Евентуалното излегување на Велика Британија од Европската унија би претставувал сериозен ризик за вкупниот економски раст се наведува во изјавата од самиот на челниците на седумте индустриски најразвиени земји од групата Г7, во којашто се истакнува дека овие земји ќе ги продолжат санкциите против Русија, ја критикуваат Кина.

Изјавата во пресрет на референдумот од 23-ти јуни за британското излегување или останување во ЕУ, се очекува да оди во полза на владата во Лондон поради низата сериозни предупредувања за евентуалните загуби кои би можеле да настанат доколку Британците се одлучат да го напуштат 28-члениот блок.

„Излегувањето од ЕУ ќе биде пресврт во трендот на вкупната трговија и инвестиции и создадените работни места и претставува ризик за растот“, се наведува, меѓу другото, во изјавата од самитот на Г7, покрај темите за геополитичките судири, тероризмот и бегалците.

Темата на британското излегување од ЕУ не беше на дневниот ред на самитот, но функционери од британската влада претходно најавија дека ја очекуваат на маргините.

Германската канцеларка Ангела Меркел, пак, на новинарите им изјави дека за Брекзитот не се разговарало во јапонското летувалиште Исе-Шима. „Тоа не беше предмет на разговори. Но постоеше сигнал од сите кои овде седат за желбата Британија да остане дел од ЕУ. Но, одлуката за тоа е на британските гласачи“, изјави Меркел по дводневниот самит кој завршува во петокот.

Челниците на САД, Велика Британија, Франција, Германија, Италија, Канада и Јапонија изразија загриженост поради влошувањето на тензиите во Јужното и Источното Кинеско Море, повикувајќи на решавање на судирите без примена на сила.

Претседателот на Европскиот совет, Доналд Туск, ја повика групата Г7 да донесат „јасен и цврст став за сите територијални спорови, без разлика дали станува збор за Украина или Јужното или Источното Кинеското Море“. „Веродостојноста на Г7 се испитува со нашата способност да ги браниме заедничките вредности во кои не е доволно само да се верува“, истакна.

Кога станува збор за украинската криза, челниците порачуваат дека западните санкции против Москва „ќе бидат укинати штом Русија ги изврши своите обврски“, предупредувајќи дека „се подготвени да донесат и други мерки“ доколку е потребно, за руските власти да платата „повисока цена за своите постапки“.

„Во однос на Русија седумката се согласи дека е неопходно да се продолжат санкциите во јуни. Украина е жртва на руската агресија, не смее да се заборави тој факт, и затоа седумката јасно изјави дека сегашните санкции мора да се останат на сила до целосното исполнување на договорот од Минск“, изјави за новинарите британскиот премиер Дејвид Камерон.

Но групата, сепак, оценува, дека е важно да се „продолжи дијалогот“ со Москва.

Мигрантската криза која ја погоди Европа претставува „светски проблем“ кој мора да се решава на „светско“ ниво, оценуваат во Г7, чиишто членки одржале „жива дебата“ на таа тема, соопштија јапонските претставници.

Добар дел од расправите бил посветен на борбата против тероризмот, а приватен е и „акциски план“ за задушување на неговото финансирање, кој во Сенади, во северна Јапонија, го подготвиле министрите за финансии и гувернерите на централните банки од земјите на групата Г7 неколку дена пред почетокот на самитот. Ремата на едно од заседанијата била и заштитата на културните споменици од напади.

Покрај овие теми, седумте челници „повторно се обврзаа дека ќе се служат со сите средства од политичката економија – монетарни, буџетски и структурни – на национално и на колективно ниво“, како и дека долгорочно ќе „продолжат да ги спроведуваат структурните реформи“ за поттикнување на растот, продуктивноста и производствениот потенцијал./крај/мф/сн

Извор: Макфакс