Венецуелската опозиција ја презема во вторникот контролата над Конгресот, првпат по 17 години на бурната седница којашто заврши со напуштање на заседанието на приврзаниците на претседателот Николас Мадуро, додека опозицијата се подготвува за борба со власта во сé подлабоката економска криза.

Коалицијата на Демократското единство освои двотретинско мнозинство на декемвриските парламентарни избори освојувајќи ги гласовите на избирачите гневни поради економската криза, сé повисоките цени и хроничниот недостиг од производи.

Претседателот Николас Мадуро го оцени новиот парламент како „десничарски“ и „буржоаски“ и ја обвини опозицијата дека се подготвува да ги укине социјалните програми коишто ги воведе неговиот харизматичен претходник, покојниот социјалистички претседател Уго Чавез.

Поддржувачите на Мадуро демонстративно ja напуштија зградата на новото Национално собрание веќе на првата седница. Според нив, новоизбраниот спикер на парламентот Анри Рамос ги прекршил правилата настапувајќи со свој говор на отворањето на првата пленарна седница.

Рамос го искористил штотуку стекнатата контрола над парламентот прекинувајќи ги нападите на еден социјалистички пратеник врз опозицијата велејќи дека му изминало времето на говорницата. И пред тоа и потоа, на заседанието двете групации бучно разменувале обвинувања за корупција и предавство, пренесуваат локалните медиуми

Кога Рамос бил нападнат од друг социјалистички претставник кој се повикал на кршењето на деловникот, овој одбил да му даде збор велејќи „Полека конгресмену, работите тука се променија“.

„Само што ја отворија првата седница и веднаш го прекршија деловникот за работа на парламентот“, го цитира Reuters пратеникот од Обединетата социјалистичка партија на Венецуела, поранешниот спикер на Националното собрание, Диосдеадо Кабељо.

Во декември 2015 година во Венецуела опозицијата првпат по 17 години успеа да воспостави контрола над парламентот. Сепак, на 30-ти декември, Врховниот суд го суспендираше инаугурирањето на тројца опозициски пратеници со што опозицијата го загуби квалификуваното мнозинство. Опозицискиот пратеник Фреди Гевараги повика граѓаните да реагираат на одлуката на судот и во вторникот да излезат на улиците.

Сепак, беше објавено дека сите пратеници биле избрани според законот, и сите пратеници на опозицијата во рок започнаа со мандатите, а Националното собрание започна со работа во вторникот со верификација на мандатите на пратениците.

Чавез ја презема власта во почетокот на 1999 година, а неговата национализација на ресурсите од рацете на странските компании и големи социјални програми кои се базираа на приходите од нафтата придонесоа да не биде загрозен на ниедни избори до неговата смрт од рак. Неговиот наследник Мадуро, возач на автобус, од изборите во 2013 година не успеа да ја повтори харизмата на претходникот, а неговата влада пропушти да ги спроведе длабоките економски реформи кои ги вети.

Отстранет е во вторникот портретот на покојниот Чавез кој беше поставен во главната сала на Конгресот изминатите години, кој противниците го прогласуваа за симбол на незаконската политизација на јавните институции. /крај/мф/сн

Извор: Reuters