Лидерот на СДСМ, Зоран Заев, вели дека името на партијата сè уште не е сменето поради пречките што ги предизвикала пандемијата.

„Од почетокот на пандемијата досега одржавме само еден онлајн-конгрес“, вели Заев.

Тој најавува дека на следниот конгрес на партијата, кој инаку ретко се свикува, тоа ќе се случи.

„Верувам дека во периодот пред нас ќе постапиме во согласност со преспанскиот договор“, рече Заев.

Според него, се разгледуваат неколку опции како тоа ќе се изведе, партијата и понатаму ќе се нарекува СДСМ, меѓутоа зад буквите ќе се кријат други зборови.

Една од опциите за ново име на партијата била Социјадемократи од Северна Македонија.

Претседателот на Србија, Александар Вучиќ, денеска, во Сараево, предаде контингент од 5.000 вакцини од компанијата „Астра зенека“, што Србија ѝ ги донира на Босна и Херцеговина.

На сараевскиот аеродром „Бутмир“, претседателот на Србија беше пречекан од претседателот на Претседателството на БиХ, Милорад Додик, и од бошњачкиот член на Претседателството, Шефик Џаферовиќ.

Беше најавено дека Вучиќ ќе биде пречекан на аеродромот од комплетното претседателство на БиХ, но присуството на хрватскиот член Жељко Комшиќ изостана.

Во пресрет на заминувањето Вучиќ за сараевските медиуми изјави дека е многу среќен што може да дојде во Сараево и да ги донесе првите дози вакцини.

Тоа, вели тој, не е помош, туку нешто што им припаѓа еднакво на сите, а Србија, како што додава, ја имаше таа среќа да обезбеди повеќе вакцини.

„Тоа се вкупно 10.000 дози. Утре 5.000 дози, а за неколку дена уште 5.000. Мислам дека тоа е особено важно за здравствените работници што работат во зоната на црвената коска во БиХ. Мојата порака е дека мора да се свртиме едни кон други, да не сметаме дека сите други ни се поважни и дека е важно колку лошо ќе кажеме за оние што се најблиску до нас“, истакна претседателот на Србија.

Тој претходно зборуваше за балканските народи, кои, според него, имаат голема сила и моќ кога се обединети.

Лекот „хидроксихлорокин“, за кој поранешниот американски претседател Доналд Трамп тврдеше дека ќе го промени текот на пандемијата, не треба да се користи за да се спречи инфекција со коронавирусот и тој не влијае значително на пациентите што веќе се заразени, предупреди денеска стручната комисија на Светската здравствена организација.

Експертската комисија на СЗО во британското медицинско списание БМJ изјави дека овa антиинфламаторно средство не треба да се користи во борбата против пандемијата и дека не вреди да се истражува во понатамошните студии за можните начини на лекување пациенти со Ковид-19, пренесува „Ројтерс“.

Експертите на СЗО забележуваат дека ова е нивна силна препорака, која се заснова на многу безбедни докази од шест контролирани испитувања со повеќе од 6.000 луѓе, и за оние за кои се знае дека биле изложени на Ковид-19 и за оние што не се.

Тие додадоа дека оваа дрога повеќе не е приоритет за истражување и дека ресурсите треба да се пренасочат кон евалуација на други лекови, кои ветуваат повеќе.

Трамп рече дека тој самиот користи „хидроксихлорокин“, дури и откога Американската администрација за храна и лекови објави дека неговата ефикасност и безбедност не се докажани.