Бројот на загинатите во експлозијата во неделата утрото во квартот Карада во централниот кварт на ирачката престолнина Багдад се зголеми на 167 а уште 180 се ранети, објави во неделата вечерта по локално време ирачката агенција INA повикувајќи се на Советот за безбедност на покраината Багдад.

Претходно телевизијата Al Jazeera, повикувајќи се на свои извори во Багдад, објави за 131 загинат во еден од најсмртоносните напади изведен во главниот град на Ирак последните повеќе години.

„Од експлозијата во Карада вечерва имаме 167 загинати и уште 180 ранети“, изјавил за новинарите членот на советот на покраината Багдад, Галиб ал-Замли. Според него, овие бројки не се конечни, бидејќи многу од повредените се наоѓаат во критична состојба.

Нападот со автомобил бомба се случи во близина на шиитскио религиозен објект во трговскиот багдадски кварт Карада, каде многу жители на главниот град на Ирак одат да пазарат пред прославата со којашто се одбележува завршувањето на светиот муслимански месец рамазан.

Во соопштението кое го објави американскиот интернет ресурс SITE за следење на интернет страниците кои ги користат екстремистите, се наведува дека екстремната сунитска Исламската држава објавила дека еден нејзин самоубиец активирал автомобил бомба во квартот во кој живеат шиитски муслимани, кои сунитските џихадисти ги сметаат за еретици.

Втората експлозија во неделата утрото во североисточен Багдад одекнала на отворениот пазар во квартот ал-Шааб, при што се убиени пет и ранети се уште други пет лица, пренесува ирачката државна телевизија.

Премиерот Хајдар ал-Абади го посетил местото на првиот напад, но брзо го напуштил испратен со гневните реакции на локалните шиити кои бараа порешителна акција кон екстремните сунитски групи, пренесува порталот аl-Sumaria.кт, каде многу жители на главниот град на Ирак одат да пазарат пред прославата со којашто се одбележува завршувањето на светиот муслимански месец рамазан.

Заменикот на комитетот за безбедност на покраинскиот парламент на Багдад, Мохамед ал-Робаи рекол дека „министерството за одбрана нема доволно ресурси и не е способно да управува со безбедноста на Багдад“, пренесе агенцијата INA.

Ал-Робаи истакнал дека комитетот за безбедност повеќепати истакнувал дека контролните пунктови се бескорисни, бидејќи безбедноста во главниот град и во другите покраини не се потпира на присуство на постојан број припадници на безбедносните сили, како и дека затајуваат разузнавачките служби,

Овие напади се случија една седмица откако Исламската држава по повеќенеделната офанзива го загуби стратешкиот град Фалуџа, 50 километри западно од Багдад. Нападот покажува, исто така, дека џихадистичката организација има уште капацитети да задава смртоносни удари во ирачката престолнина, а особено нејзина цел се шиитските населби.

Претходниот голем напад на Исламската држава во Багдад беше изведен на 17-ти мај. Тогаш во двоен атентат во две населби загинаа околу 50 лица, со повеќе од 100 ранети. Таа седмица речиси 200 луѓе загинаа во Багдад и околината во терористички напади.

Според најновите податоци на ОН, во текот на јуни во насилствата во Ирак загинале вкупно 662 цивили, а други 1.457 биле ранети. Само во Багдад, кој е најтешко погодената област, регистрирани се 236 цивилни жртви и 742 ранети./крај/мф/сн.

Извор: Макфакс