Гувернерот од сојузната држава Вермонт, Берни Сандерс, ги повика Американците за нова претседателка да ја изберат Хилари Клинтон, и покрај јасните негодувања на неговите приврзаници, која треба да ја прифати номинацијата во четвртокот, пренесуваат агенциите.

Противкандидатот на Хилари Клинтон, Берни Сандерс доживеа триминутни овации кога излезе на сцената на демократската конвенција во Филаделфија, но и свирежи од добар дел од аудиториумот кога ги повика своите следбеници да гласаат за Клинтон. „Хилари мора да стане идната претседателка на САД“, рече Сандерс.

Приврзаниците на Сандерс негодува секој пат кога тој ќе ја споменеше Хилари Клинтон, Кога во завршниот говор ги повика да ја поддржат неговата до неодамнешна ривалка, неговите следбеници во воздух подигнаа плакати со неговото име и го скандираа неговото име.

Сандерс го критикуваше републиканскиот претседателски кандидат Доналд Трамп, велејќи дека тој е „опасен за иднината на земјата“ и порачувајќи дека „мора да биде поразен“. Меѓутоа, значителна група од аудиториумот со свирежи на негодување реагираше кога ја изговори реченицата „Хилари Клинтон мора да биде избрана“.

„Браќа и сестри, живееме во стварен свет. Трамп е насилник и демагог“, рече Сандерс. На тоа се слушнаа гласни повици „И Хилари исто така“,„Таа ги украде изборите“, извикуваа од публиката во арената „Wells Fargo“ во предградие на Филаделфија.

Некои од приврзаниците на Сандер плачеа а некои ги залепуваа своите усти на кои пишуваше „неми“,

„Додека Доналд Трамп ги навредува групите една по друга, Хилари разбира дека нашата различност е нашата најголема сила“, истакна Сандерс. „Доколку мислите дека овие избори не се важни, дека би требало да останете дома, размислите за тоа кого Доналд Трамп сака да кандидира за врховни судии и што би значело тоа за граѓанските слободи, права и за иднината на земјата“, додаде.

Првата дама Мишел Обама, исто така, предизвика одушевување поради говорот во кој го критикуваше републиканскиот кандидат Доналд Трамп.

„Немојте никому да дозволите да ви зборува дека оваа земја повеќе не е голема, дека треба повторно да биде направена голема“, рече Мишел Обама алудирајќи на слоганот на Доналд Трамп „Да ја направиме Америка повторно голема“. „Бидејќи таа, токму сега, е најголемата земја на светот“, истакна сопругата на актуелниот американски претседател Барак Обама.

Првата дама на САД ја истакна важноста на Хилари Клинтон која „непоколебливо се бори настојувајќи да го разбие стаклениот плафон“, мислејќи на невидливите пречки за напредување на жените во американскиот општествен живот. „Благодарејќи на Хилари Клинтон, моите ќерки и сите наши деца отсега сметаат дека е нормално една жена да стане претседател на САД“, заклучи Мишел Обама.

Демократската партија е потресена од објавата на повеќе од 19.000 електронски пораки на Националниот комитет на Демократската партија (DNC), главното управно партиско тело, во петокот на WikiLeaks, во кои се открива дека од членовите на овој комитет кои треба да бидат неутрални, се барало да дадат поддршка за Клинтон и да изнаоѓаат начини и преку медиумите да го дискредитираат Сандерс, на што и овој самиот се жалеше.

Тоа беше причина претседателката на DNC, Деби Васерман-Шулц во неделата вечерта да објави специјална изјава во која ја објави својата намера да ја напушти функцијата по партиската конвенција.

Околу 50.000 луѓе, меѓу кои 5.000 партиски делегати, се очекуваат на четиридневната конвенција на демократите која завршува во четврток кога Хилари Клинтон и официјално ќе ја прифати партиската номинација за претседателски кандидат.

Испитувањето на јавното мнение кое го објави CNN/ORC во понеделникот покажува дека Доналд Трамп има водство од три процентни поени пред Хилари Клинтон./крај/мф/сн

Извор: Макфакс