Вести
Во саудиски воздушен удар во Јемен погодена болница на MSF

Во воздушните удари на сунитската коалиција којашто ја предводи Саудиска Арабија во вторникот погодена е јеменска болница којашто ја водат Лекари без граници (Médecins Sans Frontières – MSF), која е втора болница на оваа невладината меѓународна организација која е подложена на воздушен удар по американското бомбардирање во авганистанскиот град Кундуз, и најнов удар врз цивилни цели во Јемен од страна на арапската коалиција.
„Врз болницата на MSF во (покраината) Саад во Јемен изминатата ноќ се зивршени повеќе воздушни напади, додека во ена имаше вработени и пациенти“, се вели во соопштението објавено на страницата на организацијата на Twitter.
Јеменската државна новинска агенција Saba го цитираше директорот на болницата Хидан кој наведува дека во нападите се ранети неколку лица. Според агенцијата, биле изведени уште неколку напади и врз блиското училиште за девојчиња и оштетени се неколку цивилни објекти.
„Воздушните удари резултираа со уривање на целата болница со сето она што беше внатре, опрема и медицински материјали, и со ранувања од средна тежина на неколку лица“, изјавил за Reuters лекарот Ал Мухли. Претставникот на организацијата Малак Шахер за AFP, исто така, потврдил дека во бомбардирањата нема загинати.
На почетокот од октомври болницата на Лекари без граници во северниот авганистански град Кундуз во која се наоѓале околу 200 луѓе беше бомбардирана од американските воздушни сили кои им помагаа на авганистанските војски да ја повратат контролата врз градот кој беше во рацете на талибаните. Според последните информации во бомбардирањето загинале 30 луѓе.
Командантот на американските војски во Авганистан, генерал Џон Кемпбел ја призна одговорноста за инцидентот од 6-ти октомври истакнувајќи дека нападот се случил „по грешка“. Според портпаролот на Белата куќа, Џош Ернест за инцидентот се води истрага од Пентагон и НАТО, а се води и заедничката истрага од претставници на САД и на Авганистан.
Од MSF негираат дека од нивната болница талибаните пукале врз авганистанските и силите на НАТО. Од органзиацијата соопштија дека првата бомба паднала во 2,10 часот во саботата утрото, на персоналот на MSF се јавил во штабот на НАТО во Кабул во 2,19 часот, а воените функционери во Вашингтон ги информирале неколку минути подоцна, но бомбардирањето продолжило до 3,13 часот. Тие тврдат дека станува збор за „воено злосторство“
Претходно претставници на MSF соопштија дека се обратиле до 76 земји, кои се приклучени на Меѓународната хуманитарната комисија за утврдување на фактите (International Humanitarian Fact-Finding Commission), на која е членка и Русија, како и, меѓу другите, Франција и Велика Британија, Германија, Белгија, Катар, Обединетите Арапски Емирати… Во моментов со споменатата Меѓународна хуманитарна комисија за утврдување на фактите претседава Швајцарија, а во претседателството влегуваат уште 14 земји, како Германија, Јапонија, ОАЕ, Русија, Чиле, Уругвај, Алжир, Полска, Литванија, Аргентина, Велика Британија, Италија, Грција и Белгија.
Борбените авиони на арапската коалиција, којашто во јеменскиот судир е на страната на претседателот во егзил Анд Рабо Мансур Хади, во вторникот, исто така, нападнале и неколку бродови со оружје во близина на брегот на Јемен, пренесе телевизијата Al Arabiya.
Според изворите на телевизијата „борбените авиони бомбардираа неколку бродови кои превезувале оружје, кои пловеле кон брегот на Јемен, во близина на пристаништето Ходејда на Црвеното Море“. Според претставникот на коалицијата, „бил спречен обид да се криумчари оружје кое било наменето за милицијата Ансар Алах“ на побунетото шиитско племе Хути. /крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Вести
“Во основа е пекол на земјата”: Градот Газа оставен тотално без здравствената заштита

Во раните утрински часови во саботата, над купови бетон и урнатини, толпа лекари и пациенти пешачеа километри низ уништените улици на градот Газа, принудени да се евакуираат пеш од она што остана од болниците. Здравствените работници велат дека се плашат да ги оставаат критично болните пациенти зад себе во град кој сега во голема мера е сведен на урнатини, преземен израелските сили, со болници кои работат без струја, гориво, вода или храна, пишува британски „Гардијан“.
“Тоа е во основа пекол на земјата”, вели Вилијам Шомбург, шефот на Меѓународниот комитет на Црвениот крст во Газа, опишувајќи го она што остана од животот во градот.
Со недели, десетици илјади луѓе се надеваа дека во болниците во Газа ќе најдат засолниште кое е најблиску до безбедно бидејќи енклавата издржа интензивирачки бомбардирања.
Но, откако израелските сили се приближија до објектите и потоа ја нападнаа најголемата болница во Газа, Дар ал-Шифа минатата недела, илјадници луѓе беа раселени заедно со медицинскиот персонал, шетајќи низ уништените улици на југ од енклавата.
Палестинското министерство за здравство во Газа соопшти дека израелските сили побарале евакуација на болницата Ал Шифа вчераутро, три дена откога влегоа во објектот. Здравствените лица сведочат дека им им било кажано дека имаат еден час да ја евакуираат болницата која беше центар на здравствениот систем на Газа.
Најмалку 12.000 луѓе загинаа во израелскиот напад врз Газа по нападот на Хамас на 7-ми октомври, во кој загинаа 1.200 Израелци, а околу 240 луѓе беа заложници.
Вести
Борел: Целосно е невозможно да се евакуираат милиони луѓе од северот на Газа

Првиот човек на ЕУ-дипломатијата Жозеп Борел утринава на прес-конференција изјави дека евакуацијата на милиони луѓе од северниот дел на Газа е целосно невозможна.
Десетици илјади цивили почнаа да бегаат од јужниот дел на Газа вчера, откако Израел им порача на луѓето да ја напуштат областа пред очекуваната копнена офанзива.
„Да се замисли дека можеш да преселиш милион луѓе за 24 часа во ситуација во каква што е Газа, може да биде само хуманитарна криза“, рече Борел на последниот ден од тридневната дипломатска посета на Кина.
И покрај изјавата на ЕУ за поддршка на Израел, тој исто така предупреди дека и Израел е должен да го почитува меѓународното хуманитарно право во одбранбениот процес.
„Позицијата е јасна“, рече Борел. „Но, како и секое право, тоа има граница. А таа граница е меѓународното право“.
Вести
Проценки на ОН: Десетици илјади луѓе веќе ја напуштија Газа

Во текот на ноќта беа објавени најновите проценки на ОН за бројот на луѓе кои ги напуштиле своите домови во северниот дел на Газа.
Тие велат дека веруваат дека станува збор за десетици илјади кои се упатиле кон југ по предупредувањето за евакуација на Израел.
Пред наредбата за евакуација, повеќе од 400.000 Палестинци беа внатрешно раселени, според хуманитарната канцеларија на ОН OCHA.
Израелската војска им порача на околу 1,1 милион луѓе во северниот дел на Газа да заминат пред очекуваната копнена инвазија. Хамас, пак, ги повика луѓето да останат на место и да пркосат на израелската воена наредба.
Генералниот секретар на ОН, Антонио Гутереш рече дека наредбата од Хамас е „исклучително опасна – и во некои случаи едноставно не е возможна“.