Општество
Денот на АРМ одбележан во Штип
Штипската касарна „Јане Сандански“ во понеделникот го одбележа Денот на АРМ, 18.ти август во присуство на градоначалници од регионот, воени лица и граѓани од градот, пренесува „1.мк“.
Прво беше положено цвеќе на споменикот „Македонија“ во знак на почит на паднатите херои од НОБ и од конфликтот во 2001, по што се оддржа централната свеченост на која говореше командантот на 2.механизиран пешадиски батаљон, потполковник Стојанче Тодоров:
Не беше воопшто лесно да се изгради Армијата на Македонија. Низ сите изминатите децении, уште од создавањето во екот на НОБ, Македонската армија стана симбол на мирот и признаена институција во светски рамки. За 12 години, над 3000 припадници на АРМ учествуваа во различни мировни мисии во светот, од БиХ, до Ирак и Авганистан со што се стекна со респект и реноме признаено од нашите партнери“, рече Тодоров.
Градоначалникот на Штип, Илчо Захариев напомена дека соработката со АРМ во Штип е беспрекорна и на многу високо ниво:
„Јас сакам како прво да им го честитам Денот на АРМ на сите припадници на нашата армија. Можам со гордост да кажам дека нашата војска израсна во вистинска модерна армија, со признаено учество во мировни мисии и операции ширум светот, што е јасен показател за квалитетот кој го имаме. Лично сакам во континуитет да јакне нашата армија бидејќи таа е гарант на мирот и безбедноста. Оваа година, на наша иницијатива, во соработка со академскиот сликар Никола Бојаџиев реализиравме и една изложба на која може да се види униформата или македонскиот војник низ сите епохи, уште од пеонско време, преку античкиот период, средновековието, комитското и партизанското време, се до модерната македонска армија. Станува збор за 15 цртежи, кои покажуваат развој на макеоднската војска низ различни цивилизации и епохи.Оваа изложба и ја подаруваме на командата на штипската касарна, бидејќи тие тоа и го заслужуваат“, рече Захариев.
Тој напомена дека до сега припадници на АРМ учествуваа на поголем дел од проектите кои ги реализира локалната самоуправа, тргнувајќи од транспортот на камен за уредување на коритото на Отиња, преку изградбата на пешачката патека зад Исаорт или уредување на парковите површини низ градот./крај/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Г.г. Стефан: Да ги зацврстиме единството и слогата, да ги надминеме разногласијата и меѓусебните поделби
Ариепископот Охридски и македонски заедно со Светиот архиерејски Синод, по повод велигденските празнувања, испраќа мир и благослов од Бога до свештенослужителите, монаштвото и до сите чеда на МПЦ-ОА.
– Христовото воскресение е смислата на нашето севкупно постоење. Тоа е стожерот околу којшто се одвива сиот наш живот и камен-темелникот врз којшто се гради сиот наш подвиг на верата, на надежта и на љубовта во Бога. Тајната на Христовото воскресение го преобразува и го вообличува севкупниот наш поглед кон светот и човекот, кон времето и вечноста. Зашто, токму ова спасоносно собитие е најголемата вистина којашто му беше објавена на човековиот род и токму оваа Тајна над тајните е најрадосното благовестие со коешто велегласно беше возвестена конечната победа на животот над смртта, на доброто над злото и на љубовта над омразата, вели г.г. Стефан меѓу другото во обраќањето.
Македонија
Православните верници го слават Велигден
Православните верници денеска го слават најголемиот христијански празник Велигден – Христовото воскресение, ден кога Исус Христос ја докажал својата божествена моќ и воскреснал од мртвите. Воскресението Христово на полноќ беше објавено во сите храмови на Македонската православна црква, а денеска се одржуваат воскресенски литургии.
Поглаварот на МПЦ-ОА г.г. Стефан богослужеше во Соборниот храм „Свети Климент Охридски“ во Скопје од каде го објави Христовото Воскресение и упати Велигденски пораки.
Македонија
Годишен извештај на Народниот правобранител: Помалку претставки од граѓаните за работата на јавните обвинителства
Во извештајната 2023 година, во областа која се однесува на работата и постапувањето на обвинителствата во Република Северна Македонија поднесени се 63 претставки што е за 24 помалку во однос на 2022 година, се констатира во Годишниот извештај за степенот на обезбедувањето почитување, унапредување и заштита на човековите слободи и права во 2023 година што го објавува Народниот правобранител на Република Северна Македонија.
Согласно објавените податоци, бројот на претставки на граѓаните на годишно ниво се намалил за повеќе од 38%, што претставува резултат на заложбите на Јавното обвинителство за зголемување на ефикасноста на постапките и континуираните напори за подобрување на довербата на граѓаните во работата на јавните обвинителства.
Во најголем број од претставките граѓаните бараа интервенција во врска со постапки пред основните јавни обвинителства (51), потоа пред Основното јавно обвинителството за организиран криминал и корупција (4), постапка пред Јавното обвинителство на РСМ (3), пред вишите јавни обвинителства (2), друго (2) и една претставка се однесуваше за постапка пред Совет на јавни обвинители. Ваквиот сооднос е очекуван со оглед на обемот на предметна работа и фактот што токму јавните обвинителства со основна надлежност го прават првиот директен контакт на граѓаните со институцијата.
Доколку се има предвид вкупниот обем на работа на јавните обвинителства кои активно постапуваат по поднесени кривични пријави за над 40.000 сторители на кривични дела во текот на годината, поднесените 63 претставки до Народниот правобранител претставуваат околу 0,1% од таа бројка. Притоа, граѓаните во посочените предмети изразувале незадоволство поради непостапување по поднесена пријава на кривично дело, одолжување на постапката или поради незадоволство од донесена одлука. Од тие причини Народниот правобранител, меѓу останатите препораки во извештајот, во делот на Јавното обвинителство препорачува основните јавни обвинителства да ги доставуваат јавнообвинителските одлуки до странките и да им се овозможи правото да ги обжалат до повисоките јавни обвинителства, да постапуваат поажурно и навремено да преземаат дејствија, да го почитуваат рокот од 3 месеци доколку не донесат јавнообвинителска одлука да го известуваат повисокиот јавен обвинител и пријавителот, за да нема сомневање и страв дека гонењето ќе застари.
Сите овие забелешки Јавното обвинителство ги зема предвид, детално ги анализира и ќе продолжи да презема активности за дополнително зголемување на ефикасноста, на транспарентноста и на отчетноста за постапките што ги води. Ваквите заложби на Јавното обвинителство се веќе воспоставен начин на работа при што уште во извештајот за 2022 година омбудсманот констатираше дека за разлика од претходните години, сега јавните обвинителства, особено издвојувајќи ги Основното јавно обвинителство Скопје и Основно јавно обвинителство за гонење на организиран криминал и корупција, постапуваат по барањата на Народниот правобранител, даваат суштински и целосни одговори за бараните информации од постапките, се вели во соопштението од Јавното обвинителство.