Црна хроника
Скопјанка барала пари од фирми за да им се помогне на полицајците од акцијата во Куманово
Скопјанка лажно се претставувала дека е вработена во Министерството за внатрешни работи (МВР) и сопруга на висок функционер од МВР и барала пари од повеќе фирми со изговор да им се помогне на полицајците коишто учествувале во полициската акција во Куманово.
Последната измама со фирма од Велес којашто имала претставништво во Скопје не и успеала, раководителот ја пријавил и на 2 јуни е приведена. Против нејзе е поднесена кривична пријава за измама и лажно претставување.
Измамничката контактирала со раководителот на фирмата на 1 јуни и му рекла дека фирмата мора да изврши уплата на парични средства во износ од 30.000 денари од жиро сметката на правното лице на жиро сметка на физичко лице непрецизирајќи на која жиро сметка и на кое лице. Им ветила дека за донацијата фирмата ќе добие пофалница од државата.
Но, раководителот на фирмата и рекол дека одлука за исплата на пари може да донесе само директорот, па измамничката побарала да стапи во контакт со него.
Раководителот не и го дал телефонскиот број на директорот и и рекол дека ќе му пренесе за нејзиното барање и дека ќе и се јават.
На 2 јуни раководителот на фирмата и се јавил и и рекол дека директорот одобрил да бидат уплатени 20.000 денари на жиро сметката.
„Но поради неможност книговодствено да биде оправдан износот на паричните средства доколку биде исплатен од жиро сметката на правното лице, мора да и бидат врачени лично на рака, зашто таа треба да му даде документ. Несакајќи да ја пропушти можноста да ги земе паричните средства, а доведена во ситуација да мора да го открие својот вистински идентитет бидејќи условот за да ги земе е да се појави лично, а со намера и натаму да го одржи во заблуда пријавителот, пријавената му кажала дека поради смртен случај неможе лично да дојде за да ги земе парите но ќе прати друго женско лице со име С.Ш. (притоа најавувајќи се себе), која што во нејзино име ќе ги земе парите и ќе му сочини документ за земениот износ, додека пофалницата ќе му ја врачи лично на 08.06.2015 година. На договорената средба околу 13,30 часот во просториите на претставништвото на правното лице во нас.Аеродром, пријавената дошла и претставувајќи се како лице задолжено од наводната службеничка во МВР која треба во нејзино име да ги земе паричните средства и идентификувајќи се со прикажување на својата лична карта, на пријавителот му кажала дека во моментот неможе да му даде документ за паричните средства кои што треба да и бидат дадени. Но за да го наведе да и ги даде парите му кажала дека може да направи фотокопија од нејзината лична карта. По ова, извршено е легитимирање на пријавената, извршен е преглед на нејзиниот личен багаж и на ПМВ кое го управувала по што е лишена од слобода во ПС ОН Кисела Вода“, соопштуваат од МВР.
Скопјанката од 29 мај до 2 јуни се јавила на уште четири фирми и побарала да уплатат пари за полицајците. Против нејзе и претходно биле поднесувани кривични пријави за измама./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Топ
Три лица, меѓу кои и полицаец, осомничени за разбојништво и противправно лишување од слобода
Јавен обвинител од Основното јавно обвинителство Скопје донесе Наредба за спроведување истражна постапка против две лица кои како соизвршители се осомничени за кривични дела – Разбојништво од член 237 став 1 и Противправно лишување од слобода согласно член 140 став 5 од Кривичниот законик.
Двајцата се осомничени дека на 23 април противправно лишиле од слобода едно лице, така што го повикале да излезе со изговор дека им е потребна помош, а потоа присилно го внеле во автомобил и се упатиле кон мостот на улицата “Беласица”.
Со возилото управувало трето лице – полициски службеник против кого постапката е издвоена и ќе ја води Одделението за гонење кривични дела сторени од лица со полициски овластувања и припадници на затворската полиција при Основното јавно обвинителство за гонење на организиран криминал и корупција.
Додека полицискиот службеник возел, двајцата други осомничени му се заканувале на оштетениот и му нанеле убодни рани со нож во ногата и во рамото. Кога стигнале под мостот, насилно го извадиле од автомобилот и сите тројца физички го нападнале со удари со клоци и тупаници по целото тело, нанесувајќи му тешки повреди.
Му одзеле околу 8.000 денари колку што имал оштетениот со себе во моментот, а потоа го пуштиле да си оди со закана дека доколку до 1 мај не им исплати 10.000 евра ќе го убијат и него и неговиот татко.
Основното јавно обвинителство Скопје до Основниот кривичен суд Скопје достави предлог за определување мерка притвор за двајцата осомничени против кои постапува. Едниот од нив е во бегство и притворската мерка ќе започне да се применува од неговото пронаоѓање и лишување од слобода.
Топ
Уапсени крадци на автомобили – ги расклопувале за делови
Единицата за внатрешни работи Центар и Бит Пазар при СВР Скопје поднесе кривична пријава против Ш.Н.(68) од Липково, поради постоење основи на сомнение за сторени 4 кривични дела „одземање на моторно возило“, од кои три на подрачјето на скопски Центар и едно на подрачјето на општина Аеродром, како и против Ф.Љ.(22) од Скопје, поради постоење основи на сомнение за сторено кривични дело „помагање“.
Имено, првопријавениот кривичните дела ги извршил во последните два месеца, така што со употреба на физичка сила и погоден алат ги отворал бравите од возилата, ги одземал возилата и ги предавал на второпријавениот, каде што возилата биле расклопувани и продавани за делови.
Полициски службеници со судска наредба извршиле претрес на локација, сопственост на Ф.Љ., каде биле пронајдени поголема количина делови од возила кои потекнуваат од кривичните дела. Известен бил Јавен обвинител, а од страна на Судија на претходна постапка на Ш.Н. му е одредена мерка притвор.
Топ
Две жртви во сообраќајката на патот Радовиш-Штип, уште едно лице повредено
Две лица загинаа на лице место во сообраќајната несреќа што се случи попладнево на магистралниот пат Радовиш-Штип.
Во несреќата е повредена и сопатничката од едното возило, која е пренесена во штипската Болница.
Веста за „Макфакс“ ја потврди портпаролката на СВР Струмица, Александра Трајанова, која информираше дека во несреќата учествувале автомобили „пасат“ и „опел“.
„На местото на несреќата починале возачите на двете возила, смртта ја констатирал лекар од „ЈЗУ Здравствен дом Радовиш“ а сопатничка од патничкото возило „опел” била пренесена во Медицински центар Штип“, информира Трајанова.
Увид на местото на несреќата врши јавен обвинител, а сообраќајот се пренасочува по стариот пат.
Од полицијата повеќе детали за несреќата најавуваат за утре.