Пешак е тешко повреден во сообраќајна несреќа што се случила на 27 декември околу 11 часот на улицата „Народен фронт“ во Скопје.

Според информациите од СВР Скопје, патничко возило „шкода“ со скопски регистарски ознаки, управувано од 53-годишна скопјанка, удрило во 31-годишен пешак, исто така од Скопје.

Во несреќата, пешакот се здобил со тешки телесни повреди и бил пренесен во Ургентниот центар при Комплексот клиники „Мајка Тереза“, каде што повредите му биле констатирани од лекарска екипа.

На местото на настанот бил извршен увид од полициска екипа од СВР Скопје, а причините за несреќата се утврдуваат.

Сообраќајна несреќа се случила ноќеска по полноќ на регионалниот пат меѓу селата Липково и Отља, во кумановскиот регион.

Како што соопшти полицијата, на 28 декември околу 01:00 часот, патничко возило „сеат“ со кумановски регистарски ознаки, управувано од 22-годишен маж од селото Отља, излетало од коловозот и удрило во ѕид од гаража.

Во несреќата, младиот возач се здобил со тешки телесни повреди и бил пренесен во Општа болница Куманово, каде што повредите му биле констатирани од лекарска екипа.

На местото на настанот бил извршен увид.

Сообраќајна несреќа се случила на 27 декември попладнето во Куманово, на крстосницата од магистралниот пат Куманово–Крива Паланка, во населбата Карпош.

Како што информираат од СВР Куманово, околу 16:15 часот дошло до судир меѓу патничко возило „дачиа“ со кумановски регистарски ознаки и патничко возило „сеат“ со регистарски таблички од Крива Паланка.

Во несреќата, тешки телесни повреди добила 28-годишна жена од Скопје, која била сопатничка во возилото „сеат“. Со телесни повреди биле повредени и возачот на „сеатот“, 27-годишен маж од селото Конопница, како и малолетен сопатник од истото возило.

Сите повредени биле пренесени и згрижени во Општа болница Куманово, каде што им биле констатирани повредите.

На местото на несреќата бил извршен увид од полициска екипа од СВР Куманово.