при обредното одбележување на големиот празник Курба-бајрам, па според последните информации на Службата за цивилна заштита на Саудиска Арабија, потврдени се 453 мртви и 719 повредени верници. 

Засега нема информации за националноста на настраданите во една од најголемите несреќи при одбележување на празнувањето во Мека. Странските амбасади во Саудиска Арабија објавија дека трагедијата се случила во зоната од светилиштето предвидена за домашни саудиски верници.

Од Исламската верска заедница во Република Македонија за Макфакс изјавија дека засега не можат да дадат никакви конкретни податоци, и оти се во контакт со своите претставници во Мека и Саудиска Арабија. Во моментов тие собираат информации кои ќе бидат објавени во 15 часот на прес-конференција. Според непотврдени информации, годинава на хаџ во Мека заминале повеќе од 1.500 муслимански верници од Македонија.

Засега нема информации за причината за масовното стампедо на просторот на кој се собираат стотици илјади луѓе. Инцидентот се случил недалеку од главниот шаторски камп на аџиите.

Според првичните сознанија, стампедото се случило на пристапот на патекат која е направена како граница во овој сектор, преку кој аџиите од Саудиска Арабија и земјите од Персискиот залив можат да дојдат до местото на обредите. Мешаницата се случила за време на еден од ритуалите во хаџот – каменувањето на шејтанот (ѓаволот), во текот на кон на ограничен затворен простор се одвива хаотично минување на стотици илјади луѓе.

Во четвртокот утрото во долината Мина, на неколку километри од најсветиот град во исламскиот свет Мека, на молитвата за големиот празник на принесувањето жртва Ид ал-Адха (Курбан-најрам), се собраа стотици илјади аџии од целиот свет. Саудиските медиуми јавуваат дека шефот на службата за странци во Саудиска Арабија, само 49.000 луѓе од целиот број аџии годинава користеле копнен или поморски пат, додека останатите пристигнале по воздушен пат.

Минатиот четврток министерот за внатрешни работи на Саудиска Арабија, принцот емирот Мухамед бен Наиф, изјави дека кралството забранува каква и да е политичка пропаганда за време на хаџот и оти безбедносните сили ќе го уапсат секој кој ќе ја прекрши оваа забрана.

Традиционалниот хаџ во Мека годинава е одбележан со два трагични инцидента. Имено, покрај денешниот, на 11-ти септември во главата џамија Ал-Харам, во паѓањето на градежен кран кој го проби покривот на храмот загинаа најмалку 109 лу]е, а повеќе од 230 беа повредени.

Извршувањето на обредот хаџ, годишниот аџилак на светите места во Мека и нејзината близина, започна во вторникот, Хаџот е еден од пеете столбови на исламот, кој секој муслиман е должен да го направи барем еднаш во својот живот.

Минатата 2014 година на хаџот во Мека учествуваат околу два милиона аџии од целиот свет, а годинава прелиминарните процени се дека во светото место имало 1,3 милион верници.

Во Ал-Масџидал-Харам (Светата џамија) се чува главната светија на исламот – Кааба, „коцката“ во центарот на џамијата. Таа за муслиманите претставува „папокот“ на светот и она што Алах прво го создал.

Саудиските власти од пред две години спроведуваат голема реконструкција, со којашто е планирано зголемување на површината на џамијата до 400.000 квадратни метри, што ќе овозможи истовремено да прими околу 2,2 милиони луѓе./крај/мф/сн

Извор: Макфакс