Водечкиот меѓу кандидатите на Републиканската партија за стекнување на партиската номинација на ноемвриските претседателски избори во САД, Доналд Трамп, победи во сите пет сојузни држави во коишто во вторникот се одржуваа предизборите на ткн трет „супервторник’, додека кај Демократската партија Хилари Клинтон го потврди водството победувајќи во четири држави, што и за двајцата преставува чекор поблиску до конечната трка за Белата куќа.

Милијардерот Доналд Трамп победи со голема разлика во сите пет држави, во Мериленд освои 55 отсто од гласовите, во Пенсилванија – 57,2 отсто, во Делавер – 60,8 отсто , во Конектикат – 59 отсто и во Род Ајланд победи со освоени 63,6 отсто од гласовите на републиканските избирачи.

„Сите пет! Тоа е далеку подобро од очекуваното!“, изјави Трамп пред своите приврзаници во Њујорк, каде што ги очекуваше резултатите.

Со овие победи бројот на делегатите кои ги обезбеди досега Трамп за републиканската конвенција се искачи на 950 од потребните 1.237 за номинацијата. Изјави дека веќе се смета себеси за предодреден кандидат на Републиканската партија и изјави дека е време неговите противкандидати, сенаторот од Тексас Тед Круз и гувернерот на Охајо Џон Кесик да се повлечат од трката.

Меѓутоа, Круз и Кесик, откако склучија договор меѓусебно да не се напаѓаат во кампањата, во медиумите наречени како коалиција „Стоп за Трамп“, имаат цел њујоршкиот магнат да го попречат во освојувањето на апсолутното мнозинство делегати. Во тој случај националната конвенција на Републиканската партија би дошла во состојба на ткн „отворена конвенција“ која поради ненаклонетоста кон него на партискиот врв може да ја загуби, иако ќе биде релативен победник на предизборниот циклус.

На неговите протвикандидати, Тед Круз и Џон Кесик, целта им е токму спротивна, да изборат отворена конвенција. Затоа тие двајцата во неделата објавија дека нема да се попречуваат меѓусебно на претстојните предизбори. Од изборниот штаб на Круз соопштија дека тој ќе се фокусира на Индијана и ќе му се истави од патот на Кесик во Орегон и во Ново Мексико, држави во коишто гувернерот на Охајо се надева дека ќе мине добро. За возврат, Кесик, се согласи да се откаже од кампањата во Индијана.

Ултраконзервативниот Круз веќе ги заборави североисточните држави кои не му се наклонети, и се сврти токму кон Индијана, каде што ќе се гласа на 3-ти мај. „Имам добра вест за вас: вечерва кампањата се сели на попристапен терен“, им порача Круз на своите приврзаници.

Хилари Клинтон, пак, кај демократите во вторникот победи во Делавер со 59,7 отсто од гласовите, во Мериленд со 63,4 отсто, во Пенсилванија со 56,6 отсто,и во Конектикат со 51 отсто. Берни Сандерс го освои малиот Род Ајланд со 57,7 проценти.

Со тоа бројот на делегатите кои ги обезбеди досега поранешната државна секретарка и прва дама се искачи на 2.141 од потребните 2.383 за конвенцијата на Демократската партија.

Иако најверојатно и на самиот нему му е јасно дека повеќе не може да ја стаса, Сандерс не мисли да се предаде. „Луѓето во сите држави имаат право на свој глас, во сите држави имаат право да кажат кого сакаат за претседател, Затоа нема да се повлечеме се додека и последниот глас не биде во избирачката кутија“, порача.

Клинтон, чувствувајќи дека победата и е сосема блиску, веќе започна да работи на придобивањето на партиското единство. „Без оглед дали го поддржувате сенаторот Сандерс или ме поддржувате мене, има многу повеќе нешта коишто нé спојуваат, отколку што нé разделуваат“ порача./крај/мф/сн

Извор: Макфакс