Четириесет и осумгодишен кичевец на својот фејсбук-профил објавувал текстови и фотографии со вознемирувачка, навредлива и заканувачка содржина, со што поттикнувал омраза и насилство.

ОВР Кичево поднесе кривична пријава против него поради постоење основи на сомнение за сторено кривично дело ширење расистички и ксенофобичен материјал по пат на компјутерски систем.

Охриѓанецот Ш. К. (47) среде пандемија организирал семејна прослава со присуство на 20 гости.

„СВР Охрид поднесе кривична пријава против Ш. К. (47) од Охрид поради постоење основи на сомнение за сторено кривично дело непостапување според здравствените прописи за време на епидемија. На 21.11.2020, при извршена контрола во домот на пријавениот, полициски службеници констатирале дека организирал семејна веселба со присуство на 20 гости. Со тоа пријавениот постапил спротивно на одлуката и препораката за заштита на здравјето на населението од коронавирусот“, соопшти МВР.

Скопското основно јавно обвинителство поднесе обвинение против 24-годишник од Скопје кој се товари за две кривични дела – неовластено држење оружје, како и за предизвикување општа опасност.

Како што информираат од обвинителството, обвинетиот на 2 ноември минатата година неовластено држел автоматски пиштол марка ЦЗ ВЗ61 скорпион, како и 10 куршуми за тој пиштол со калибар 7,65 милиметри.

На критичниот ден, на улица Цветан Димов во скопски Чаир, тој забележал едно лице и испукал неколку куршуми кон него, со што со умисла презел општо опасно дејствие и го загрозил животот на оштетениот. Во настанот биле оштетени три паркирани возила.

Бидејќи постојат околности кои упатуваат на опасност од бегство и можност обвинетиот да го повтори делото, надлежниот јавен обвинител до Основниот кривичен суд Скопје доставил предлог за продолжување на претходно определениот притвор.​