По спроведена истражна постапка, Основното јавно обвинителство Битола поднесе обвинение против осум физички и едно правно лице за злоупотреби поврзани со постапки за јавни набавки во РЕК Битола.

Во текот на 2023 година, петмина од обвинетите, како службени лица – директори и раководители на подружници во РЕК Битола, вклучувајќи го и директорот на комбинатот, вршеле продолжено кривично дело – Злоупотреба на службената положба и овластување од член 353 став 4 во врска со став 1 од Кривичниот законик.

Тие заедно не ја извршиле својата службена должност за законито и совесно постапување и ги повредиле начелата на економичност, ефикасност, ефективност, сразмерност и конкурентност предвидени во Законот за јавни набавки.

Со намера да прибават противправна имотна корист за друг, обвинетите распишале и спровеле постапка за јавна набавка за дислокација на погонските станици од рудникот “Осломеј” во рудниците на РЕК Битола, со цел да се воспостави нов транспортен систем за рудата во РЕК, иако знаеле дека таквиот транспортен систем е спротивен на основниот проект и несоодветен за технолошкиот процес на ископ на откривката, јагленот и меѓуслојната јаловина, како и за транспорт на јагленот во рудниците на РЕК. Имено, поради неправилната форма на површинскиот коп и поради малиот век на експлоатација (околу 14 години) во рудникот Живојно не е предвидена примена на методата за откопување со континуирана технологија (роторни багери и транспортни ленти) какви што биле дислоцираните погонски станици од Осломеј.

Обвинетите го навеле Управниот одбор да го измени Годишниот план и да овозможи реализација на јавната набавка, а минималните услови за учество на тендерот ги предимензионирале, фаворизирајќи само едно правно лице. Со тоа и овозможиле на обвинетата компанија да се јави како единствен понудувач и да го добие тендерот вреден 90.000.000 денари без ДДВ (106.200.000 денари со вклучен ДДВ).

Првообвинетиот сопственик на фирмата, двајца вработени и правното лице се товарат за кривично дело – Злоупотреба на постапка за јавен повик или јавно-приватно партнерство од член 275-в, бидејќи свесно ги повредиле прописите за постапката со потпишување и поднесување на невистинита документација во која тврделе дека работите на монтажа на погонските станици се завршени, иако донесената механичка и електроопрема стоела расфрлана во кругот на РЕК Битола. Незавршената обврска ја наплаќале врз основа на невистинитата документација со што правното лице се стекнало со противправна имотна корист од големи размери. Ова им го овозможиле и тројца од обвинетите директори и раководители во РЕК Битола, кои во 2024 година ги потпишувале записниците и извештаите за наводно извршени работи, иако знаеле дека се невистинити, со што го навеле оштетеното правно лице РЕК Битола да изврши незаконита исплата и сториле продолжено кривично дело – Измама во службата од член 355 став 3 од Кривичниот законик.

Со обвинението, јавниот обвинител предложи да биде одземен износот од околу 1,7 милиони евра со ДДВ кои и биле исплатени на компанијата како резултат на сторените кривични дела.

За таа цел, обвинителството во текот на постапката, користејќи и инструменти на меѓународна правна помош, лоцираше и обезбеди 1,2 милиони евра, 1.000 швајцарски франци, 3 златни монети и 1 златна плочка од банкарски сеф во Белград, сопственост на првообвинетиот, како и над 500.000 евра на сметки во домашни банки. Дополнително, замрзнати се и 10 нови товарни и приклучни возила набавени во 2025 година од фирма во Србија во сопственост на првообвинетиот, кои исто така можат да бидат предмет на конфискација.

Сознанијата на истрагата се дека обвинетиот поседува две компании во Србија, од кои едната основана на крајот на 2024 година, но и дека согласно анализираното движење на паричните средства има јасна тенденција тој да ги префрла парите со кои располага кон тие компании. Исто така, обвинителството го ценеше фактот дека обвинетиот одржува блиски врски и со други држави каде би можел да има парични средства, што го прави сериозен ризикот од бегство, па јавниот обвинител до судијата на претходна постапка достави предлог за продолжување на претходно определената мерка притвор за овој обвинет со цел негово обезбедување во текот на судската постапка.

Демократот Зохран Мамдани вчера официјално ја презеде функцијата градоначалник на Њујорк, ветувајќи за време на јавната церемонија на положување заклетва пред Градското собрание дека ќе спроведе амбициозна програма насочена кон тоа најголемиот град во Америка да биде подостапен за работничката класа.

Мамдани, кој има 34 години и припаѓа на левото крило на Демократската партија, односно демократските социјалисти, беше избран за градоначалник во ноември. Неговата победа се смета за политички значајна бидејќи би можела да влијае на среднорочните избори, на кои ќе се одлучи која партија ќе ја има контролата врз Конгресот на Соединетите Американски Држави.

Додека некои демократи го прифаќаат неговиот политички стил и пораки, републиканците го претставуваат на националната сцена како спротивност на нивните сопствени вредности. За време на кампањата, Мамдани стави силен фокус на растечките трошоци за живот, а во исто време остро го критикуваше претседателот на Соединетите Американски Држави, Доналд Трамп, чиј рејтинг на одобрување се намали во текот на изминатата година поради загриженост за состојбата на економијата.

Многумина од речиси осумте милиони жители на Њујорк очекуваат, со голем интерес, но и со поделени чувства, дека Мамдани ќе стане политичка фигура која значително ќе го потресе постојниот поредок.

Зборувајќи по јавната заклетва, Мамдани ги повтори клучните ветувања од кампањата, вклучувајќи универзална грижа за деца, прифатливо домување и бесплатен градски автобуски превоз.

„Ќе одговараме пред сите граѓани на Њујорк, а не пред кој било милијардер или олигарх кој мисли дека може да ја купи нашата демократија. Бев избран како демократски социјалист и ќе владеам како демократски социјалист“, рече Мамдани.

Инаугурациската програма вклучуваше говори на американскиот сенатор Берни Сандерс и конгресменката Александра Окасио-Кортез, истакнати претставници на либералното крило на Демократската партија и политички сојузници на Мамдани.

И покрај екстремно ниските температури, градот организираше простор покрај Бродвеј за да ја гледа церемонијата во живо, со музички изведби и дополнителна програма.

Мамдани положи заклетва на Куранот и стана првиот муслиман градоначалник на Њујорк. Пред јавната церемонија, Мамдани положи заклетва приватно во првите минути од новата година на историската станица на метрото „City Hall“, која не се користи за редовен сообраќај со децении.

Во согласност со неговата исламска вера, тој положи заклетва на Куранот, светата книга на исламот, што претставува прв таков случај во историјата на Њујорк кога станува збор за инаугурација на градоначалник.

фото/ЕПА

Снимка што кружи на социјалните мрежи покажува луѓе како бегаат во паника од барот во ски-центарот во Швајцарија во кој на новогодишната ноќ избувна пожар.

Некои избегале низ прозорци, додека излезот бил преполн со луѓе. Според досегашните информации, се чини дека објектот немал доволно излези за итни случаи.

 

View this post on Instagram

 

A post shared by Maurizio Molinari (@maurizio_molinari_)

Според последните информации најмалку 47 лица загинаа, а над 100 се повредени во пожарот во швајцарскиот скијачки центар Кран-Монтана. Несреќата се случи рано наутро за време на новогодишната ноќ. Пожарот избувнал околу 1:30 часот по локално време во барот Le Constellation, а причината сè уште не е позната, објавува BBC.

„Капацитетот на Швајцарија за лекување на тешки изгореници е ограничен и веројатно е дека некои пациенти ќе бидат префрлени во соседните земји на лекување“, изјави Матијас Рејнард, претседател на регионалната влада на кантонот Вале.

Претседателот на Швајцарскиот федерален совет, Ги Пармелин, додаде дека во наредните денови, посебен акцент ќе се стави на лекувањето на најтешките случаи на изгореници.

„Сакаме да бидеме ефикасни и да обезбедиме спасување на животи“, рече Пармелин.

Причината за пожарот е под истрага, многу работи сè уште се нејасни. Кога беше прашана дали во барот биле користени шишиња со распрскувач, кантоналната јавна обвинителка на Вале, Беатрис Пилу, рече дека во овој момент не може да го потврди ова.

Таа додаде дека скалите изгледаат релативно тесни и дека истрагата ќе утврди дали се почитуваат безбедносните стандарди.

Пилу додаде дека прашањето за противпожарната безбедност ќе биде разјаснето за време на истрагата и дека е прерано да се извлечат какви било заклучоци.

фото: ЕПА