Македонија
Стар дрвен пловен објект лежи на дното на Охридското Езеро
Стар дрвен пловен објект – моноксил, лежи на дното на Охридското Езеро кај Св. Наум, јавува Охридњус.
Тој бил пронајден минатиот септември од охридските нуркачи Александар Булески и Никола Паскали, инаку студент по археологија, по кажувања на локалниот жител Миле Крстаноски.
Чунот изработен од труп на дрво релативно добро е сочуван во езерските води, но точната негова старост не се знае, бидејќи покрај него не е пронајден друг движен археолошки материјал.
„Единствен начин да се утврди староста на чунот е да се изврши хемиска анализа со таканаречениот метод „Ц-14“, но во Македонија тоа не се прави“ вели Никола Паскали.
Според него пловниот објект може да е од релативно поново време, но може да е и многу стар.
Ваков пловен објект во Охридското Езеро досега не е најден, додека во Преспа се пронајдени повеќе вакви пловила, посочуваат младите нуркачи.
„Кога го пронајдовме чунот го документиравме и ја информиравме Управата за заштита на културното наследство од каде ни беше кажано дека оваа година не се предвидени средства за подводна археологија“ велат Александар и Никола, според кои пронајдениот пловен објект недвосмислено укажува дека луѓето кои живееле тука од многу одамна ги користеле водните патишта за комуникација.
Нуркачите сметаат дека би било добро пронајдениот пловен објект да остане под вода, но да се заштити, бидејќи така би претставувал своевидна туристичка атракција, а би било убаво да се направи и копија од него која би била изложена како музејски експонат./крај/охридњус/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сообраќајот низ државата во зимски услови, магла на патниот правец Гевгелија – граничен премин Богородица
Сообраќајот на државните патишта се одвива во зимски услови, по претежно влажни коловози. Намалена видливост и појава на магла на патниот правец Гевгелија – граничен премин Богородица до 60 метри.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Променливо облачно со сончеви периоди, максималната температура до 11 степени
Променливо облачно со сончеви периоди. Ќе дува слаб, а долж Повардарието умерен ветер од југоисточен правец. Минималната температура ќе биде во интервал од -4 до 3, а максималната ќе достигне од 6 до 11 степени.
Во Скопје, променливо облачно со слаб до умерен ветер од југоисточен правец. Минималната температура ќе се спушти до -1, а максималната ќе достигне до 9 степени.
Времето во наредните денови
Од среда времето ќе биде променливо облачно со повремени локални врнежи од дожд, а на повисоките планини со врнежи од снег. Ќе дува слаб до умерен, а во среда засилен ветер од југоисточен правец. Температурите ќе бидат во пораст.
Македонија
Нормализиран сообраќајот на експресниот пат Кочани-Штип
Од 23:25 часот, вчера вечер сообраќајот на експресниот пат Кочани-Штип целосно е нормализиран, извести АМСМ.
Претходно, од 19:10 часот, поради сообраќајна несреќа на експресниот пат Кочани – Штип во близина на село Тркање, сообраќајот беше во целосен прекин.

