Регион
Грчките претседателски избори закажани за 17-ти декември
Претседателските избори во Грција ќе се одржат два месеца порано, на 17-ти декември, објави во понеделникот доцна вечерта владата во Атина, а првото гласање ќе се одржи на 17-ти декември, додека кандидатите ќе бидат познати следните денови.
Наследникот на претседателот на заминување Каролос Папуљас, чиј втор мандат истекува на 13-ти март 2015 година и според Уставот на Грција не може да биде избран за уште еден мандат, се избира во три круга. Доколку владејачката коалиција не успее да го истурка кандидатот по нејзин избор, тогаш ќе мора да се распишат предвремени парламентарни избори.
Гласањето доаѓа во период кога владата на премиерот Антонис Самарас губи на популарноста во полза на радикалната лева коалиција Сириза. Политичката неизвесност е една од главните причини за недовербата во грчкиот финансиски систем. Владата ја обвинува левицата дека ја поттикнува нестабилноста, спречувајќи ја земјата да се ослободи од туторството на меѓународните доверители воведено по избувнувањето на должничката криза во 2010 година, кога се закануваше банкрот на земјата и нејзино излегување од еврозоната.
Опозицијата, којашто е убедена во својата победа според она што го покажуваат анкетите, веќе извесен период бара предвремени избори, ветувајќи дека ќе преиспита многу од непопуларните мерки за штедење што ги донесе владата на коалицијата составена од конзервативците од Нова демократија на Антонис Самарас и социјалистите од Пасок на Евангелос Венизелос.
Во неделата за време на дебатата во грчкиот парламент по предлог буџетот за 2015 година, претседателските избори земаа повеќе простор во пратеничките дискусии отколку самиот буџет. Владата смета дека предвремените избори ќе го поткопаат економското заздравување на земјата. Некои владини претставници тврдат дека ги обезбедиле потребните 180 гласови во 300-челниот парламент, меѓутоа владејачката коалиција располага со само 155 мандати во парламентот, колку што и го гласаа буџетот за следната година во понеделникот изутрината.
Во соопштението од понеделникот навечер, портпаролката на Самарас, Софија Вултепси, е наведено дека „отвореното и пркосно поттикнување на пратениците од опозицијата со цел да се оневозможи изборот на претседател на државата и да се предизвикаат предвремени избори, ја поткопуваат преговарачката позиција на Грција и испраќаат сигнал за неизвесност на пазарите“.
„Тоа ја поткопува националната економија, и ќе има последици за претприемачите и домаќинствата, работниците и невработените. Владата не може да ја дозволи таа отворена подривачка активност. Политичката неизвесност мора да престане“, се вели во владиното соопштение во коешто се додава дека од тие причини Самарас и Венизелос го информирале претседателот Папуљас за решението од спикерот на парламентот да побараат што за избор на шеф на државата и изборот да започне на 17-ти декември/крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Маж во Тузла ги убил сопругата и двете деца
М.Ч. синоќа во Тузла ги убил сопругата и двете малолетни деца, а потоа си го одзел животот скокајќи од 14 кат од зграда.
Маж се самоуби синоќа околу 21 часот и 15 минути, а денеска полицијата во станот го пронашла телото на неговата 34-годишна сопруга и децата на возраст од две и девет години.
Според неофицијалните информации кои ги објавија сараевските медиуми, мажот работел како медицински техничар во Германија, а во Тузла пристигнал пред неколку дена.
Истражните екипи денеска пронајдоа секира во станот во населбата Ступине во Тузла, со која наводно ги убил сопругата и децата.
Портпаролот на обвинителството во Тузла, Адмир Арнаутовиќ изјави дека ќе бидат издадени наредби за обдукција на телата на загинатите за да се утврдат точните причини за смртта.
Ќе биде издадена наредба за биолошко вештачење, ДНК анализа, како и други истражни дејствија и вештачења, со цел да се утврдат сите околности поврзани со овој настан, вклучително и начинот и начинот на трите убиства“, рече Арнаутовиќ.
Регион
Вучиќ изрази сочувство за смртта на Раиси
Претседателот на Србија, Александар Вучиќ, изрази сочувство до народот и владата на Иран во врска со смртта на претседателот на таа земја, Ебрахим Раиси.
„Изразувам сочувство до народот и владата на Исламската Република Иран за смртта на претседателот Ебрахим Раиси, искрен и доследен пријател на Србија“, напиша Вучиќ на својот профил на мрежата Х.
Хеликоптерот со Раиси и министерот за надворешни работи Хосеин Амир-Абдолахиан се урна во неделата во северозападниот дел на Иран, во областа Верзеган, а покрај двајцата загинаа уште шест лица.
Регион
18-годишник е уапсен бидејќи го запалил хрватското знаме и го споделил на социјалните мрежи
Осумнаесетгодишник е уапсен во Славонија бидејќи на 1 мај го запалил хрватското знаме во шумата кај Трпија.
Како што дознала полицијата, тој тоа го снимил и го објавил на социјалните мрежи.
„На овој начин тој јавно го подложи знамето на Република Хрватска на потсмев и грубо омаловажување и на јавноста и стави на располагање видео од тој чин преку компјутерска мрежа, во кое повикува на насилство или омраза насочена кон група луѓе поради нивната национална или етничка припадност“, наведува полицијата во кривичната пријава.
Пријавата го товари младиот човек за јавно поттикнување насилство и омраза и нарушување на угледот на Република Хрватска. За овие злосторства му се заканува затворска казна до три години.
Од полицијата потврдија дека со решение на Жупанискиот суд во Вуковар, на 18-годишникот му е одредена мерка притвор.