– Фотографијата објавена во Long War Journal на 16-и јуни 2015-та, го прикажува новиот талибански лидер мулата Актар Мохамад Мансур

Авганистанските талибани ја потврдија во четвртокот смртта „предизвикана од болест“ на нивниот водач мулата Мухамед Омар, откако во средата навечер оваа вест ја објави авганистанската влада, се наведува во извештаите на агенциите, а талибански извори соопштиле дека за нов челник е именуван мулата Актар Мохамад Мансур.

Авганистанските талибани ја потврдија во четвртокот смртта „предизвикана од болест“ на нивниот водач мулата Мухамед Омар, откако во средата навечер оваа вест ја објави авганистанската влада, се наведува во извештаите на агенциите, а талибански извори соопштиле дека за нов челник е именуван мулата Актар Мохамад Мансур.

„Штабот на Исламскиот емират (како што себеси се нарекуваат талибаните – з.м.) и семејството на мула Омар ја објавуваат смртта на втемелувачот и водачот на талибаните којашто уследи како последица на болеста“, се наведува во соопштението на талибаните испратено до агенциите.

Во соопштението талибаните, исто така, не ја наведуваат болеста од којашто боледувал мулата, само велејќи дека „неговата здравствена состојба се влошила последните две седмици“, додавајќи дека следните три дена ќе се одржуваат религиозните церемонии „во молитви за душата на мула Омар“.

Поради смртта на мулата Омер, како што објави Пакистан, се одложува вториот круг од мировните власти меѓу Кабул и талибаните, којшто требаше да се одржи во петокот.

Неименуван висок командант на авганистанските талибани во егзил во Пакистан за тамошниот весник Express Tribune во четвртокот изјавил дека ова радикално исламистичко движење за свој нови лидер го избрало мулата Актар Мохамад Мансур,

И агенцијата Reuters од извори во пакистанскиот град Пешавар блиски до Шурата чиишто повеќе членови се стационирани во пакистанскиот град Квета, пренесува дека талибаните за нов челник го избрале мулата Мансур. „Шурата одржана надвор од Квета едногласно мула Мансур го избра за нов емир на талибаните“, рекол еден од командантите за агенцијата.

Според оцените на агенцијата, изборот на мула Мансур нема да наиде на одобрување кај некои талибански команданти на теренот, бидејќи се критични кон мировниот процес за кој наводно и тој се залага, и најавуваат продолжување на битката за превласт.

За некои регионални аналитичари именувањето на Мансур за нов талибански лидер, претставува помалку и изненадување, бидејќи претходно беше познато дека мулата Омар како свои заменици ги именуваш мулата Барадар Акунд и мулата Убајдулах Акунд, а Барадар многумина го гледаа како негов наследник на чело на бунтовниците.

Мансур ќе биде само вториот водач на талибаните во Авганистан по мулата Омар, кој ова ултраконзервативно исламистичко движење го основаше пред 1990-те години во времето на повлекувањето на советските војски. Наметнувајќи го строгото шеријатско право, талибаните многу брзо освоија големи делови од Авганистан.

Како челник на талибанскиот режим, мулата Омар дефакто беше претседател на Авганистан во периодот од 1996 до 2001 година, а почна да се крие по американската инвазија со која беше соборен. Мула Омар ги водеше талибаните во победата над ривалските авганистански милиции во граѓанската војна којашто избувна по повлекувањето на советските војски од земјата.

Неговиот сојуз со глобалната терористичка мрежа Ал Каеда, односно нејзиниот основач и идеолог убиениот во Пакистан Осама бин Ладен, се смета за главната причина за американската инвазија во 2001 година, по терористичките напади врз САД од 11-ти септември таа година. Оттогаш Омар постојано успешно се криеше, а Вашингтон објави награда за информации во врска со него од десет милиони долари.

Авганистанската влада во средата изрази убеденост во информациите според кои мулата Омар починал уште пролетта 2013 година во болница во пакистанскиот град Карачи. Веста за неговата смрт го загрози мировниот процес со кој треба да заври 13-годишниот судир меѓу талибаните и владата во Кабул која ја има поддршката на Западот. Во мировниот процес посредува Пакистан, каде што петок беше најавен вториот круг од преговорите./крај/мф/сн

Извор: Макфакс