Четиринаесет цивили и двајца припадници на безбедносните сили загинаа во напад кој го извршиле милитанти врз хотелски комплекс, објави во неделата претседателот Аласан Уатара.

„Шест напаѓачи дошле на брегот на Гран Басама во раните попладневни часови. За жал, во моментов имаме 14 цивили и двајца припадници на специјалните сили, кои се убиени“, рекол претседателот Уатара кој пристигна на местото на трагедијата. Додал и дека шесте напаѓачи биле ликвидирани.

Претходните информации говореа за тринаесет напаѓачи, кои според очевидци на плажата пристигнале со чамец и неселективно отвориле оган врз луѓето на плажата на хотелот „Etoile du Sud“, како и врз гостите во блиските ресторани и кафулиња.

Според првичните податоци, смртно настрадал еден француски државјанин, а националноста на другите жртви сé уште не е позната, меѓутоа се знае дека четворица се од Европа. Ранети се петмина Либанци, од кои еден се наоѓа во критична состојба, пренесуваат локалните медиуми.

Членовите на терористичката група Ал Каеда на исламскиот Магреб, кои и претходно извршија неколку слични напади во регионот, ја преземеа одговорноста за нападот, соопшти американската организација за интернет разузнавање која ги следи активностите на исламистичките електронски ресурси SITE, повикувајќи се на соопштение на групата.

Очевидец изјавил за AFP дека еден од напаѓачите извикувал „Алаху Акбар“ (Господ е голем, на арапски), додека друг рекол дека напаѓачите биле „тешко вооружени и дека носеле маскирни капи додека пукале врз гостите“ на хотелскиот комплекс „ Etoile du Sud“, кој во овој период од годината е преполн со странски туристи.

Либанец кој бил очевидец на нападот, изјавил во телефонско јавување за агенцијата за време на нападот дека пристигнале француски падобранци, кои им помогнале на домашните командоси во престрелката со напаѓачите.

Во Брегот на слоновата коска уште од времето на француското колонијално владеење е основана голема либанска заедница, којашто има клучна улога во локалната економија и трговија. Либанската амбасада во Абиџан ги повика своите сограѓани да не ги напуштаат своите домови, по нападот.

Нападнатиот хотелски комплекс се наоѓа на околу 40 километри од Абиџан, најголемиот град во Брегот на слоновата коска. Благодарејќи на архитектурата типична за колонијалната ера, ова одморалиште е вброено на листата на УНЕСКО како дел од светското културно наследство.

Електронското издание на либанскиот весник An-Nahar наведува дека ова не е прв напад врз хотелски комплекси во Западна Африка во кои отседнуваат странци. Слични напади, се регистрирани претходните месеци во Мали и во Буркина Фасо, во кој се убиени десетици луѓе.

Либанските власти повикуваат дека да се преземат итни колективни мерки против терористичките мрежи во Африка, кои дејствуваат во соработка со екстремната сунитска групација Исламска држава. Во спротивно, предупредуваат, тероризмот ќе се прошири на омилените туристички дестинации на Европејците во Брегот на слоновата коска и Сенегал, како што тоа веќе беше случај во одморалиштата во северна Африка, во прв ред Тунис и Египет./крај/мф/сн

Извор: Макфакс